Read Maasai Bible – Biblia Sinyati Yudit 7 Bible Online

Yudit 7 - Maasai Bible – Biblia Sinyati bible

Yudit 7

¹Ore peyie eaku enkolong e are, neitanap Holoferne enjore enye pooki o lchoreta oootushulare pee egil olng'obor. Nepuo aagilunore Betulia, neibung inkoitoi naailep aapuo enkop oo ndoinyo, neitaainye Israeli olarrabal.

²Neaku ore enjore enye neidurrie olng'obor ina olong; ore enjore enye naa iip nabo o ntomoni naapishana ngarrin oo mbartan o nkalifuni tomon aare ilakedok loo mbartan, tenebo lolan o isikarini loo nkejek oorripito ilolan, olorora kitok.

³Nepik olng'obor enong'oto nataaniki Betulia, teidia alo nkonyek oo nkariak, neidapashakino Dotan ebaiki Balbaim. Ore enkadori neiteru te Betulia ometabaiki Cyamon, naing'orita enong'oto e Yesreel.

⁴Ore peyie edol Isiraeli esiana e njore, neureishoyu oleng, nejokino maate, “Kenya kulo sikarini pooki toki nadol. Meetae endaa nabaiki naitotiyieki ena jore too ldoinyo o too nong'ot o too ndoinyo.”

⁵Ore te nkuretisho o Siraeli, neya imasaa enye o larrabal, neinok oo inkimaitie too iltaleta, oorrip enkewarie pooki.

⁶Ore peyie eaku enkolong e are, nerik Holoferne ilakedok loo mbartan pee edol Israeli ootii Betulia.

⁷Nejur inkoitoi eina anasa, o nkonyek oo nkariak naaisho enkare, neibung nkonyek oo nkariak nepik isikarini orrip, neshuko enetii enjore enye.

⁸Ore larikok pooki le Edom o Lmoabu tenebo ilkituaak le enjore nainguaa olomanaa le naiposha, nepuonu enetii Holoferne nejoki,

⁹“Olkitok lai, ore tinining enkikoo ang, menyamalu enjore ino.

¹⁰Ore kulo Siraeli nemeigarakino imasaa enye o larrabal pee emitu, kake enkadori o ldoinyo omanya, amu melelek enkedoto oldonyio.

¹¹Neaku olkitok Holoferne, tinimintoriokino aarare, nemenap enjore ino ilbaa.

¹²Totona iyie to lng'oborri lino nintore isikarini linono too lng'obori lenye. Entanapa iltung'ana linono metorripo nkonyek oo nkariak te ntonata o ldoinyo,

¹³amu ine epuonu iltung'ana le Betulia aokunye enkare. Neaku ore tenetum enkure neitayu enkanasa enye aaishooyo. Ore eikununo nejia nikilep iyiook o iltung'ana lang enchumata o ldoinyo omanita, nikishet ilng'oborri nikimbooki pooki ng'ae enkanasa.

¹⁴Ore pooki neya olameyu, ilewa o nkituaak o inkera, eton ninye eitu eari, ore enkoitoi nalala e nkanasa neiput iseseni lenye.

¹⁵Ore eyia nejia, nintalak ninche teina golong'u enye oina natanya king'amu te seriani.”

¹⁶Neshipakino Holoferne o sinkan lenyena lelo omon, neishooyo inkitanapat pee easi ina.

¹⁷Neidurraki Ilmoabu o le Asiria inkalifuni imiet o lng'obori lenye enong'oto pee etumoki aaibung'a enkong'u e nkare eina anasa.

¹⁸Neilepaki Edom o Lamoni oldoinyo nepik ilng'obori teidi alo enkanasa e Dotan. Nepuo kulikai tung'ana kopikop o loo saen napirta Akraba nataaniki Kusi natii embata ereyiet e Mokmur. Ore ina ae jore e Asiria neshet olng'obor te nong'oto. Neidapashakino ilng'oborri ina kop pooki, amu ore esiana o lng'oborri o masaa o larrabal naayieuni naa aikumok.

¹⁹Neishiraki Israeli Olaitoriani Enkai enye pee eretu. Amu etalepori to lkirutoto, amu etamana ilmang'ati ninche neaku meeta eneisikaki.

²⁰Ore enjore pooki e Asiria, tenebo o lakedok loo mbartan o ngarrin oo mbartan nemuat Betulia inkolong'i tomoni uni oong'uan omeishunye enkare teina anasa.

²¹Ore Engumoto natii enkare netoyu, neaku ore enkare naoki nemebaiki iltung'ana nemeetae enkolong natumi enkare nabaiki.

²²Neshalu inkera; ore te pooki wueji teina anasa neiterriaa nkituaak o ltung'ana ooti. Neaku metii obo oata engolon nabaiki.

²³Neiturrurro iltung'ana pooki, ilewa o inkituaak o inkera neman Usia o lkituaak le nkanasa nebuaaki oleng aajoki,

²⁴“Ekintame Enkai tena nintaasa iyiook! Iyie oata etioto te kuna naagira aasa, amu itanya apa intayu osotua o Asiria.

²⁵Meetae oloretu iyiook, eshoo Enkai meitoria iyiook. Kinaurate, netaa keya iyiook enkure.

²⁶Impoto Asiria tenakata nincho ninye erishata e seriani, nincho Holoferne o enjore enye eya enkanasa nepur.

²⁷Enaikash tinikiaku ilooena lenye lo larrabal. Enaikash teneeitaa iyiook irrindiki, kake nikinchu, nimikintoki aadol inkituaak ang o inkera eye te dukuya nkonyek ang.

²⁸Ore keper o enkop naa shakeni te iyie, naa nejia sii etiu Enkai, Olaitoriani loo nkakuyia lang, oitame iyiook te nkaraki eng'oki ang o enenye. Ekisilig nikiomon ajo meisho kuna tabo easa tiatua iyiook taata”.

²⁹Neishir pooki ng'ai ebuakita, neomon Olaitoriani Enkai enye.

³⁰Nejoki Usia ninche, “Emileporiri te nkirutoto, ilchoreta laainei! Matarreshu inkulie olong'i imiet pee kidol tenaa keing'urie iyiook Olaitoriani Enkai ang, amu ore te sipata meing'uaa iyiook pi.

³¹Kake ore te nemeetae eretoto te nena olongi imiet, naa kaas anaa enitejo.”

³²Neidapash Usia iltung'ana. Neshuko Ilewa aarrip isunta o iltaleta, ore inkituaak o inkera neshuko inkang'itie. Neisinanuo enkanasa pooki.