Read Maasai Bible – Biblia Sinyati Yudit 14 Bible Online

Yudit 14 - Maasai Bible – Biblia Sinyati bible

Yudit 14

¹Nejoki Yudit ninche, “Entoningoki ilalashera laainei, ore tandekenya ewaita ena dukuya entiik tesuntai enkanasa.

²Entegelu olarikoni linyi, ore tankakenya oleng, ewaita iltung'ana ongoli o masaa enye, neipung tena anasa, inchoo epuo anaa kepuoito oearata, nepuo arare Asiria.

³Keibung ilarripok le asiria ninche neoru masaa enye, nekwet aapuo olng'oborr pee endumu ilkituaak lenye. Kekwet ilkituak olng'oborr le Holoferne adumu kake metum ninye, keiureshoyu enjore pooki neiteru ashuko siadi ninyikakiki entai.

⁴Ore entai o o kulikai Siraeli pooki nisujaa ninche, neariara egira ninche aashuko.

⁵Kake ore eton eitu easiasa ai, erriu Akior ilo amoni enatii. Kayieu nadol tenaa keyiolou elukunya e Holoferne, ilo tung'ani omen apa Israel, neirriu Akior ene ejo keari metua tenebo iyiook.”

⁶Neipot Akior etii enkaji e Usia. Kake ore peyie edol endukuya e Holoferne tenkaina e obo elelo tung'ana, neiterre Akior, nebatata te olperere.

⁷Ore peyie eretuni nedumunye, neirugo Akior te dukuya inkejek e Yudit te enkanyit. “Inchoo ilmarei pooki le enkop e Yuda kisis iyie,” nejo, “inchoo nkuapi pooki eikirikira te nening enkarna ino.

⁸Aatasayi tolikioki eninkuna pee ias kuna.” Ore eitururo iltung'ana pooki, nejoki Yudit pooki toki nataasa aiteru ina olong nashomo teina anasa ometabaiki ina rishata.

⁹Ore peyie eidip enkatini enye, neitagol iltauja loo tung'ana, nebunk te encipai sapuk oleng neirukoki enkanasa pooki.

¹⁰Ore peyie ening Akior nena pooki nataasa Enkai e Israel, neaku ninye olairukoni odupa. Nemurati ninye, neaku obo lelo orere lo Siraeli, naa nejia etiu eishoi enye otata.

¹¹Ore tenkakenya ina kai olong, neik Siraeli elukunya e Holoferne te suntai enkanasa. Neya pooki masaa enye, nepuo too iltururi adoiyo te dukuya ina anasa.

¹²Ore peyie edol Asiria enagiraa aasa, neirriwa ilkiliku enetii ilkituaak, nepou lelo enetii ilkituaak le enjore.

¹³Ore lelo kituaak le enjore nepuo olng'oborr le Holoferne, nejoki Bagoas, “tudumu olkitok, amu ore lelo tung'ana le pesho le Israel netadoutuo too ildonyo aapuonu arare iyiook; engiraa ake aikilikuanu peyie emuti.”

¹⁴Nejig Bagoas atua, neoshiosh kutuk aji olng'oborr, enjoito ninye etii Holoferne o Yudit endapash.

¹⁵Ore peyie edol ajo eitu eirukishoi, neitiyikaa enkarasha e kutuk aji, nedol osesen le Holoferne nemetii elukunya etii olorika loo nkejek.

¹⁶Nebuak Bagoas, neishir temion oleng, neng'er inkilani enyena, neiteru ayietu eshirita.

¹⁷Nejing atua olng'oborr le Yudit, neitu einepu ninye. Nekwet aulo nebuaaki ilkituaak,

¹⁸“Eteleja iyiook! Einyala enkitok nabo o Siraeli enkitoo pooki e Nebukadnesa. Ing'ura atua ene, eirragita Holoferne to lperere nemeeta elukunya!”

¹⁹Ore pee ening ilkituaak, neitayu inkilani enye tosina, nening too lng'oborri pooki olkiyoi o embuakunoto enye.