Read Maasai Bible – Biblia Sinyati Yudit 5 Bible Online

Yudit 5 - Maasai Bible – Biblia Sinyati bible

Yudit 5

¹Ore pee ening Holoferne olkitok le enjore e Asiria ajo etanapate iltung'ana loo Siraeli te nkaraki olarrabal, neikeno inkoitoi pooki too ndoinyo nepik intokitin naaikobisho enkoitoi,

²negoro oleng. Neipot ilkituaak le Moab o looiotore Ammon, ilgafanani pooki loo lomanaa le naiposha

³nejoki ninche, “Entiaakaki intae Ilkanani, kakua tung'ana kulo oomanya enkop o ildoinyo? Kakuwa anas emanya? Kebaa enjore? Ama engolon o nkidimata enye naa kaji etumie? Kaing'ai olaiguanani oitore ninche nerikito enjore?

⁴Kainyoo paa ninche ake too ltung'ana pooki loo oloontoluo, ootanya epalari?”

⁵Nejoki Akioro olarikoni loo Lamoni Holoferne, “Olaitoriani, aaomon nanu, osinka lino, toning'o ilomon laaliki naa kaaliki esipata naipirta lelo tung'ana oomanya ildoinyo embata o lng'obor lino. Meetae imbaa e lejare naapuku te nkutuk o sinka lino.

⁶Ore kulo tung'ana naa lle ishoi oo lkaldayo.

⁷Naa ore ti apa nemanya Mesopotamia, amu etalaikinote aatusuj inkaitin oo loomenye naatii enkop oo Ikaldayo.

⁸Amu etung'uaitie inkoitoi oo loo nkakuyiaa lenye, neserem Enkai e keper, Enkai naetuo aayiolou, nemirari te dukuya nkaitin enye, neisikaki Mesopotamia, nemany ine te rishata naado.

⁹Nejoki enkai enye pee eing'uaa ine apa nemanya, nepuo aamany enkop e Kanaan. Ore teine netoni aaitobiraki nebul too nkishu o te nkosholai o te saabu.

¹⁰Ore pee elotu olameyu, nedoyio aapuo Misiri, nemany ina kop netum endaa nabaiki, nebul aaku kumok oleng neaku meikenayu.

¹¹Ore olaiguanani le Misiri neiteru aing'ode ninche; neisiaaishore ninche aitaainye isoito, neitadou ninche aitaa irrindiki.

¹²Neishiraki ninche Enkai enye, neitame Enkai enkop pooki e Misiri to lmeitai, nemiraa Ilmisiri te nkop enye.

¹³Neitoi Enkai Enaiposha te dukuya ninche,

¹⁴nerikoo ninche te nkoitoi e Sinai o Kadesh-barnea, nemiraa Siraeli iltung'ana pooki oomanya kopikop e Kanaan.

¹⁵Nemany enkop oo lamori, ore te ngolon enye neshurt inkajijik pooki oo le Heshbon, nelang olkeju le Yordan neitaa enenye enkop pooki oo ldoinyo.

¹⁶Nemiraa Ilkanaani o Lperisi o Lyebusi o Shekem o lgirgashi nemany ina kop te rishata naado.

¹⁷Ore erishata pooki neitu eas ninche ing'ok, nedupoyu amu ore Enkai enye naa keiba entorroni.

¹⁸Kake ore pee eing'uaa inkoitoi naatiaakaki pee esuj, nemiri too larrabali, neyai sii anaa lelo ooena nkuapi oo loreren, ore enkaji enkai nepejori, ore inkanas enye neibung ilmang'ati.

¹⁹Kake ore taata netushukukinote Enkai enye, etushukunye too wuejitin apa neeidapashikinote, newaita Yerusalem ewueji netii enkaji e Nkai, nemany enkop oo ldoinyo amu memanyai apa.

²⁰Ore naa olkitok lai naa olaitoriani, tenaa ketii entorroni atua kulo tung'ana, netaasa ing'ok te dukuya Enkai, nikitum entorini enye naa aikiilep aarare amu ekimir niche.

²¹Kake tenemetii entorroni enkop enye, matung'uai ninche, amu kemitu Enkai enye, naa ekikurru te dukuya enkop pooki.”

²²Ore pee eidip Akior atejo nena, neiteru lelo tung'ana ooitashe too lng'oborri aishankarra; ore ilaitasheikinok le Holoferne o iltung'ana ooing'uaa olomanaa le naiposha, o Moab nejo pee eari metua.

²³Nejo maate “Mikiure Isiraeli amu iltung'ana lemeeta engolon o enkidimata o larrabal.

²⁴Neaku, emailepa olkitok le njore Holoferne amu kear enjore ino kitok ninche.”