Read Maasai Bible – Biblia Sinyati Enaidurra 29 Bible Online

Enaidurra 29 - Maasai Bible – Biblia Sinyati bible

Enaidurra 29

¹“Nji nkuna te niput Aaron o layiok lenyena pee aatum aaisiayia anaa ilapolosak. Iwa oloing'oni obo oti o lmeregeshi aare lemeeta entioto,

²o mukateni neitu eisuishieki o mukateni naamelok neitu eisuishieki naatipikaki eilata o loirien o nkaukau o mukateni neitu eisuishieki naaelieki eilata. Te nkano sidai napuyiapui intayu ninche.

³Nipik atua olbene obo, niyau ninche teina kikapu, niyau ilo oing'oni o lelo meregeshi pokira oaare.

⁴Niyau Aron o layiok lenyena kutuk aji o lng'obor le ntumo, nintuku ninche te nkare.

⁵Nintayu nkilani ninchopoki Aron enkila e oriong o enkila dorrop o enkila o lgoo, nien empolos teina keene naripuno te nkarriyano e ina kila dorrop.

⁶Ninchopoki enkarasha narridieki endukuya enye. Nipik ilo marisian osinya enchumata e ina arasha.

⁷Niyau ina ilata naputishoreki, nibukoki endukuya enye aput ninye.

⁸Nintoki ayau ilayiok lenyena, ninchopoki ninche inkilani,

⁹nien impolosi enye too nkeenta, ninchopoki imaupen; neaku enenye empolosare te nkitanapata nauno. Inji nkuna iput Aron o layiok lenyena apik esiaai sinyati.

¹⁰“Nintoki ayau oloing'oni dukuya ilo ng'obor le ntumo. Neiteleiki Aron o layiok lenyena inkaik enye endukuya e ilo oing'oni,

¹¹niar ilo oing'oni metua te dukuya Olaitoriani te kutuk aji o lng'obor le ntumo.

¹²Niya embata o sarge lo loing'oni nipik imowuarak olperere lo lasar to lkimojino lino; ore olikae sarge mbukoi ti abori olperere lo lasar.

¹³Niya ina kurriny pooki naimulumul imonyit o lkina le moinyua o lairakuj pokira aare eeta enkurriny enye, nipej ninche te nchumata olperere.

¹⁴Kake ore nkiri o loing'oni, o lchoni lenye o emodiei enye, nipejoo ninche te nkima tialuo ina ang oo lng'oborri; olasar ninye te nkaraki olasar lo ng'ok.

¹⁵“Nintoki aitayu obo loo lmeregeshi, neiteleiki Aron o layiok lenyena inkaik enye endukuya e ilo meregesh,

¹⁶niyieng ilo meregesh, nisuaaya osarge lenye te mbata o lperere lo lasar aitaman.

¹⁷Nintoki adung'udung ilo meregesh, metaa nkutiti kiri, nintuku enkoshoke enye o loilelek nipik ninche te nebo irubat enyena o endukuya enye,

¹⁸nipejoo olmeregesh pooki te nchumata o lperere lo lasar; olasar opejori te nkima ninye to Laitoriani, esong'ouna naitishipisho o lasar le nkima to Laitoriani.

¹⁹“Nintoki aitayu olikae meregesh, neiteleiki Aron o layiok lenyena inkaik enye endukuya o lmeregesh,

²⁰niyieng ilo meregesh, niya embata o sarge nipik esegerua e nkiok e tatene e Aron o segeruani oo nkiyiaa e tatene oo layiok lenyena, o lmogirrani loo nkaik enye e tatene o lmogirrani loo nkejek enye e tatene, ore ilo sarge otashare olperere lo lasar nisuaaya aitaman.

²¹Nisuaaya olikai sarge otii enchumata o lperere lo lasar o ina ilata naputishoreki nisuaaki Aron o lkilani lenyena, o layiok lenyena o lkilani loo layiok lenyena te nebo ninye. Ore ninye o lkilani lenyena nesinyayu o layiok lenyena o lkilani loo layiok lenyena te nebo ninye.

²²“Nintoki sii aitayu eilata o lmeregesh o eilata o lkidong'oe o enkurriny e nkoshoke o lkina le moinyua o lairakuj pokira are eeta enkurriny enye o emuro e tatene (amu olmeregesh oputishoreki opikieki Aron o layiok lenyena esiaai sinyati).

