Read Maasai Bible – Biblia Sinyati Enaidurra 4 Bible Online

Enaidurra 4 - Maasai Bible – Biblia Sinyati bible

Enaidurra 4

¹Neitoki Musa awalu, nejo, “Ng'ura, maairuk ninche nanu aashu ening enajoki, amu kejo ninche, ‘Eitu kimpang'aki iyie Olaitoriani.’ ”

²Nejoki Olaitoriani Musa, “Kainyoo ina nimbung'ita te nkaina ino?” Nejoki ninye, “Eng'udi.”

³Neitoki ninye ajo, “Tanang'aki enkop.” Nenang'aki enkop, neaku ina ng'udi olasurai; nekwet Musa ailany.

⁴Kake etiaaka Olaitoriani Musa, “Ntorioi enkaina ino mbung'a olkidong'oe.” Neitorioo enkaina enye neibung, neitoki aaku eng'udi te nkaina enye.

⁵“Taasa ena pee etum aairuko nchere Olaitoriani Enkai oo loo menye, Enkai e Abraham, Enkai e Isaak o Enkai e Yakobo nikimpang'aka iyie.”

⁶Neitoki Olaitoriani ajoki Musa, “Tipika enkaina ino olgoo lino.” Nepik ninye enkaina enye olgoo lenye; ore pee eitayu nedol etijing'a enkaina enye enkeeya oo lbolot, neibor anaa enkinuku.

⁷Neitoki Enkai ajo, “Nyaaki tipika enkaina ino olgoo lino.” Neitoki ninye apik enkaina enye olgoo lenye; ore ake pee eitayu, nedol eitotiwuoki anaa osesen lenye pooki.

⁸Nejo Enkai, “Naa ti nimikiruk ninche, aashu te nemenyorraa enkitoduaata e dukuya, neidim ninche aairuko ina kitoduaata e are.

⁹Ore pee meiruk ninche ebaiki nena kitoduaat pokira aashu ening enijoki, niya iyie enkare to lkeju le Nail nilo abukoki enkop natoyio; ore ina are nilo aya to lkeju le Nail naa keaku osarge ti oriong enkop natoyio.”

¹⁰Kake etiaaka Musa Olaitoriani, “Olaitoriani lai, mara nanu oltung'ani arriyia te nkiguana, aashu ebaiki ena kata pee irorie osinka lino; kake mayiolo airoro na kaasha sii olng'ejep.”

¹¹Neitoki Olaitoriani ajoki ninye, “Kaing'ae oitobira enkutuk oltung'ani, oitiming'an te nkiroroto o te ning'oto, aashu oitodolisho aashu aitamodok? Aime nanu, Olaitoriani ake?

¹²Shomo naa taata, naa kaaku nanu te nebo enkutuk ino naaitayiolo enijo.”

¹³Kake etiaaka ninye, “Oi, Olaitoriani lai, aatoomono, irriwai likae tung'ani.”

¹⁴Neyupuyup engoro o Laitoriani te nkaraki Musa neitoki ajo, “Aimetii Aron ilo alashe lino loo Lawi? Kayiolo ajo keidim airoro aitobiraki naa ng'ura, elotu ninye pee kinang'are, naa ore pee kidol ninye neshipayu to ltau lenye.

¹⁵Nirorie iyie ninye nipik irorei enkutuk enye, naa kaitaarriyian nanu enkutuk ino o enkutuk enye naaitayiolo iyie eniaas.

¹⁶Keirorie ninye iltung'ana te rishata ino, neaku ninye enkutuk te iyie, nitiu te ninye anaa Enkai.”

¹⁷Naa iya te nkaina ino ena ng'udi, naa ninye iasie nkitoduaat.

¹⁸Nerrinyo Musa alo ashuko enetii Yesro olaputani lenye, nejoki ninye, “Aatoomono, nchooki nanu mashomo ashuko, pee ashukokino iltung'ana lang ootii Misiri pee adol tenaa keton eishu.” Nejoki Yesro Musa, “Shomo te seriani.”

¹⁹Nejoki Olaitoriani Musa te Midian, “Shomo tushukoyu Misiri; amu ore iltung'ana pooki apa ooing'oru enkishui ino netuata.”

²⁰Nedumu Musa enkitok enye o layiok lenyena nepik osikiria, nelo ashuko enkop e Misiri; naa ore te nkaina enye neya Musa eng'udi e Nkai.

²¹Nejoki Olaitoriani Musa, “Ore irrinyo alo Misiri, toduaa nchere itaasa te dukuya Farao nena pooki enking'asia natipika nanu engolon ina kake kaitagol nanu oltau lenye, pee meisho ninye iltung'ana meshomo.

²²Naa ilo ajoki Farao, ‘Etejo Olaitoriani inchere, ore Israel naa olkikau lai,

²³naajoki naa iyie: Nchoo olayioni lai elo pee aatum aisiaayia nanu.’ Ti nimitiki ninye elo naar nanu ilo kikau lino metua.”

²⁴Ore teine wueji neirraga te nkoitoi nenang'are Olaitoriani Musa nejo aar ninye metua.

²⁵Neitayu Sipora osoit opi nemurat ilayiok lenyena paa keelie osarge nkejek e Musa, nejo,

²⁶“Kesipa ira olpayian lai te nkaraki osarge le muratare.” Neaku etapala Olaitoriani eitu eitoki aar metua.

²⁷Nejoki Olaitoriani Aron, “Shomo ong'ata tanang'are Musa.” Nelo ninye nenang'are ninye to ldoinyo le Nkai neng'utut ninye.

²⁸Neliki Musa Aron irorei pooki lo Laitoriani laa ninche eirriunye ninye, o nkitoduaat pooki naaitanapa ninye metaasa.

²⁹Nelo Musa o Aron aaiturrur te nebo ilpayiani loo ltung'ana loo Siraeli.

³⁰Neliki Aron ninche irorei pooki ootiaaka Olaitoriani Musa, neas nkitoduaat te dukuya iltung'ana.

³¹Neiruk iltung'ana; ore ake pee ening nchere etaparana Olaitoriani iltung'ana loo Siraeli netoduaa osina lenye, neirrug ninche ilukuny enye aaserem.