Read Maasai Bible – Biblia Sinyati Enaidurra 33 Bible Online

Enaidurra 33 - Maasai Bible – Biblia Sinyati bible

Enaidurra 33

¹Nejoki Olaitoriani Musa, “Entudumunye enchom, intae o lelo tung'ana apa liyaua ailepunye aitung'uaa enkop e Misiri, meshomo ina kop apa naa ninye ainosie olmumai pee aisho Abraham o Isaak o Yakobo, ajoki ‘Eishoi inyi aisho ninye.’

²Naa kairriwaa nanu olmalaika dukuya intae, naaraa nanu meshomo Ilkanaani, Ilamori o Ilhiti o Lperesi Lhifi o Lyebusi.

³Elepa enchom ina kop naruko kule o naishi; kake malo nanu tiatua intae, maidaikie ake intae te nkoitoi, amu irara iltung'ana oogol ilukuny.”

⁴Ore ake pee ening iltung'ana kulo omon torrok, neishir, nemetii oltung'ani oonyaaka aishop imasaa enyena.

⁵Amu etiaaka Olaitoriani Musa, “Tiaaki iltung'ana loo Siraeli, ‘Irara iltung'ana oogol ilukuny; te nalo nanu te nkata nabo tiatua intae, naidaikie intae. Ore naa taata entayutu imasaa inyi entung'uai ate, pee ayiolou enaitaas intae.’ ”

⁶Neitayu iltung'ana loo Siraeli masaa enye, ebaiki oldoinyo le Horeb neito dukuya.

⁷Naa kesesh apa eya Musa olng'obor nelo aun aitaman ina ang oo lng'oborri, nejo ninye olng'obor le ntumo. Ore pooki ng'ae oing'oru Olaitoriani neipang alo ilo ng'obor le ntumo otii auluo ina ang oo lng'oborri.

⁸Ore ake enkata naipang Musa alo olng'obor, neinyototo iltung'ana pooki aaitashe, neitashe ake oltung'ani te kutuk aji o lng'obor lenye, neduaaya Musa ometaba anaa nejing atua ilo ng'obor.

⁹Naa ore ake pee ejing Musa olng'obor, neirorie Olaitoriani Musa.

¹⁰Naa ore ake pee edol iltung'ana pooki ina ng'ape e nkatampoi eitashe te nkutuk o lng'obor, neinyototo iltung'ana pooki aaitashe aaserem, oltung'ani ake te kutuk aji o lng'obor lenye.

¹¹Neirorie Olaitoriani Musa eing'ura too nkomomi anaa oltung'ani te neirorie olchore lenye. Ore pee eitoki Musa ashuko alo atua ina ang oo lng'oborri, ore osinka lenye Yoshua olayioni le Nuni, ilo barnoti neitu elo aing'uaa ilo ng'obor.

¹²Nejoki Musa Olaitoriani, “Ng'ura ajo kitiaaka nanu, ‘Toriku kulo tung'ana ilepunye’. Kake eitu kincho nanu matayiolo ajo kaing'ae irriwaa te nebo nanu. Ninyaaka ajo, ‘Kaayiolo nanu iyie enkarna, ninoto sii omom too nkonyek aainei.’

¹³Ore naa taata, aatoomono, tenaa kanoto omom too nkonyek inono, intoduaaki taata nanu inkoitoi inono, pee aatum nanu atayiolo iyie natum omom too nkonyek inono. Tadamu sii ajo ore ele osho naa iltung'ana linono.”

¹⁴Nejo Olaitoriani, “Kalo nanu te nebo intae, naa kaisho nanu intae enkiyeng'iyeng.”

¹⁵Nejoki Musa Enkai, “Ti nimilo iyie te nebo iyiook, miya iyiook aituang'uaa ene.

¹⁶Amu kaji naa eikoni pee eyiolouni aajo anoto omom too nkonyek inono, nanu o ltung'ana linono? Aime ti nilo iyie te nebo iyiook, pee kimbalayu iyiook, nanu o ltung'ana linono too ltung'ana pooki ootii oriong enkop?”

¹⁷Nejoki Olaitoriani Musa, “Ore nena baa nitejo naa kaas; amu inoto omom too nkonyek aainei, naa kaayiolo nanu iyie enkarna.”

¹⁸Nejo Musa, “Aatoomono nanu iyie intoduaaki enkitoo ino.”

¹⁹Nejoki ninye, “Kaisho nanu enkishiaa ai pooki meshomo te dukuya iyie, naibalunye te dukuya iyie enkarna ai, ‘Olaitoriani’; naipirisie nanu ilo laipirisie naing'urrie ilo laing'urrie.”

²⁰Nejo ninye, “Kake mindim iyie atoduaa enkomom ai; amu meetae oltung'ani odol enkomom ai neitoki aishu.”

²¹Neitoki Olaitoriani ajo, “Ng'ura, etii ewueji te mbata nanu naa ninye intasheyie te shumata e ndapidapoi;

²²naa ore ina kata kigiroo enkitoo ai naapik iyie olbaata le ina dapidapoi, naaimulumul nanu iyie te nkaina ai o metaba anaa nalusoo,

²³naitoki nanu aiwangie enkaina ai, nikidol iyie nanu enkoriong ai, kake medoli enkomom ai.”