²³Nintayu tiatua enkikapu oo mukateni neitu eisuishieki natii dukuya Olaitoriani, emukate nabo namelok natii o enkaukau nabo eilata,

²⁴o emukate nipik kuna pooki inkaik e Aron o nkaik oo layiok lenyena, niyukuyuk iyie ninche metaa olasar oyukuyuki te dukuya Olaitoriani.

²⁵Nintoki iyie aitayu too nkaik enye, nipejoo to lperere lo lasar metoponai olasar opejori, pee eaku esong'ouna naitishipisho te dukuya Olaitoriani; olasar le nkima to Laitoriani.

²⁶“Nintayu oloikulu le ilo meregesh otuputieki Aron aapik esiaai sinyati, niyuk pee eaku olasar oyuki te dukuya Olaitoriani; neaku erubata ino.

²⁷Nintisiny oloikulu lo lasar oyuki o ina muro aa ninye erubata o lapolosani, nayukoki, naa ninye eishoruaki teilo meregesh oputishoreki amu te nkaraki Aron o te nkaraki layiok lenyena.

²⁸Naa keaku ninche ine Aron o noo layiok lenyena, erubata enye naisho ninche iltung'ana loo Siraeli anaake, too lasarri lenye le seriani; neaku olasar lenye to Laitoriani.

²⁹“Ore lelo kilani sinyat le Aron naa keaku iloo layiok lenyena oosuju ninye, pee ebukokini eilata eishopito, neputi ninche eishopito.

³⁰Ore ilo ayioni oaku olapolosani erishata enye neishop ninche inkolong'i naapishana, tenelotu atua olng'obor le ntumo aisiaaisho te wueji sinyati.

³¹“Niya ilo meregesh oputishoreki niyier inkiri enyena te wueji sinyati.

³²Nenya Aron o layiok lenyena inkiri e ilo meregesh o mukateni naatii atua nkikapuni te kutuk aji o lng'obor le ntumo.

³³Nenya ninche nena tokitin naaitobirieki to lning'o lo sotua, pee epikieki ninche esiaai sinyati, neitisinyi, kake menya oltung'ani le boo, amu eisinyat ninche.

³⁴Kake te neleku ae kirring'o naputishoreki aashu emukate o mekenyu, nipejoo iyie te nkima ina natelekua, meinosi ninye, amu eisinyati.

³⁵“Nintaas ina Aron o layiok lenyena, te risioroto e nena pooki naaitanapa; too nkolong'i naapishana ipik ninche ina siaai sinyati.

³⁶Ore ake te nkolong nintayu, nipolos oloing'oni pee eaku olasar loo ng'ok lo lning'o lo sotua. Nintayu sii olasar loo ng'ok te nkaraki olperere lo lasar, ti nintayu olning'o lo sotua te ninye nibukoki ninye eilata, aitisiny.

³⁷Too nkolong'i naapishana intayu olning'o lo sotua te nkaraki olperere lo lasar, nintisiny, neaku ilo perere lo lasar sinyati oleng; ore pooki toki naiseyie olperere lo lasar neitisinyi.

³⁸“Naa ele olasar lintayu te nchumata o lperere lo lasar, ilkuoo oaare le kerra lo lari obo, anaake te nkolong.

³⁹Topolosa olkuoo obo le ker tadekenya, ore olikae kuo le ker nipolos teipa.

⁴⁰Ore te nebo ilo kuoo le ker le dukuya irrantilini aare le nkano nasila naipurjare, emborei o ltulet le ilata sidai o emborei o ltulet le naisho oo sabibu pee eaku olasar.

⁴¹Ore olikae kuo le ker topolosa teipa ninko anaa ilo le tadekenya, nintayu te nebo ninye olasar le nkurma naidong'o o lasar opikuni. Olasar le nkima ele to Laitoriani, neitishipisho esong'ouna enye.

⁴²Keaku ninye olasar opeji anaake tiatua iishoritin inyi te kutuk aji o lng'obor le ntumo, te dukuya Olaitoriani teine natumore nanu intae, pee airorie nanu intae teine.

⁴³Teine atumore iltung'ana loo Siraeli, neitisiny enkitoo ai ine.

⁴⁴Naitisiny nanu ilo ng'obor le ntumo o lperere lo lasar; naitisiny sii Aron o layiok lenyena, pee aaisiaai ninche anaa ilapolosak.

⁴⁵Namany nanu atua ltung'ana le Israel, naaku Enkai enye.

⁴⁶Neyiolou ninche aajo kara nanu Olaitoriani Enkai enye, oyaua ninche aaitung'uaa enkop e Misiri, pee atum nanu atotona tiatua ninche. Kara nanu Olaitoriani Enkai enye.