Read Maasai Bible – Biblia Sinyati Enaidurra 28 Bible Online

Enaidurra 28 - Maasai Bible – Biblia Sinyati bible

Enaidurra 28

¹“Niyau iyie Aron, olalashe lino o layiok lenyena Nadab o Abihu o Eliesa o Isamar tiatua iltung'ana loo Siraeli pee aisiaai nanu anaa ilapolosak.

²Nintaiki Aron olalashe lino ilkilani oosinya, te nkitoo o te sidano.

³Nirorie lelo pooki oata enkidimata, lelo laishoo eng'eno, pee eitobir ilkilani le Aron, pee eitisinyi te mpolosare ai.

⁴Kuna inkilani naaitobir ninche, enkila o lgoo, enkila dorrop, o lkila oodo, enkila e oriong naikodo o enkarasha e lukunya, o enkene e mpolos; neitobir ninche nkilani naasinya te nkaraki Aron olalashe lino o layiok lenyena pee aaisiaai ninche anaa ilapolosak.

⁵“Neng'amu ninche saabu o nkarash pusi o morijo o mpilei o kitani napuyiapui napiyaya.

⁶Neitobir ninche enkila dorrop te saabu, too usin pusi o too morijo o too mpilei o te kitani napuyiapui napiyaya te nkarriayiano.

⁷Neeta inkeenta are ooronyi too lpijat lenyena pee eitutumieki te nebo

⁸o enkeene e mpolos naitobiruno te nkarriyiano te nena tokitin, pee eenieki; te saabu o too usin pusi o sinteti o naanyokie o naaibor sidain.

⁹Niya isoito are barrikon ooji oniks niguetaki asiraki ninche nkarn oo layiok le Israel,

¹⁰inkarn enye ile to soit obo, ore nkulie ile naaleku ning'eroki olikae soit, too inot enye.

¹¹Ore anaa enaguet olaguetani omishir isoito te nkarriyiano, neijia sii iyie inkuna enguetata e lelo soito oaare inkarn oo layiok le Israel; nipik nena nitaguetua te saabu.

¹²Nipik lelo soito pooki inkaloli ooronyi le ina kila dorrop, pee eaku isoito oodamunyeki ilayiok le Israel; nenap Aron inkarn enye te dukuya o Laitoriani too ronyi lenyena pee edamuni.

¹³Nipik inkikodot are e saabu

¹⁴o lpisia oaare le saabu nasila, ooirina anaa empito nipik nimbung'ie ina saabu naikodore enkila.

¹⁵“Nintobir sii ina kila o lgoo e nkiguana, te nkarriyiano, anaa ina kila dorrop, te saabu o too usin pusi o morijo o mpilei o kitani napuyiapui napiyaya.

¹⁶Nerisioroyu nkaloli pooki, netasha entemata e ndap enkadoro o entemata e ndap endapasho.

¹⁷Nipik ilkererin oong'uan loo soito olkereri obo lo ltotoi barrikoi, oltotoi onyori oltotoi onyokie oleng oaku olkereri le dukuya.

¹⁸Ore olkereri li are naa oltotoi sintet oltotoi pus oata iltiil o ltotoi sidai oji almasi;

¹⁹ore olkereri liokuni naa oltotoi pile o ltotoi owang oji agat o ltotoi pile oji ametist;

²⁰ore olkereri li ong'uan naa oltotoi oji beril, oltotoi oji oniks o ltotoi pus oji Jaspa. Neitobir te nkikodo e saabu.

²¹Nepik isoito tomon o are o nkarn enye anaa inkarn oo layiok le Israel. Netiu ninche anaa olmishire, meetae ake olemeguetuno enkarna enye too loshon tomon aare.

²²Nintobiraki ina kila o lgoo ilpisia ooipila anaa impi, le saabu nasila;

²³nintobiraki ina kila o lgoo ilgiso oaare le saabu nipik lelo giso oaare ilpijat pokira oaare le mbene o lgoo.

