Read Maasai Bible – Biblia Sinyati Yudit 15 Bible Online

Yudit 15 - Maasai Bible – Biblia Sinyati bible

Yudit 15

¹Ore peyie ening sikarini enataase, neirut

²neiteru aaikirikira te enkuretisho. Neidapasha pooki ng'ai enkalo enye to lng'oborr, negolu eitoki aitururo amu etetema pooki ng'ai aisik esujaa enkoitoi oo ildonyo o oearat.

³Ore lelo sikarini otipika ilng'oborri oldoinyo namanita Betulia neiteru sii ninche aashuko siadi. Nepuonu sikarini le Israel asuj ninche.

⁴Nerriwaa Usia ilkiliku enkanasa e Betomesthaim, Bebai, Koba o Kola, we enkop pooki e Israel, elikio enataase, nesai sii ninche peyie epuonu asujaa nemut olmangatinta.

⁵Ore peyie etum ilo kilikua, nedoiki ninche aar nemiraa lelo le Asiria ometabaiki Koba neari metuata. Ore sii ninche iltung'ana le Yerusalem o lelo omanya ildonyo nepudaki aar pee iyiolou lelo ilkiliku enataase too lng'oborri le Asiria. Ore lelo tung'ana oomanya ina kop e Gilead o Galilaya neikenoki enkoitoi lelo Asiria ogiraa aashuko siadi, neari ilkomok metuata, nesujari ometabaiki Dameski.

⁶Ore lelo kulingai tung'ana nedoyo apuo Betulia, negij ilng'oborri le Asiria nepuroo pooki toki neitaa aate karsisi.

⁷Ore peyie eshukunye ina jore e Siraeli einguaa arr ilmang'ati, neret aate tetoki natelekua. Etii apa masaa kumok oleng neng'ar iltung'ana pooki leina anasa o inkang'itie natii ina kop o indonyo.

⁸Nelotu olapolasani kitok Yoakim o olkioma le Israel, adol nena baa e nkingasia naaitaasa Olaitoriani iltung'ana lenyena, netumore sii Yudit, neisho ninye enchunet.

⁹Ore pee ebau, neisis pooki Yudit, “Ira iyie enkishili e nkisisa e Yerusalem, enkaiguanani e Israel, engida we encipai o iltung'ana lang!

¹⁰Amu etimirishe iyie tenkaina eno, intaasa Israel sidain, entishipa Enkai magilani, inchoo kimayian Enkai inkolong'i pooki enkishui ino.” Neiruk iltung'ana pooki ajo, “Eesai.”

¹¹Ewa iltung'ana erishat o inkolong'i tomon uni, peyie eishu masaa olng'oborr le Asiria. Neshori Yudit olng'oborr le Holoferne, enkosolai enye, ilbakulini, lorikan dapashi o tokitin pooki natii. Neya ninye neirot enyumpu enye o ngarri.

¹²Nepuonu kituaak pooki o Siraeli adol ninye; neranyakini isinkolioitin le kisisa. Ore teina olong enchipai neitayu ng'usidin neisho nena kituaak

¹³neishop embenek olorien too lukuny enye. Nerikoo Yudit kituaak eranyisho, nesujaa iltung'ana pooki le Israel, neishop ninche entapuka too lukuny enye, nenapita masaa enye olarabal nerany isinkolioitin le kisisa.