Read Maasai Bible – Biblia Sinyati Yudit 2 Bible Online

Yudit 2 - Maasai Bible – Biblia Sinyati bible

Yudit 2

¹Ore to lari le tomon o isiet le nkitoria e Nebukadnesa te nkolong e tikitam aare to lapa le dukuya eilo ari, neimie olaguanani o ilaikook lenyena aajo keitalaku elap too nena kuapi pooki naatanya eretu.

²Neipot olaiguanani tenebo lelo aitasheikinok o lkituaak, neliki inkitobirunot oo nkurrat makewan, neliki pooki te nkutuk enye, entorroni eilo osho.

³Nedung inchere ore pooki tung'ani leitu eiruk enkitoria neari metua.

⁴Ore pee eidip atanapayu, neipot olaiguanani Nebukadnesa le Asiria Holoferne oloti lenye nejoki:

⁵“Nji ejo Olaguanani Kitok, olaitoriani le nkop pooki, ore tinipuku tene, iwa iltung'ana lisilig ajo kegoli, oobaya enkalifu iip nabo o tikitam iloo inkejek o loo ngarrin oo mbartan inkalifuni tomon oaare.

⁶Enchom entaarare ina kop oloo ntoluo pooki, amu etanyaita aaning nanu.

⁷Tiaaki ninche pee erreten enkare o enterit, amu agira alotu te nkaraki ninche te ngoro ai, amu kaitoip enkomom pooki e nkop te njore ai, naa kaisho iltimito le enjore ai pee emut.

⁸Kaiput inong'ot too lmeneng'a, ore sii inkariak o ilkejek naa kaiput too lmeneng'a kumok;

⁹naa karik lelo yarunot ometabaiki enkiting'oto e nkop pooki.

¹⁰Ilo iyie Holoferne nimbung enkitoria enye, eton eitu abau. Ore teneyau ate imbun'ga ometabaiki enkolong e nkitamioto.

¹¹Kake ore teneany, ming'urrie, inchooi ninche metaari metuata nimut ilkerenketi pooki.

¹²Amu ore aishu o engolon e nkitoria ai, ore enatejo naa kaas.

¹³Naa ing'ura iyie kewan pee migil ake nkitanapat o laiguanani lino kake taasa anaa enaatiaaka nimimutie ake.”

¹⁴Nelo Holoferne aing'uaa olaiguanani, neipot aiturrur tenebo ilkituaak le njore, larikok loo njorin o ilkituak le enjore e Asiria.

¹⁵Negelu iltimito le njore anaa enatiaaka olaiguanani, loo inkalifuni iip nabo o tikitam, tenebo ingarrin oo mbartan inkalifuni tomon oaare,

¹⁶nerreten anaa enjore kitok naitobira te nkaraki olarrabal.

¹⁷Neiturrur imbartan o sirkon o nyumpui kumok pee enap inareta o nkishu o ntare o nkineji nemeeta esiana te nkaraki endaa,

¹⁸e pooki tung'ani o saabu o enkosholai sapuk, naing'uaa enkaji e nkitoo.

¹⁹Neituruk Holoferne o enjore pooki, te dukuya olaiguanani Nebukadnesa, neitoip enkomom pooki e nkop ometabaiki oloo ntoluo o ngarrin oo mbartan.

²⁰Ore tenebo ninche neshomo enjore nemeikenayu, naa kumok anaa ilmaat, aashu anaa enterit e nkop to lpurkel.

²¹Neruko enjore inkolong'i uni eing'uaa enkanasa e Ninawi nebaya ong'ata e Bektileti neitayu ilng'oborri te nkae shoto e Bektileti te mbata o ldonyio otii moikuape e shumata Kilikia.

²²Ore eing'uaa ine neya Holoferne enjore enye pooki, tenebo o lookedito mbartan o ingarrin oo mbartan nelo enkop o indonyio.

²³Nemut enkop pooki e Libya o Lidia, near iltung'ana pooki le Rasis o Ishmael oomanya embata o lpurkel, kopikop enkop oo Lkeli.

²⁴Nesujaa Frati, neimaa Mesopotamia, near nena anas naatii inchumat oo indonyio embata Abron ometabaiki enaiposha.

²⁵Neibung sii olpolosie le Kilikia, near pooki tung'ani ojo agolong'u, nelotu olpolosie le kopikop e Yafeti, embata Arabia.

²⁶Neman Ilmidia pooki nepejoo lng'oborri lenye, neyieng intare enye pooki.

²⁷Nedooyo alo ong'ata e Dameski enkata e nkikesare e nkano, nepejoo nkurman enye pooki, near intare o inkishu, nepur nkanas enye o elatia pooki, near ilbarnot pooki lenye.

²⁸Neureishoyu lelo tung'ana pooki oomanya ilo omanaa le naiposha le Tiro o Sidon o lelo oomanya Suri o Osina o Asoto o Ashkelon.