Read Maasai Bible – Biblia Sinyati Yudit 6 Bible Online

Yudit 6 - Maasai Bible – Biblia Sinyati bible

Yudit 6

¹Ore pee eishunye enkilepilep o lorere ootii auluo olkioma, nejoki Holoferne olkitok le enjore le Asiria Akior o Lmoabu neitashe enjore pooki naing'uaa iloreren o Lamoni:

²“Amaa ira iyie ng'ae, Akior, o enjore nainyang'uno e Efraim pee epuononu aaibonisho anaa enitaasa taata, nijokiki iyiook pee mikiarare iltung'ana le Siraeli amu kemitu Enkai ninche? Aing'ai enkai neme Nebukadnesa?

³Keirriwaa enjore enye pee eshurt ninche pooki te nkomom enkop, naa ore Enkai enye nememitu, ore iyiook isinkan lo laiguanani nikishurt ninche anaa oltung'ani obo. Meidim ninche aatagolong'aki ilo magilani o ltimito ookedito mbartan.

⁴Aikipejoo ninche, ore ildoinyo lenye neiput osarge, ore nkurman enye neiput iseseni. Meidim iyiook, aikiishu ninche pii. Nejia ejo olaiguanani Nebukadnesa, olaitoriani le nkop pooki. Amu eiroro; meetae olomoni lenye olo pesho.

⁵“Kake ore iyie, Akior o intae iloreren o Lamoni, iroro anaa olakaldaroni, mikintokiki aadol omatigilunore ilo osho oing'uaa Misiri.

⁶Ore te nchukunoto ai naa kerem naa kear intae isikarini laainei entuata nibatatakino lelo ooata ilbaa.

⁷“Ekishuk isinkan laainei enkop oo ldoinyo, niking'uaa te nabo oo nkanas oo Siraeli,

⁸pee iye teine o kulikai tung'ana.

⁹Ijo iyie inyamal Akior? Ijo iyie kaidim atigilunore ina anasa? Atejo meetai olomoni lai olo pesho.”

¹⁰Neitanap Holoferne isinkan lenyena, oorreshito too lng'obori, pee eibung Akior neya Betulia, neisho iltung'ana le Siraeli.

¹¹Neya irrindiki ninye, aitayu te lng'obor neya ang'ata, neitoki aailepie enkop oo ldoinyo, nebau olchorro tiabori Betulia.

¹²Ore pee edolu iltung'ana le nkanasa, nedumu inareta enye, nekwet ailepaki shumata endoinyo, ore ilanang'arok loo soito te nkopito neibooyo ninche aailepu e nang too soito.

¹³Kake nepuo aaigara endoinyo, neen Akior, neing'uaa ninye eirrag te ntonata e ndoinyo neshuko enetii olkitok lenye.

¹⁴Nedou iltung'ana loo Siraeli eing'uaa enkanasa enye neinepu ninye; nelaku ninye nayauni Betulia enetii iladung'ok le nkiguana le nkanasa enye,

¹⁵laa ore teina rishata naa Usia olayioni le Mika, lo losho le Simon o Kabrisi olayioni le Gotonieli o Karmisi olayioni le Melkieli.

¹⁶Neipotu tenebo ilpayiani le nkanasa, o ltung'ana pooki ooti o lkituak nepuo pooki aiturrurro; nepiki Akior empolos o iltung'ana neikilikuan Usia enataase.

¹⁷Newaliki, aliki ninye enataase to lkioma le Holoferne, pooki naatejo te dukuya larikok le Asiria o pooki naimanyare Holoferne ajo keidim aitaasa Isiraeli.

¹⁸Ore pee ening iltung'ana nena, negil kung aaserem Enkai. Neomon.

¹⁹“Naai Olaitoriani le keper, ing'ura olwuasa loo lmang'ati lang, ing'ura emborron o iltung'ana linono, ing'ura taata nkomomi e lelo lintisinya iyie.”

²⁰Neilejileji Akior, neisisi oleng.

²¹Neya Usia aitung'uaa olturrrur, neya enkaji enye, neitobir osirua loo lpayiani, ore ina kewarie pooki neipot Enkai e Israel pee eretu.