Read Maasai Bible – Biblia Sinyati Enaidurra 11 Bible Online

Enaidurra 11 - Maasai Bible – Biblia Sinyati bible

Enaidurra 11

¹Nejoki Olaitoriani Musa, “Eng'or olmeitai obo layaki Farao o Misiri; ore te siadi naa keisho ninye ntae enchom, te neisho ntae enchom naa kearaa ntae enchom katukul.

²Iroro naa taata metoning'o iltung'ana, peyie eomonu pooki lee to lelatia enye, o pooki kitok ene latia enye ilgiso le nkosholai o saabu.”

³Neisho Olaitoriani omom iltung'ana too nkonyek oo Lmisiri. Ore sii ele tung'ani oji Musa naa eikitok apa oleng te nkop e Misiri te dukuya ilaisiaayiak le Farao o te dukuya iltung'ana.

⁴Nejo Musa, “Nji ejo Olaitoriani: Ore tenenyiku empolos e nkewarie naa Kalo olo tiatua enkop e Misiri.

⁵Ore ilkikaunot pooki tiatua enkop e Misiri naa keye, ebaiki ilo kikau le Farao otonita to lorika lenye le nkitoo o metabaiki olkikau le ina sinka natii oriong ine neidong'ieki, enkurma o lkikaunot pooki loo nkishu.

⁶Naa keaku olkiyioi sapuk tiatua enkop pooki e Misiri, leitu aekata eaku nemeitoki aekata aaku.

⁷Kake ore te pooki ng'ae too ltung'ana loo Siraeli aa oltung'ani aashu ing'uesi, mebuaaki ninye oldia ninche; peyie itumutumu aatayiolo nchere keor arishu Olaitoriani Ilmisiri o Siraeli.

⁸Ore kulo aisiaayiak linono pooki naa kedou aapuonu enatii, naairrugokino nanu ejo, ‘Tupuku iyie, o ltung'ana pooki likisujita iyie.’ Ore te siadi ina napuku nanu.” Neipang Musa aing'uaa Farao te ngoro sapuk.

⁹Neitoki Olaitoriani ajoki Musa, “Mikining Farao iyie; peyie eponari nena enking'asia aainei tiatua enkop e Misiri.”

¹⁰Neas Musa o Aron kuna pooki e nking'asia te dukuya Farao. Neitagol Olaitoriani oltau le Farao, neitu ninye eisho iltung'ana loo Siraeli meshomo aaipang te nkop enye.