Read Maasai Bible – Biblia Sinyati Enaidurra 2 Bible Online

Enaidurra 2 - Maasai Bible – Biblia Sinyati bible

Enaidurra 2

¹Nelo oltung'ani obo le nkaji e Lawi ayam entito e Lawi.

²Nenutayu ina kitok neiu enkayioni, ore ake pee edol ajo enkerai sidai, neisudoo ninye ilapaitin okuni.

³Ore ake pee eaku meekure eisudoroyu, neshetaki ninye enkikapu naitobiraki too seyia nemur te ntoki naji laam; nepik ninye enkerai atua paa kepik ina kikapu atua iseyia te mbata o lkeju.

⁴Neitashe enkanashe enye te nelakua, pee eyiolou enaitaasi ninye.

⁵Ore ina kata ake nelotu entito e Farao adou aisuja to lkeju, nepuonu nkaisiaayiak enyena te mbata o lkeju; nedol ninye enkikapu tiatua iseyia, neirriwaa enkaisiaayiani enye meyau.

⁶Ore ake pee ebol nedol enkerai, neishirita ina kerai. Neing'urrie ninye nejo, “Enoo nkera oo Lbrania ena kerai.”

⁷Nejoki enkanashe eina looyo entito e Farao, “Aalo aipotoki enkaibung'ani too nkituaak oo Lbrania pee kintubulaki ena kerai?”

⁸Nejoki entito e Farao ninye, “Shomo.” Nelo entito aipotu ng'otonye ina kerai.

⁹Nejoki entito e Farao ninye, “Iwa ina kerai, pee kintubulaki nanu, naa kaaisho nanu olekoisiaayio lino.” Neya ina kitok enkerai aitubulu.

¹⁰Nebulu ina kerai, neyau ninye ayaki entito e Farao, neaku ninye olayioni lenye, neipot enkarna enye ajo Musa, amu etejo, “Te nkaraki naitayio ninye tiatua enkare.”

¹¹ Ore nabo olong, etubulua Musa, neipang alo enetii iltung'ana lenyena nedol enkiroishi e siaai nagol naasita. Neitoki adol Olmisiri earita Olbruaniai, obo loo ltung'ana lenyena.

¹²Neing'oring'orisho, ore ake pee edol ajo melio oltung'ani hoo obo, near ninye ilo Misiri metua nenukaa tiatua osinyai.

¹³Ore pee eitoki aipang likae kekun, nedol Ilbrania aare oopupung'a aara; nejoki ninye ilo tung'ani oitarruoyie, “Kainyoo pee iar oltung'ani lo lorere lino?”

¹⁴Nejoki ilo tung'ani ninye, “Kaing'ae likintaa iyie olkitok o larishani te iyiook? Ijo pee kiar nanu matua anaa enitaara Olmisiri metua?” Neirut Musa, nejo, “Esipa etayioloki ena bae.”

¹⁵Ore pee ening Farao ina, neing'oru pee ear Musa metua. Kake eisika Musa ailany Farao, nebik te nkop e Midian neton te mbata e nchorro.

¹⁶Etii apa olapolosani le Midian oata ntoyie naapishana, nepuonu aaoku enkare neiput impeuti pee eitook ntare e menye.

¹⁷Nepuonu ilairritak loontare aaraa ninche, kake eitasho Musa aretu ninche, neitook ntare enye.

¹⁸Ore ake pee epuonu ninche enetii menye lenye Reul, nejoki ninye ninche, “Kaji taata eikununo pee ietuo aasieku?”

¹⁹Nejo ninche, “Olmisiri oitajewuo iyiook too nkaik oo lchekuti o metooku ninye enkare neitook ntare.”

²⁰Nejoki menye nena toyie enyena, “Paa kaji etii ninye? Kainyoo pee itung'uaitie ilo tung'ani? Empoto ninye pee elotu anya endaa.”

²¹Nenyorraa Musa aton te nebo ilo tung'ani, neisho ninye Musa entito enye naji Sipora.

²²Neiki ninye enkayioni, nejo ninye enkarna enye Gershom, amu etejo ninye, “Kara olomoni te nkop neme enaai.”

²³Ore etulusoitie ilarin ooikash, neye ilo aiguanani le Misiri. Neton ake eisomita iltung'ana loo Siraeli te sinkaisho enye, neyietu aaishiru eretoto; ore ilo kiyioi lenye le sinkaisho neilep enetii Enkai.

²⁴Nening Enkai ilo somit lenye, nedamu Enkai olning'o lenye lo sotua o Abraham o Isaak o tenebo Yakobo.

²⁵Nedol Enkai iltung'ana le Israel, neyiolou Enkai empukunoto enye.