Read Maasai Bible – Biblia Sinyati Enaidurra 37 Bible Online

Enaidurra 37 - Maasai Bible – Biblia Sinyati bible

Enaidurra 37

¹Neitayu Besalel osanduku loo nkeek o lerai, intemat are o lpisiai enkadoro, naa entemata nabo o lpisiai endapasho enye, naa entemata nabo o lpisiai enkilepata enye.

²Nemur ninye te saabu nasila atua o oriong nepik enkamanaa e saabu aitaman.

³Neitayu ilgiso oong'uan oonapieki le saabu neibung'ie ninche lelo pijat lenyena pokira oong'uan, etii ake ilgiso aare enkalo nabo netii ilgiso aare enkae alo.

⁴Neitayu imbokishi naanapieki o lerai, nemur ninche te saabu,

⁵nepik mbokishi lelo giso te pooki shoto e ilo sanduku pee enapieki ilo sanduku.

⁶Neitayu ninye olorika lo lng'ur le saabu nasila, intemat are o lpisiai enkadoro enye naa entemata nabo o lpisiai endapasho enye.

⁷Neitoki ninye aitayu ilkerubi aare ooidong'uno te saabu, neitayu ninche too matuan pokira are e ilo orika lo lng'ur,

⁸nepik olkerubi bayie nabo, nepik olikae kerubi enkae bayie; te ntoki nabo o ilo orika lo lng'ur eitobira ninye lelo kerubi too matuan enyena pokira are.

⁹Nelak lelo kerubi inaipuko enye aaitorioo, neitoip ilo orika lo lng'ur too naipuko enye eing'ura inkomomi enye maate, neing'or inkomomi e lelo kerubi ilo orika lo lng'ur.

¹⁰Neitoki sii aitayu emisa too nkeek o lerai; intemat are enkadoro, naa entemata nabo endapasho, naa entemata nabo o lpisiai enkilepata;

¹¹neimulumul ninye te saabu nasinya, nepik enkamanaa e saabu aitaman.

¹²Nepik aitaman erubata naba anaa endap e nkaina te ndapasho nepik enkamanaa e saabu ina rubata.

¹³Neitayu ninye ilgiso oong'uan le saabu neeniki lelo giso lelo pijat pokira oong'uan too nkejek enyena.

¹⁴Netaaniki lelo giso ina rubata, ilo oibung mbokishi naanapie ina misa.

¹⁵Neitayu ninye imbokishi oo nkeek o lerai pee enapieki ina misa, nemuraa ninche te saabu.

¹⁶Neitoki aitayu ntokitin e saabu naasila naa ninche epiki enchumata emisa o saanini enyena, o mbakulini o enkorropil o lbakulini o siang'aun naapikunyeki olasar obukuni.

¹⁷Neitoki sii aitayu olkitashet lo ltaa le saabu nasila. Ore entonet enye o empolos enkitashet neitayuni te siaai e nkidong'ore; ore inkikompeni enyena o rubat enyena o ntapuka enyena naa entoki nabo.

¹⁸Netii apa ilng'osil ile ooipang'u too murten enyena, neipang'u ilng'osil okuni le ina kibung'et o ltaa te nkae alo enye.

¹⁹Netii nkikompeni uni naaitayioki aaikunu anaa ilgululu, meetae ake ene meeta endukuya e entapukai o lng'osila o nkikompeni uni naaitayioki aaikunu anaa ilgululu, meetae ake ene meeta endukuya o entapukai to likae ng'osila; nepuo lelo ng'osil pokira ile aaipang teina kitashet o ltaa.

²⁰Ore teina kibung'et o ltaa kewan, netii nkikompeni naaitayioki aaikunu anaa ilgululu lo lchani onyaanyukie oseki, te nebo ilukuny enye o ntapuka enye,

²¹netii ake elukunya e rubata nabo te nebo ninye ti abori ilng'osil oaare ooiriamari te lelo ng'osil ile oipang'u te ninye.

²²Ore lukuny enye o lng'osil lenye naa entoki nabo; ore pooki umata naa entoki nabo e siaai enkidong'ore e saabu nasila.

²³Neitoki ninye aitayu iltaai lenyena oopishana o ntokitin naarieki iltaai lenye o mbakulini dapashi enyena e saabu nasila.

²⁴Neitobir ninye te nebo ntokitin enyena pooki te ntalanta e saabu nasila.

²⁵Neitayu olperere lo lasar le nkorropil too nkeek o lerai; ore enkadoro enye naa entemata nabo naa entemata nabo endapasho, naa kerisioro apa, naa intemat are enkilepata; ore apa imowuarak enyena naa entoki nabo o ninye.

²⁶Nemur ninye te saabu nasila, enchumata enye o matuan enyena aitaman o mowuarak enyena; neitoki aitayu enkamanaa e saabu aitaman,

²⁷neitoki aitayu ilgiso aare le saabu apik ti abori enkamanaa, too nkaloli enyena naaipirakino, pee eibung nena bokishi naanapieki.

²⁸Neitayu ninye imbokishi o lerai nemuraa ninche te saabu.

²⁹Neitayu sii ninye eilata nasinya naputishoreki enkorropil naisonkoyo naaitushula olaitobirani loo sonkoyoni.