Read Maasai Bible – Biblia Sinyati Enaidurra 1 Bible Online

Enaidurra 1 - Maasai Bible – Biblia Sinyati bible

Enaidurra 1

¹Kuna inkarn oo layiok le Yakobo ooetuo apa Misiri te nebo ninye, oltung'ani ake o lmarei lenye:

²Ruben o Simion o Lawi o Yuda,

³Isakar o Sebulon o Benchamen,

⁴Dan o Naftali, Gad o Asheri.

⁵Ore eishoi pooki e Yakobo naa iltung'ana ntomoni naapishana, netii Yosef apa laa obo lenye ina kata Misiri.

⁶Neye Yosef o lalashera lenyena pooki o ina ishoi pooki.

⁷Kake ore apa eishoi e Israel naa kebul oleng neponari aaku kumok; neponari ninche neaku olosho ogol; neiput ina kop.

⁸Neitokini aaput likae aiguanani te Misiri lemeyiolo Yosef.

⁹Nejoki ninye iltung'ana lenyena, “Eng'ura ajo aikumok oleng iltung'ana loo Siraeli, negoli oleng te iyiook.

¹⁰Wootu maing'uraki ninche olosek, pee mebul ake, pee te nelo ake nikitum olarrabal, neibung'are ilmang'ati lang neing'ar iyiook neisik te nkop ang.”

¹¹Negeluni ilaitasheikinok ooitasheiki ninche pee eisilisil ninche te sinkaisho nagol oleng; neshetaki Farao nkanas naashumishoreki naaji Pisom o Ramases.

¹²Kake ore anaa enaibookini ninche enkop, neponari neidapashakino aaiput enkop. Neiput enkuretisho iltung'ana le Misiri neureyu Isiraeli oleng.

¹³Neaku keisho ninche iltung'ana loo Siraeli meisiaaisho to sina sapuk.

¹⁴Nepik enkishui enye emion te sinkaisho nagol anaa enchetare nagol oo nkajijik oo soito o too mpukunot pooki e siaai ti ong'ata; ore too siaaitin enye pooki neisho ninche meisiaaisho te sinkaisho nagol oleng.

¹⁵Neitoki ilo aiguanani le Misiri ajoki inkaitoyiok oo Lbrania, aa keji nabo Shifra neji enkae Pua,

¹⁶“Ti nintoishosho nkituaak oo Lbrania nidolidolo ina kata eisho, tenaa enkayioni niariara ninye metua; kake tenaa entito enchoo eton eishu.”

¹⁷Kake keure apa nena aitoyiok Enkai, neitu eas anaa enaitanapa ninche olaiguanani le Misiri, kake eishoo inkayiok etoni eishu.

¹⁸Metaa eipoto olaiguanani le Misiri nena aitoyiok, nejoki ninche, “Kainyoo pee itaasa ena, ninchosho nkayiok eishu?”

¹⁹Nejoki nena aitoyiok Farao, “Te nkaraki nemetiu inkituaak oo Lbrania anaa inkituaak oo Lmisiri; amu kegol inkituaak oo Lbrania oishuaa, naa keisho eton eitu ebau enkaitoyioni.”

²⁰Neitaas Enkai esidai nena aitoyiok; neponari iltung'ana loo Siraeli aagolu neaku kumok oleng.

²¹Ore te nkaraki naure nena aitoyiok Enkai neisho ninche ilmareita.

²²Neitoki Farao aitanap iltung'ana lenyena pooki ajo, “Ore pooki ayioni naini too Lbrania ninang'akiki olkeju oji Nail, kake enchoo intoyie eishu.”