Read Maasai Bible – Biblia Sinyati Enaidurra 14 Bible Online

Enaidurra 14 - Maasai Bible – Biblia Sinyati bible

Enaidurra 14

¹Neitoki Olaitoriani ajoki Musa,

²“Tiaaki iltung'ana loo Siraeli metushukoto siadi aapik ilng'oborri dukuya e Pi-ha-hirot, erishata e Migdol o enaiposha, dukuya e Baal-sefon; enteshet ilng'oborri empirie embata e naiposha.

³Amu kejo ninye Farao tialo iltung'ana loo Siraeli, ‘Eibookoki ninche atua ina kop eibooyie ninche olpurkel.’

⁴Naa kaitagol nanu oltau le Farao, naa kesujaa ninche natum enkisisa te Farao o te njore enye pooki; naa keyiolou Ilmisiri aajo kara nanu Olaitoriani.” Neiko ninche neijia.

⁵Ore ake pee elikini olaiguanani le Misiri aajoki eisika iltung'ana, neibelekenya endamunoto e Farao o enoo laisiaayiak lenyena tialo iltung'ana, nejo ninche, “Kainyoo ena nikitaasa nchere kinchoo Siraeli meshomo meekure esiaai iyiook?”

⁶Neitobir ninye engarri enye oo mbartan nedumu enjore enye,

⁷neya ingarrin oo mbartan naageluno iip ile o kulie garrin oo mbartan e Misiri ekedito ilkituaak ninche pooki.

⁸Neitagol Olaitoriani oltau le Farao olaiguanani le Misiri nesujaa ninye iltung'ana loo Siraeli ooisula aapuku te ng'olong'u.

⁹Nesujaa Ilmisiri ninche, mbartan pooki e Farao o ngarrin oo mbartan o lakedok loo mbartan o enjore enye, neinepu ninche too lng'oborri te mbata e naiposha, te mbata e Pi-ha-hirot, te dukuya e Baal-sefon.

¹⁰Ore ake pee enyiku Farao, neraposhu iltung'ana loo Siraeli nkonyek enye, nedol epuonu Ilmisiri te siadi ninche; neureishoyu oleng. Neishiraki iltung'ana loo Siraeli Olaitoriani;

¹¹nejoki ninche Musa, “Te nkaraki nemetii nkuraren Misiri pee iyaua iyiook matuata to lpurkel? Kainyoo intaasa iyiook iyaua iyiook aitung'uaa Misiri?

¹²Aime ena apa kitiaakita iyie te Misiri, ‘Tapala iyiook naa nchoo maisiaayia Ilmisiri?’ Amu enaikash apa te iyiook ti nikisiai Ilmisiri alang ti nikiye to lpurkel.”

¹³Nejoki Musa iltung'ana, “Emiureishoyu, entashoito tukul, metii olng'ash pee idolidolo enjeunoto o Laitoriani, naitobiraki ninye ntae taata; amu ore kulo Misiri lidolitata taata, mintokiki ae kata aadol.

¹⁴Kemitu intae Olaitoriani, metaa entirring'ata.”

¹⁵Nejoki Olaitoriani Musa, “Kainyoo pee kinchiraki nanu? Tiaaki iltung'ana loo Siraeli meshomo dukuya.

¹⁶Tudumu ilepie eng'udi ino, nintorioo enkaina ino te shumata enaiposha tooro, pee etum iltung'ana loo Siraeli aashom te nkop natoyio te mpolos e naiposha.

¹⁷Naa kaitagol iltauja loo Lmisiri pee epuo atua aasujaa ninche, naa katum enkitoo te Farao o te njore enye pooki, too ngarrin oo mbartan oo too lakedok loo mbartan.

¹⁸Neyiolou Ilmisiri aajo, kara nanu Olaitoriani, te naidip nanu anoto enkitoo te Farao, too ngarrin oo mbartan o too lakedok loo mbartan.”

¹⁹Neitoki olmalaika le Nkai apa orikito te dukuya e njore oo Siraeli aiwuang'a nelo siadi ninche; ore ina atampoi naikununo anaa eng'ape neiwuang'a te dukuya ninche neitashe te siadi ninche

²⁰alotu te rishata e njore e Misiri o enjore oo Siraeli. Netii ina atampoi o enaimin; nelusoo enkewarie meetae enaewuo anyikaki enkae enkewarie pooki.

²¹Neitorioo Musa enkaina enye te shumata enaiposha; nereu Olaitoriani enaiposha siadi to siwuo ogol le nkilepunoto e nkolong e nkewarie pooki, neitaa enaiposha enkop natoyio, neoro nkariak.

²²Nepuo iltung'ana loo Siraeli tiatua empolos e naiposha aaim enkop natoyio, etaa nkariak esuntai te ninche te nkaina e tatene o te kedianye.

²³Nesujaa Ilmisiri, nepuo atua emirita ninche nepuo empolos e naiposha, mbartan pooki e Farao, ngarrin oo mbartan enyena o lakedok lenyena loo mbartan.

²⁴Ore tadekenya enasirie neing'or Olaitoriani tiatua ina kima naikununo anaa eng'ape o ina atampoi enjore o Lmisiri neisirng'ang'ie enjore oo Lmisiri,

²⁵aun inkejek oo ngarrin enye metupurpurrito te lototo; nejo Ilmisiri, “Emaisika te dukuya Siraeli; amu kemitu ninche Olaitoriani aing'arraki Ilmisiri.”

²⁶Neitoki Olaitoriani ajoki Musa, “Ntorioi enkaina ino te shumata enaiposha, pee eshukunye enkare shumata Ilmisiri o shumata ingarrin enye oo mbartan o shumata ilakedok lenye loo mbartan.”

²⁷Neitorioo Musa enkaina enye te shumata enaiposha, neshukunye enaiposha enoshi ake kirragata enye emanaa enkakenya; nejo Ilmisiri maisika aailany enkare kake eibooko ninche Olaitoriani empolos enaiposha.

²⁸Neshukunye inkariak neimisie ingarrin oo mbartan o lakedok loo mbartan o ina jore pooki e Farao, natusujaka ninche atua enaiposha; eitu ninye eleku obo lenye.

²⁹Kake eshomo iltung'ana loo Siraeli te nkop natoyio te mpolos e naiposha, etaa nkariak esuntai te ninche te nkaina enye e tatene o te kedianye.

³⁰Neiko neijia Olaitoriani aitajeu Isiraeli ina olong too nkaik oo Lmisiri; nedol Isiraeli Ilmisiri etuata te mbata e naiposha.

³¹Nedol Isiraeli esiaai sapuk naitaasa Olaitoriani Ilmisiri, neureyu iltung'ana Olaitoriani; neiruk ninche Olaitoriani o osinka lenye Musa.