Read Maasai Bible – Biblia Sinyati Enaidurra 13 Bible Online

Enaidurra 13 - Maasai Bible – Biblia Sinyati bible

Enaidurra 13

¹Nejoki Olaitoriani Musa, “Nteng'elakaki nanu ilkikaunot pooki;

²ore pooki kikau tiatua Siraeli to ltung'ani o te ng'ues naa olalai.”

³Nejoki Musa iltung'ana, “Entadamu ena olong; naa ninye apa itupukunye aaing'uaa Misiri, aaing'uaa enkop e sinkaisho, amu te ngolon e nkaina eitayio ntae Olaitoriani aaitung'uaa ene wueji; meinosi emukate naisuishieki.

⁴Ipuopuo intae ena olong to lapa le Abibu.

⁵Ore ake te neyau intae Olaitoriani atua enkop oo Lkanaani o Ilhiti o Ilamori o Ilhifi o Lyebusi, apa nainosa olmumai too loo papaai linyi pee eisho intae enkop naruko kule o enaisho nimbung'ubung'u ena kisiaayiare tele apa.

⁶Too nkolong'i naapishana inyanya imukateni neitu eisuishieki, ore te nkolong e naapishana neaku osirua to Laitoriani.

⁷Imukateni neitu eisuishieki einosi too nkolong'i naapishana; medoli emukate naisuishieki te ntae, nemedoli emukate naisuishieki te nkop inyi.

⁸Nijoki kenya olayioni lino teina olong te nkaraki e ina naaitaasa nanu Olaitoriani apa pee apuku aing'uaa Misiri.

⁹Naa ketiu te iyie anaa enkitoduaata te nkaina ino netiu anaa endamunoto te rishata oo nkonyek inono, pee etum enkitanapata o Laitoriani atijing'a enkutuk ino; amu te nkaina nagol kiyaua iyie Olaitoriani aitung'uaa Misiri.

¹⁰Metaa imbunga naa ena kitanapata te nkata enye nageluno te pooki ari.

¹¹“Ore kenya ti nikiyau Olaitoriani enkop oo Lkanaani, anaa enainosa olmumai te iyie o too loo papaai linyi, naa eikincho iyie.

¹²Ninteng'el iyie te nkaraki Olaitoriani nena pooki kikaunot. Ore ilkikaunot pooki loo nkishu inono oora ilbung'aiko, neaku ilo Laitoriani.

¹³Ore olkurrarru pooki le sikiria ong'asi aaiu, nelakuni to sitima le ker, naa te nimilaku iyie ninye niburukush emurt enye. Ore olkikau pooki loo layiok linyi nilaku.

¹⁴Ore te nkata nalotu te nikinkilikuan olayioni lino, ajoki, ‘Kainyoo doi eutu ena?’ Nijoki iyie ninye, ‘Te ngolon e nkaina eyaua iyiook Olaitoriani aitupuku te Misiri, aitung'uaa enkop e sinkaisho.

¹⁵Amu ore apa pee eany Farao te ngolong'u eisho iyiook maape near Olaitoriani ilkikaunot pooki te nkop e Misiri, olkikau lo ltung'ani o le nkiteng. Metaa kapolosaki Olaitoriani ilbung'aiko pooki kikaunot; kake ore ilkikaunot pooki loo layiok laainei nawalu.’

¹⁶Naa keaku olmishire te nkaina ino aashu te rishata oo nkonyek inono, amu te nkaina nagol eyaua iyiook Olaitoriani aitung'uaa Misiri.”

¹⁷Ore apa pee eisho Farao iltung'ana meshomo, neitu erikoo Enkai ninche aimie nkoitoi e nkop oo Filistia, hoo naa ina apa nataana; amu etejo, “Mayieu neibelekenya iltung'ana te nedol olarrabal, neshuko aapuo Misiri.”

¹⁸Kake etorikoyie Enkai iltung'ana aitamanaa te nkoitoi o lpurkel aing'orie Enaiposha Nanyokie. Neilepu iltung'ana loo Siraeli aaipang'u te nkop e Misiri eterretenate to larrabal.

¹⁹Neya Musa iloik lo sesen le Yosef te nebo ninye, amu eitayio apa Yosef enkutuk nenya olmumai too ltung'ana loo Siraeli, ejo, “Kebaiki intae Enkai; naa eiyaya intae iloik laainei te nebo intae aaitung'uaa Misiri.”

²⁰Nedumunye ninche te Sukot neitayu ilng'oborri te Esam, te bayie o lpurkel.

²¹Nelo Olaitoriani dukuya ninche dama te nkatampoi naikununo anaa eng'ape pee erikoo ninche te nkoitoi, ore te nkewarie naa te nkima naikununo anaa eng'ape pee eitawang'aki ninche, pee etum aashom dama o kewarie.

²²Ore ina atampoi neikununo anaa eng'ape te ndama o enkima naikununo anaa eng'ape te nkewarie neitu eiwuang te dukuya iltung'ana.