Read Maasai Bible – Biblia Sinyati Yudit 3 Bible Online

Yudit 3 - Maasai Bible – Biblia Sinyati bible

Yudit 3

¹Neirriwaki iloshon pooki olamal le seriani enetii olaiguanani Nebukadnesa te kulo rorei:

²“Kintondol iyie esupatisho, olaiguanani kitok Nebukadnesa; kitii iyiook ene pee kisiaaisho nikiyanyit enkitanapata pooki nincho iyiook.

³Ore inkajijik ang pooki, o enkop ang o inkurman o inkishu o lng'oborri netii abori enkitoria ino, ntaasa eniyeu.

⁴Ore iltung'anak lang naa irrindiki linono, intaasa nkanas ang anaa eniyieu.”

⁵Ore pee eidip olamal le seriani aitabau ilo kilikuai,

⁶nerik Holoferne enjore e Nebukadnesa abori ometabaiki mbat e naiposha kitok. Nepik ilarripok isunta pooki oo nkanas, negelu iltung'anak lemurua too nkang'itie pooki pee eaku ilarripok ooiteng'elaki.

⁷Ore iloreren pooki o elatia neitoomon Holoferne eishopito inkilani oo ntapuka neranyita too ltoiloishi loo nkinantani.

⁸Kake ore ninye Holoferne, neinyal iwuejitin enye e seremare, nedung ilkeek lenye oosinya amu etiaakaki ninye pee emut nkaitin pooki enkop, paa ore nkuapi pooki o loshon neserem Nebukadnesa ake, neomon ninye anaa enkai.

⁹Neimaa Holoferne enong'oto e Yesreel embata Dotan, naing'orita enkilepakinoto o ldoinyo le Yuda,

¹⁰nepik olng'obor erishata e Geba o Sitoli. Neton teine olapa obo peyie etum aiturrurru imasaa e njore enye.