Read Maasai Bible – Biblia Sinyati Yudit 13 Bible Online

Yudit 13 - Maasai Bible – Biblia Sinyati bible

Yudit 13

¹Ore peyie emutu, nepuo lomon. Ore ninye Bagoas neiken olng'oborr tiaulo, neiboyo sinkan le Holoferne pee mejing aairura. Nepuo pooki aruara; amu enaure pooki ng'ai te nkaraki ina masho natotona oleng.

²Neinguari Yudit openy to lng'oborr o Holoferne oirura te ndapasha te nkaraki etemere.

³Ore errindik e Yudit netii aulo olng'oborr arreshu ninye peyie elo aomon Enkai, anaa enaiko oshiake kewarie. Netiaaka Yudit Bagoas ajo kelo aomon Enkai.

⁴Ore peyie epuo lomon pooki o sinkan. Neing'uari Yudit o Holoferne oopeny to lng'oborr. Neitashe Yudit tembata endapash e Holoferne neomon Enkai to ltau lenye, “Iyie Olaitoriani, Enkai magilani, taretuoki too nena najo pee aas te nkaraki enkitoo e Yerusalem.

⁵Ena erishata nakordunyeki iltung'ana linono litegelua, naa taretuoki pee aitabaya ina kipirta endaakinoto olmangati ooitanyamalita iyiook.”

⁶Nelo Yudit e ndukuya endapash airishare edukuya e Holoferne neitayu olalem lenye.

⁷Nenyikaki, neibung ilpapit le lukunya e Holoferne nejo, “Olaitoriani, Enkai e Israel inchooki engolon tenakata.”

⁸Neilepie olalem nedung olgos katitin are nedungoo elukunya e Holoferne.

⁹Nerrumoki osesen lenye abori endapash, neitayu erreshet enkojongani te ndapash, neipang aulo, neisho errindik enye elukuya e Holoferne,

¹⁰nepik ina rrindik atua olbene le ndaa. Nepuo nena kituak pokira, anaa enaikununo oshi epuo enkomono. Ore peyie egiroo olng'oborr le asiria, nelang oearata neilepaki oldoinyo ometabai inchomito e Betulia.

¹¹Ore etaa kebaya, neipot Yudit lelo oripito kichomi, “Entabol enkishomi! Entabol enkishomi! Eton etii Enkai tenebo iyiook. Eibalunye taata Enkai engolon enye te Israel, neasishore engolon enye te nkaraki ilmangati lang.”

¹²Ore peyie ening iltung'ana oltoilo lenye, nekwet inchomito aaipot ilkituaak le enkanasa.

¹³Nekwet pooki ng'ai, olkiti o lbotor alo kishomi. Meetai hoo obo oiruko ajo etushukunye Yudit. Nebolokini kishomi Yudit o errindik enye, neitoomoni, neinoki enkima peishoru ewangan neman pooki nena kituaak are,

¹⁴nebuak Yudit ejo, “Meisisi Enkai, esisa ninye! Leitu ninye eany eitodolu olng'ur too iltung'ana le Israel. Ataasishore ninye ena kewarie peyie aidaikie ilmangati lang.”

¹⁵Neitayu elukunya e Holoferne too lbene le ndaa, neitodol iltung'ana, nejoki, “ore ena naa endukuya e Holoferne, olkitok le enjore e Asiria, nena ereshet enkojong'ani endapash enye, eneirrag etemere. Etaasishore Olaitoriani enkitok pee ear ninye.

¹⁶Ore eishu Olaitoriani, aimanya ajo eitu aitaas ai Holoferne, kake eteleja esidano ai ninye, near mutua. Eitu aaidurukie aashu aasul; aatorripo Olaitoriani.”

¹⁷Neing'asia pooki ng'ai teina anasa. Neirrugo pooki neserem Enkai, neomon tenebo, “Enkai ang kinarikino enkisisa sapuk, amu ore taata intodolua enkisulare too ilmagati loo iltung'ana linono.”

¹⁸Nejo Usia, “Yudit nanyor ai, kitamayiana Enkai natii shumata aisul, imayiana iyie alang inkituaak pooki enkop. Kebaa sii iyie enkishakinore enkisisa Olaitoriani Enkai oitobirua shumata o enkop! Kitorripo idungito endukuya olmangatinta kitok.

¹⁹Ore enkisiligata ino te Enkai nemerikinisho te lelo oolimu engolon Enkai.

²⁰Inchoo kincho Enkai entelet intarasi teina ni taasa. Inchoo kishukoni enashe too mayianat, amu itaa olairukoni te ninye, neitu iureyu aiminiye enkishui ino tenkaraki iltung'ana linono.” Neiruk pooki aajo “Eesai, Eesai!”