²⁴Nipik lelo pisia aare le saabu ooipila atua lelo giso ootii ile mowuarak le mbene o lgoo.

²⁵Ore ineeiting'ie lelo pisia oaare ooipila nimbung'ie lelo kererin oaare le nkikodo e saabu, nimbung'ie te nkalo e dukuya te nena keenta e nkila dorrop naatii ironyi.

²⁶Nintoki aitayu ilgiso aare le saabu nimbung'ie lelo lemowuarak aare le nkila to lgoo te nkalo e atua te mbata e ina kila dorrop.

²⁷Nintoki aitayu ilgiso aare le saabu, nimbung'ie ninche te nkalo e dukuya ti abori nena keenta are e nkila dorrop natii ironyi, te nchumata ina keene e nkila dorrop naripuno te nkarriyiano.

²⁸Neitutum ninche ina kila o lgoo too lgiso lenyena o lgisoi le ina kila dorrop te nkeene pus, pee eirrag teina keene e nkila dorrop naripuno te nkarriyiano, pee melolong'u ina kila o lgoo teina kila dorrop.

²⁹“Nenap ninye Aron inkarn oo layiok le Israel teina kila o lgoo e nkiguana, to ltau lenye, te nelo ninye atua ine wueji nesinya, pee edamuni ninche anaake te dukuya Olaitoriani.

³⁰Ore ina kila o lgoo e nkiguana tipika Urimu o Sumimu, pee eaku ketii ninche oltau le Aron, te nebo ninye enkata nilo dukuya Olaitoriani. Neaku kenapita ninye Aron enkiguana oo ltung'ana loo Siraeli to ltau lenye te dukuya Olaitoriani anaake.

³¹“Nintaa iyie olkila li oriong pus muj le ina kila dorrop.

³²Nipik ilo kila enaudoto naimieki endukuya; ore ina audoto neitamani eripata anaa enaudoto e nkila pee mepolosa.

³³Ore eripata enye ti abori tiripaki ilonyek le usi pus, o empile o enanyokie aitaman o ntualan e saabu erishata enye,

³⁴entuala e saabu o long'u, nemanaa te ripata e abori olkila.

³⁵Neishop Aron ele kila te neisiaaisho anaa olapolosani. Ore enkorui enye nening'i te nelo atua ine wueji sinyati dukuya Olaitoriani o te neipang'u boo, pee meye.

³⁶“Nintayu enchili e saabu nasila niguetaki oriong enye, anaa isirat lo lmishire: ‘Sinyati to Laitoriani.’

³⁷Nieniki ina arasha narridieki endukuya te nkeene pus; tipika enkalo e dukuya e ina arasha narridieki endukuya.

³⁸Neishop Aron te nkomom enye, neya ninye Aron enkorrok enye pooki torroni naitayuni to lasar osinya, oyanyit iltung'ana loo Siraeli anaa nkishoorot enye naasinya. Neton ina masaai anaake te nkomom enye, pee eng'amari nena kishoorot te dukuya Olaitoriani.

³⁹“Niripu olkila te nkarriyiano te nkarasha sidai napuyiapui, nintayu ina arasha narridieki endukuya te nkarasha sidai napuyiapui, nintayu enkeene e mpolos aikodu to ltidu.

⁴⁰“Ore ilayiok le Aron nintaiki ilkilani o nkeenta o maupen. Nintayu ninche te nkitoo o te nkishiaa.

⁴¹Ninchopoki lelo kilani Aron olalashe lino, te nebo ilayiok lenyena, nibukoki eilata aput ninche, ninteng'el peyie aatum aaisiaayia anaa ilapolosak.

⁴²Niripaki nkilani e atua te nkarasha sidai pee eitoip masipaisho enye; nkilani naabaiki mpolosi nebaiki nkupesir;

⁴³neishop Aron o layiok lenyena te nepuonu aanyikaki olperere lo lasar aaisiaisho te wueji sinyati, meyaki ake ate entorroni meye. Naa keaku ena enkitanapata nauno te ninye o too ishoritin enyena te siadi ninye.