Read Maasai Bible – Biblia Sinyati Yudit 8 Bible Online

Yudit 8 - Maasai Bible – Biblia Sinyati bible

Yudit 8

¹Ore te nena olong'i, nening Yudit enataasa Usia. Entito apa e Merari ninye, olayioni le Oksi, olayioni le Yosef, olayioni le Elkia, olayioni le Annanias, olayioni le Gideon, olayioni le Refaim, olayioni le Ahatibu, olayioni le Hilkia, olayioni le Eliabu, olayioni le Nataniel, olayioni le Sarasadai, olayioni le Israel.

²Ore olpayian le Yudit naa Manase, le ntalipa enye too losho o to olgilata, netua te rishata e nkikesare e shairi.

³Etapejo apa enkolong eitashieki isinkan too nkurman enyena, ore pee elo airura neye te ndapash te nkang enye te Betulia. Neturori te nkurare o lamarei lenye too nkurman naatii polos e Dotan o Balamoni.

⁴Etobiko Yudit aa enkoliai too larin okuni o lapaitin oong'uan.

⁵Ore to loiputukunyi lenye neshet enkaji nashurie, nemany ine, neishop ilkuniyiani.

⁶Nepukoo ina rishata pooki, meteleku ake inkolong'i nemeishoruno: enkolong nabo eng'or sabato o enkolong e sabato o te nteipa o sirua lo lapa ng'ejuk o osirua kewan o siruai pooki o ooyeng'iyeng'are iltung'ana le Israel.

⁷Enkitok sidai oleng apa Yudit. Netungueikia olpayian lenye saabu o enkosholai o sinkan o irrindiki o inkishu o inkurman. Neramat ninye Yudit imasaa enyena.

⁸Nemeetae obo oiroro embae torrono napirta Yudit amu enkitok naure ne serem Enkai ninye.

⁹Nening Yudit enking'unyung'uny oo ltung'ana te nkaraki Usia, amu meetae enkare netalepori iltung'ana to lkirutoto. Nenig ajo ore ewalata eilo ong'unyung'unyi naa keisho Usia Asiria ina anasa tenelusoo inkolong'i imiet.

¹⁰Neirriwaa Yudit errindik enye, enkitok naitasheiki enkaji enye, meitoomono Usia, Kabris o Karmis, ilkituaak le nkanasa meetu enkaji enye.

¹¹Ore pee ebau ilkituaak, nejoki Yudit ninche, “Atasayia intae entoning'oki nanu. Intae ilarikok le Betulia, inyala aairorie iltung'ana anaa enitaasa taata. Anaata eitu inyanya olmumai te dukuya Enkai aajo inchooyoyo enkanasa aaisho ilmang'ati nemeretu intae Olaitoriani too inkuti olongi naapuonu.

¹²Kaa sipata iyatata pee itemiteme Enkai anaa enitaasa taata? Irara ng'ae pee intaa ate Enkai too mbaa naaipirta Iltung'ana?

¹³Olaitoriani magilani igirara aatem! Eming'enunu intae?

¹⁴Meeta eninkoko pee iyolouu enatii enguton oltau le tung'ana aashu enagira adamu oltung'ani. Naa ijojo intae matujur eng'eno Enkai! Kaji inkoko pee ijojo iyiololo indamunot Enkai Aitaani le kuna tokiting pooki? Aa, ilchoreta laainei, emintokiki aaitagor Olaitoriani Enkai ang!

¹⁵Ore teneany elotu Enkai aret iyiook tiatua inkolong'i imiet, keidim atareto iyiook te rishata enye. Aashu eisho ilmang'ati metumuta iyiook.

¹⁶Kake emipikaki Enkai iloketa! Ijojo intae etiu ninye anaa obo lang? Ijojo indimidimi ntae aaishankarrare Enkai aashu isimakiki metudung'o enkiguana?

¹⁷A'a, ekiomon ninye eretoto nikirreshu ninye te mborron metasaru iyiook. Ore teneyieu naa kening olkiyoi lang neretu.

¹⁸Mikiserem iyiook inkaitin naaitobiru inkaik oo ltung'ana. Metii ninye obo lo olgilata lang, aashu lo losho aashu le nkanasa otaasa ina, hoo naa nejia naarri eas iloo kakuyiaa.

¹⁹Ina pee eishoo Enkai ilmang'ati metaara ninche, neya pooki toki naata. Emirata sapuk oleng ina!

²⁰Kake ore amu mikiserem iyiook ai Ai neme Olaitoriani, kisilig aajo meany iyiook aashu likai ake lo losho lang.

²¹“Teneya ilmang'ati inkanas ang, naa keimin olkerreti pooki le Yuda, naa keinyali Enkaji Enkai te Yerusalem. Naa ekilak te nkishui ina nikinchoo enkaji e Nkai meidurukieki.

²²Keaku shumata iyiook etii keeya o enkibung'ata oo iltung'ana lang o enchurtata e nkop nikitujung'o. Kemenu iyiook iltung'ana le nena kuapi naaya iyiook anaa irrindiki.

²³Mikitum omom too inkonyek oo ilman'gati lang tinikincho metimira yiook tena kata. Tinikincho metimira yiook, neitukurru iyiook Olaitoriani Enkai ang.

²⁴“Lo shoreta laainei, mataa enkitanyaayukoto too iltung'ana le nkop ang amu ore enkishui enye naa inkaik ang etii naa yiook eisiligita enkaji e Nkai o lperere.

²⁵Iyiook epikita Olaitoriani Enkai entemata, anaa enatetema apa loo kakuyia, naa kenarikino nikishukoki enashe teina.

²⁶Entadamu enaitaasa Abraham o Isaak pee etem, o enataase te Yakobo easisho anaa olchekut lo le nkapu lenye Laban te Mesopotamia.

²⁷Megira Enkai atem esupatisho ang te ngolon anaa enatetema ninche. Eitu erriu Enkai enakitamioto anaa enkitalakunoto e lap, kake kegira aikok yook iloo seremita ninche.”

²⁸Newaliki Usia, Yudit nejoki, “Ore pooki toki nitejo naa kesipa nemeeta obo oishankarru.

²⁹Mme erishata e dukuya ena pee eliooyu eng'eno ino. Ore apa aiteru ira enkerai netoduaa pooki ng'ae eng'eno o ening'unoto ino.

³⁰Kake egira iltung'ana lang aaye te nkaraki enkure. Neisimakita iyiook mataasaki ninche inena nikisiligie neisho iyiook mainosa olmumai limikindim aatigil.

³¹Ore amu ira enkitok aseremani oleng, toomonoki iltung'ana lang pee eirriwaki iyiook Olaitoriani enchan neiput inkariak ilturot lang, pee mikintoki aashalu te nkaraki enkure.”

³²Newaliki Yudit ajoki, “Kalo aas entoki nemerikino Ilyahudi too lporori pooki le ishoi ang.

³³Ore ena kewarie, entorrip kishomi e nkanasa, kalo nanu o errindik ai. Ore tiatua nena olong'i nisiligie aajo ichosho enkanasa ilmang'ati lang naa kesaru Olaitoriani Israel te nkaina ai.

³⁴Kake minkilikuanunu ajo kainyoo aasita amu maliki intae omaidipa ina naas.”

³⁵Nejoki Usia o ilkulikai kituaak, “Shomo te seriani. Inchoo kirikoo Olaitoriani Enkai iloito aitalaku elap too ilmang'ati lang.”

³⁶Neshuko aing'uaa ilng'obori nepuo manyishoritin enye.