Read Maasai Bible – Biblia Sinyati Enaidurra 26 Bible Online

Enaidurra 26 - Maasai Bible – Biblia Sinyati bible

Enaidurra 26

¹“Ore ake tenebo nena intobira olng'obor le Nkai too lkarash le kitani oopuyiapui tomon, ilpusi o lmorijo o lpilei, neripakini ilkerubi te nkarriayiano oleng.

²Ore enkadoro, e pooki karasha nchoo eaku intemat tikitam o isiet enkadoro, ore endapasho e pooki karasha naa intemat ong'uan endapasho. Nerisioroyu ilkarash pooki.

³Nchoo eripi ilkarash imiet aaibung'ie te nebo, neitokini aarip aaibung'ie ilkarash imiet te nebo.

⁴Intayu ilgoso loo nkopit pusi loo nkarash te matua e oriong e lelo karash te ntukus e dukuya. Nintoki ake aiko neijia, aitayu ilkiintani pusi loo nkarash te matua e oriong e ina tukus e are.

⁵Ilkiintani onom intayu te ntukus nabo oo lkarash, nintoki aitayu ilkiintani onom te matua e oriong e ina tukus e are oo lkarash; ore lelo goso nchoo eipira.

⁶Intayu ilala onom le saabu oololo paa ninche intutumie entukus oo lkarash o enkae pee eaku enkaji e Nkai entoki nabo.

⁷“Intobira sii nkilani oo lpapit loo nkineji naaitushur olng'obor; ntobira nkilani tomon o obo.

⁸Ore enkadoro e pooki kila naa intemat tomoni uni enkadoro naa intemat ong'uan endapasho; ore nena kilani pokira tomon o obo nerisioroyu.

⁹Nintutum ilkarash imiet te nebo, o nkilani ile te nebo, ore enkila e ile nipud te shumata te mbata e kutuk aji najing'ieki olng'obor.

¹⁰Nintayu ilkiintani onom te matua e nkila ti oriong e ntukus nabo, o lkiintani onom te matua e oriong e ntukus e are e nkila.

¹¹“Nintayu iltidii ooriwuo lo suyai onom, nipik lelo tidii atua lelo kiintani nintutum olng'obor te nebo metaa entoki nabo.

¹²Ore ina shoto naleku too lkarash o lng'obor, ilo pisiai lo lkarasha, neisiong'a ti oriong o lng'obor.

¹³Ore ina matua naleku te nchoto nabo, o ematua naleku te nkae shoto, te nkadoro oo nkilani o lng'obor.

¹⁴Neisiong'a too mbat o lng'obor enkikenet oo ndapan naanota oo lmeregeshi o noo nkineji.

¹⁵“Ntobira intorioi irubat oo sunta o lng'obor too nkeek o lerai.

¹⁶Ore ake erubata e suntai naa intemat tomon enkadoro o entemata nabo o lpisiai e ndapasho.

¹⁷Netii ake erubata nabo ing'amat are pee etumi aaturub te nebo; ninko neijia too rubat pooki.

¹⁸Ntobira nkeek o lng'obor, irubat tikitam e nkosholai te nkalo e kopikop.

¹⁹Ntoneta artam e nkosholai ti abori nena rubat tikitam oo sunta, ntoneta are ti abori erubata nabo too ng'amat enyena pokira are o ntoneta are te rubata nabo too ng'amat enyena pokira are.

²⁰Ore te nchoto e are o lng'obor, te nkalo e moikuape irubat tikitam oo sunta.

²¹O ntoneta enye tikitam e nkosholai, ntoneta are ti abori erubata nabo o ntoneta are ti abori enkae rubata.

²²Ore ti oriong o lng'obor te nkalo o loo ntoluo nintayu irubat ile oo sunta.

²³Nintayu irubat are too lpijat lo lng'obor ti oriong;

²⁴nepaasha ninche te kop kake nchoo eibung'a te shumata, to lgisoi le dukuya, netiu inji te pokira are; neitayu ilpijat pokira are.

²⁵Naa keaku irubat isiet, tenebo ntoneta enye e nkosholai, ntoneta tomon o ile, o ntoneta are tiabori erubata nabo, o ntoneta are tiabori enkae rubata.

²⁶“Nintayu iloom lo lerai, imiet too rubat e nkalo nabo olng'obor,

²⁷o loom imiet too rubat enkae alo o lng'obor, o loom imiet too rubat o lng'bor te nkalo e oriong te nkalo o loo ntoluo.

²⁸Ore ilo loomi le mpolos oitorit nena rubat neng'ung'ur ebaiki enkiting'oto o metabaiki enkiting'oto.

²⁹Nimulumul irubat te saabu, nintayu ilgiso lenye le saabu pee eibung iloom, nimur iloom te saabu.

³⁰Nishetu olng'obor te nkitanyaanyukoto apa anaa enikintoduaaki to ldoinyo.

³¹“Nintobir oliaatua too ntokitin pusi o sinteti o mpilei o nkarash e kitani napuiyiapui. Neitobir te siaai e nkarriayiano neripakini ilkerubi.

³²Neisiong ninche too ng'apeta o lerai nemur te saabu, neeta ilala oololo le saabu, too ntoneta ong'uan e nkosholai.

³³Niik oliatua te lelo ala oololo, niyau osanduku le shakenisho atua oliaatua; nikirishaki ilo liaatua ewueji sinyati o ine nesinya oleng.

³⁴Nipik ilo orika lo lng'ur shumata ilo sanduku le shakenisho ine wueji nesinya oleng.

³⁵Nipik ina misa oriong o liaatua, nipik enkitashet o ltaa enkalo e kopikop o lng'obor neipirakinore emisa; nipik emisa enkalo e moikuape.

³⁶“Ore kutuk aji o lng'obor nintayu olkarasha pus o olmorijoi o lpile, oitobiruno te kitani napuyiapui napiyaya, neikodi to ltidu.

³⁷Nintaiki lelo karash ing'apeta imiet o lerai nimur te saabu, ore ilala lenye oololo naa ile saabu nintaiki ntoneta imiet o suyai.