Read Maasai Bible – Biblia Sinyati Yudit 9 Bible Online

Yudit 9 - Maasai Bible – Biblia Sinyati bible

Yudit 9

¹Neelie Yudit inkuruon elukunya enye, nebol ilkilani lenyena neitodolu ilkuniyiani ooishopo tiatua ilkilani, neirugo aikorea enkomom olpura. Erishata apa ina enteipa naitayuyeki enkorropil te enkaji e Nkai te Yerusalem, neomon Yudit toltoilo sapuk:

²“Iyie Olaitoriani, Enkai e kakuyia lai Simon, tadamu nareta nintanapa Simon o lalem pee elo aitalaku elap lelo loo nkuapi ooibung'a Dina eselenkei nemeyiolo apa ninye olee, neng'er inkilani enyena neikony ninye; eitayutuo inkilani enyena pooki neitukurru ninye; neikony ninye neidurukie ninye, hoo nitomito apa kuna.

³Inaa pee inchoo larikok lenye metari, metuata teina kirragata naikonyie entito. Encurtatie ninye pooki, irrindiki, o ilkituaak o laitoriak le enkop pooki te nkitoo enye.

⁴Eichoo kituak enye eyae, entoyie eyae anaa irrindiki, o masaa enye pooki neyaa Siraeli, iltung'ana linono litegelua, laa ninye apa oyeu neas esiaai ino. Etagorote ilalashera Dina te nkaraki ena amu ataa esulare to marei lenye, neaku kimpoto pee aretu. “Iyie Enkai ai, toningo enkomon ai, enkomono enkoliai.

⁵Etorikoiyie enkaina ino nena pooki naataasatese, onena pooki naatase te dukuya o tesiadi. Iyie nkitobirat onena pooki, kaiyoo nagiraa aasayu tenakata, onena neitu. Ore nkitobirat inono nakeasayu.

⁶Ore pooki kitok niyou neasayu netiu anaa etaase. Eyolo iyie te dukuya oleng pooki naasayu o ndung'ot neas.

⁷Ore taata kegoli Asiria oleng, keng'idare ingarrin oo mbartan o loo kedito o imbartan, keisilig ninche imasaa enye, meyiolo ninche aajo iyie olaitoriani nira olmurani oishu olarabal. Olaitoriani enkarna ino.

⁸Ore tengoro ino, tasishore engolon ino agil ina jore magilani enye. Kejo pee eidurukie enkaji ino, ine nikiseremieki pee egil inkutot olperere to lalema.

⁹Ing'ura siye engida o lwuasa lenye! Tubukoki engoro ino! Kara nanu enkoliai, kake inchooki engolon naasie induaat aainei.

¹⁰Taasishore rorei le lejare ai aar metuata irrindiki o ilkituaak lenye. Inchoo engolon enkitok egil engida enye.

¹¹Ore engolon ino neme te nkaraki esapuko o engolon enjore. Ira iyie Enkai naramat lelo oobor niretu lelo oironyaki. Inchoo enkoriong nirrip lelo tung'ana ooshali nemeeta enkidimata; Nikordu sii lelo ooiminie osiligi.

¹²Toning'o enkomon ai, Iyie Enkai e kakuyia lai Simon, Enkai naa ninye eisilig Israel, oloitore shumata o enkop, oitobirua ilkejek o naaiposha, olaiguanani oitobirua pooki toki. Tonigo enkomono ai

¹³inchoo irorei laainei le lejare epik ilbaa near lelo pooki oitobira ina torroni neinyala osotua lino, le enkaji e Nkai, o Oldoinyo le Sion o enkop ninchoo iltung'ana linono.

¹⁴Intaa kuapi pooki o Iloshon kiyolou ajo ira Enkai, oata engolon nira magilani, naa iyie ake orrip iltung'ana le Israel!”