Read Maasai Bible – Biblia Sinyati Yudit 12 Bible Online

Yudit 12 - Maasai Bible – Biblia Sinyati bible

Yudit 12

¹Nejoki Holoferne lasiayak lenyena perik Yudit emisa enye natipikaki isaanini enkosolai, neishori endaa sidai o naisho oo sabibu.

²Kake neany Yudit. Nejoki, “Manya endaa ino.” “Amu keaku atigil enkitanapata Enkai. Kanya ake enayaka kewan.”

³“Kake kaa taa iyas teneishunye endaa ino we naisho oo sabibu?” Neikilikuwan Holoferne. “Kaji etumie ai daa? Nemeetai Israeli too kuna lng'oborri ang.”

⁴Newaliki Yudit ajoki, “Lokitok, ore te sipata anaa enitejo, kaata endaa naabaiki ometabai nena olongi naidip Olaitoriani inkitobirat enyena.”

⁵Nerik sinkan le Holoferne Yudit arik olng'obor. Neirag ine omekenyu, nedumunye tadekenya oleng,

⁶neiriwa olkilikuai enetii Holoferne pee isho meshomo oaerata aomon.

⁷Nejoki Holoferne laripok peisho Yudit meshomo anguaa olng'oborri. Ore too inkolong'i uni natobiko Yudit to ilng'oborri, ore kewarie nelo oaerata otaniki Betulia neitukuo to olchorro.

⁸Ore peyie eidip aitukuoyu, neomon Olaitoriani Enkai peutaa ninye tokitobirat enyena nayaki Israel enkisulata.

⁹Ore peyie eidip neshuko ilng'oborri esinya, neton to lng'oborr lenye omeidipa endaa enteipa.

¹⁰Ore te enkolong e oguan embikoto e Yudit too ilng'oborri, neitobiriki Holoferne osirua lelo kituak le enjore, kake eitu eitomon lelo oripisho ina olong.

¹¹Nejoki Bagoas, ilo sunash oitaisheki ilomon lenyena, “Shomo tasaya ina kitok ol Lbrania, niripito, pelotu olng'oborr lai anya endaa nikiokisho tenebo.

¹²Amu keaku esulare tinaisho enarishata angiroo eitu aingoru ena kitok natiu enji. Ore tenamatem aingoru ninye, naa kakwenie.”

¹³Neiguaa Bagoas Holoferne, nelo enetii Yudit, “Nakitok sidai,” nejoki Bagoas, “airriwa olkitok paitomon olng'oborr lenye peok enaisho oo sabibu tenebo iyiook. Wou entishipa kewan anaa kituak e Asiria naasisho te enkaji e nkitoo e Nebukadnesa. Ore ena na enkayit sapuk kinchooki.”

¹⁴Newaliki Yudit ejo, “Kanyoraa tenachipai, kainyoo paa any, kadamu ena kewarie encipai inkolong'i pooki naishu.”

¹⁵Nedumunye Yudit neishop inkilani naisul. Neituruk errindik enye te dukuya ninye, nelo dukuya Holoferne neisalash tenkop endapana enkine naishoo apa Bagoas Yudit petonie edaa.

¹⁶Nelotu Yudit ilo lng'oborr, neton tenkop. Ore peyie edol Holoferne Yudit neyieu neitaa encorute. Embaiki ina olong edukuya natodua, kegiraa apa areshu erishata peyie eisarkino ninye.

¹⁷Nejoki Holoferne, “tooko nishipa tenebo iyiook.”

¹⁸Newaliki Yudit ajoki, “Olkitok lai, kaok taata amu enkolong encipai te enkishui ai.”

¹⁹Kake ore iyia, etooko nenya Yudit, nena naaitobiraka errindik enye.

²⁰Eitishipa Yudit Holoferne neok enaisho oo sabibu sapuk, neitu akata eokisho nejia te inkishui enye.