Read Maasai Bible – Biblia Sinyati Enaidurra 10 Bible Online

Enaidurra 10 - Maasai Bible – Biblia Sinyati bible

Enaidurra 10

¹Neitoki Olaitoriani ajoki Musa, “Tijing'aki Farao; amu aitagolo oltau lenye o oltau loo laisiaayiak lenyena, peyie atum aitoduaai kuna kitoduaat aainei enking'asia nataasa tiatua ninche,

²peyie itum aitoning'o olayioni lino o layioni lo layioni lino enaikuna peyie aitomod Ilmisiri too nkitoduaat aainei enking'asia nataasa tiatua ninche; peyie iyiolouu nchere kara nanu Olaitoriani.”

³Nelo Musa o Aron atua ine netii Farao, nejoki ninye, “Nji ejo Olaitoriani, Enkai oo Lbrania, ‘Iany kenya o anu intobor kewan te dukuya nanu? Nchoo iltung'ana laainei epuo, peyie aatum aaisiaayia nanu.

⁴Amu ti nimitiki iltung'ana laainei epuo, ore taaisere nayau ilmaat atua enkop ino,

⁵naa keitoip oriong e nkop, metaa metii hoo oltung'ani obo oidim atoduaa enkop; nenya ina nikitelekakaki te nchan oo soito, naa kenya pooki shani lino onyori obulu ti ong'ata,

⁶naa keiput inkajijik inono, o nkajijik oo laisiaayiak linono pooki o noo Lmisiri pooki; te nkoitoi neitu aekata edol iloo papaai linyi o loo nkakuyiaa linyi, ebaiki apa peyie epuonu oriong e nkop ometabaiki taata.’ ” Neibelekenya ninye neipang aing'uaa Farao.

⁷Nejoki ilaisiaayiak le Farao ninye, “Keaku kenya ele tung'ani orreshet te iyiook o anu? Enchoo kulo tung'ana epuo, peyie etum aaisiaayia Olaitoriani Enkai enye; keton ake midol ajo etarruoyie Misiri?”

⁸Neshukuni Musa o Aron meetu enetii Farao; nejoki ninye ninche, “Enchom esiaayia Olaitoriani Enkai inyi; kake kakua oopuo?”

⁹Nejo Musa, “Eikipuo iyiook o elelero ang o enkitoo ang; eikipuo iyiook o layiok lang o ntoyie ang o ntare ang o nchoo ang amu meeta inchere mikintaiki Olaitoriani osirua.”

¹⁰Nejoki ninye ninche, “Metaa Olaitoriani te nebo o ntae tenaa kaisho aekata ntae o nkera inyi enchom! Ng'ura ajo iatata nkitobirat torrok too ndamunot inyi.

¹¹A'a! Enchom ilewa ake, esiaayia Olaitoriani, amu ina iyieuu.” Nerrumori ninche aaitung'uaa ine netii Farao.

¹²Neitoki Olaitoriani ajoki Musa, “Ntorioi enkaina ino ti oriong enkop e Misiri te nkaraki ilmaat, peyie epuonu oriong e nkop e Misiri, nenya pooki aitubului te nkop, pooki toki natung'uayie enchan oo soito.”

¹³Neitorioo Musa eng'udi enye ti oriong e nkop e Misiri, neyau Olaitoriani olkutati le nkilepunoto e nkolong ina kop endama pooki o ina kewarie pooki; ore ake peyie ekenyu eyaua duoo olkutati le nkilepunoto e nkolong ilmaat.

¹⁴Nepuonu ilmaat oriong enkop pooki e Misiri, neton te nkop pooki e Misiri, emus sapuk oleng o lmaat neitu aekata etumi nemeitokini aekata aatum.

¹⁵Amu eitoipo oriong e nkop pooki, neaku eitomisimisoki enkop, nenya ninche pooki aitubului te nkop o pooki ng'anayioi loo lkeek otelekua enchan oo soito; eitu eleku hoo toki nabo nanyori, mme olchani neme enkaitubului e ong'ata, te nkop pooki e Misiri.

¹⁶Neitoki Farao aipot Musa o Aron te siokinoto nejo “Ataasa eng'oki to Laitoriani Enkai inyi o te ntae.

¹⁷Ore naa taata entapalakaki eng'oki ai, atoomono ntae, ena kata ake, nikiomonokiki to Laitoriani Enkai inyi peyie eiwuang'ie ake ninye ena keeya te nanu.”

¹⁸Neipang alo aing'uaa Farao neomon Olaitoriani.

¹⁹Neibelekeny Olaitoriani olkutati te ndoyioroto e nkolong o laa ninye otudumua ilmaat neya arrumoki atua Enaiposha Nanyokie; eitu ninye eing'uari olmaati obo te nkop pooki e Misiri.

²⁰Kake eitagolo Olaitoriani oltau le Farao, neitu ninye eisho inkera oo Isiraeli epuo.

²¹Neitoki Olaitoriani ajoki Musa, “Ntorioi enkaina ino ing'orie shumata peyie ejing enaimin enkop e Misiri, enaimin narok ong'u.”

²²Neitorioo Musa enkaina enye aing'orie keper nejing enaimin sapuk atua enkop e Misiri nkolong'i uni;

²³neitu ninche eduaa maate neitu edumunye hoo ng'ae te wueji enye too nkolong'i uni; kake eeta iltung'ana loo Siraeli pooki ewang'an teine nemanya ninche.

²⁴Neitoki Farao aipot Musa nejo, “Enchom esiaayia Olaitoriani; eidim sii nkera inyi aashom te nebo intae; enchoo ake metaa nkerrai inyi o nchoo inyi eing'uari.”

²⁵Kake etejo Musa, “Meeta nchere peyie mincho iyiook maitayu ilasarri o nkishoorot naapejori, peyie kipolosaki Olaitoriani Enkai ang.

²⁶Ekepuo sii nkishu ang te nebo iyiook; meing'uari ninye oloisotoo, amu eikiya ninche peyie kipuo aaisiai Olaitoriani Enkai ang, nimikiyiolo aajo kainyoo kisiaayie Olaitoriani o metaba anaa nikibaya ine.”

²⁷Kake eitagolo Olaitoriani Farao oltau, neitu eisho ninche meshomo.

²⁸Nejoki Farao Musa, “Shomo tung'uayioki, toduaa kewan mikingil aekata adol enkomom ai; amu ore kenya enkolong nidol enkomom ai niye.”

²⁹Nejo Musa, “Anaa enitejo! Maigil adol enkomom ino.”