Read Maasai Bible – Biblia Sinyati Yudit 4 Bible Online

Yudit 4 - Maasai Bible – Biblia Sinyati bible

Yudit 4

¹Nening iltung'ana le Yuda enaitaasa Holoferne oloitore iloshon enjore o laiguanani Nebukadnesa o enaikuna pee epur nemut inkajijik pooki e Nkai.

²Neirut ninche oleng, neureyu aajo kainyoo eidim ninye aitaasa Yerusalem o enkaji o Laitoriani Enkai enye.

³Enashukokinore det enkang enye e Yuda te yararoto, neitisinya enkaji e Nkai o masaa pooki e nkisiaayiare tiatua enkaji e Nkai o olperere lo lasar.

⁴Nepuo ilkerenketi pooki le Samaria o Kona o Bet-horon o Belmain o Yeriko o Koba o Esora o enong'oto e Salem,

⁵nesioki aaibung inchumat oo ldoinyo, neshet isunta too inkang'itie, neshum endaa anaa enapa o larrabal neing'uaa inkurman enye amu enaikesieki ninche.

⁶Ore Yoakim laa ninye olapolosani kitok otii Yerusalem ina rishata, neigeroki iltung'ana le Betulia o Betomestaimu naing'orita Esdreloni te nkalo Dotan.

⁷Nejoki ninche pee eibung enkoitoi nalo indoinyo, amu te ninche ejing'akini Yuda, na kelelek eitasheyie olotem ajo ajing amu aironkai enkoitoi, iltung'anak aare ake eishaa.

⁸Neas Isiraeli anaa enatiaaka Yoakim olapolosani kitok o ina rikore pooki e Israel natii entumo te Yerusalem.

⁹Ore pooki tung'ani le Israel neishiraki Enkai, neitobor ate te mpukoroto.

¹⁰Ore ninche o nkituaak enye o nkera o inkishu o lomon lenye o lasiaayiak lenye o rrindiki neishopo pooki too ilkuniyiani.

¹¹Ore iltung'ana pooki o nkituaak e Israel o nkera enye naamanya Yerusalem, neirrabalakino enkop te dukuya enkaji e Nkai, neelielie inkuruon ilukuny enye, neidapash ilkuniyiani lenye te dukuya olaitoriani.

¹²Neitaman ilkuniyiani olperere lo lasar, neishir tenebo eomon Enkai oo Siraeli pee meisho ake inkera enye eibug'i o nkituaak enye eyae o nkanas naatujungo emuti, neomon Enkai pee meisho ake iloreren eimie enkipirta enye naamutie enkaji e Nkai neidurukie.

¹³Nening Olaitoriani enkomono enye, nedol enyamali enye; ore too nkolong'i kumok nebik iltung'ana le Yuda o Yerusalem too mpukorot te dukuya enkaji e Nkai Olaitoriani magilani.

¹⁴Ore Yoakim olapolosani kitok o laposak o kulikai aisiaayiak lo laitoriani te nkaji e Nkai, neishop ilkuniyani neitayu anaake olasar opejori o lmumai, o nkishoorot o lpela oo ltung'ana.

¹⁵Nepik inkuruon inkarash enye oo lukuny, neishiraki Olaitoriani pee eing'urie enkaji e Israel pooki.