Read Maasai Bible – Biblia Sinyati Enaidurra 5 Bible Online

Enaidurra 5 - Maasai Bible – Biblia Sinyati bible

Enaidurra 5

¹Ore te siadi ina nelo Musa o Aron enetii Farao nejoki, “Nji ejo Olaitoriani, Enkai oo Siraeli, ‘Nchoo iltung'ana laainei epuo, pee aatum aaitaiki osirua ti ong'ata.’ ”

²Kake etejo Farao, “Kaing'ae Olaitoriani, laidim nanu atoning'o oltoilo lenye naisho Isiraeli epuo.”

³Nejo ninche, “Enotore iyiook Enkai oo Lbrania; nchoo iyiook maape, kitoomono iyie, maape elototo oo nkolong'i uni ti ong'ata pee kipolosaki Olaitoriani Enkai, mear ake iyiook to lmeitai aashu to lalem.”

⁴Nejoki olaiguanani le Misiri, “Musa o Aron, kainyoo pee iyaya iltung'ana aaitung'uaa esiaai enye? Entorrinyoto enchom isiaaitin inyi.”

⁵Neitoki Farao ajo, “Ng'ura, ajo aikumok taata kulo tung'ana tena kop niyeng'iyeng'ie iyie ninche too siaaitin enye!”

⁶Ore teina olong ake neitanap Farao ilaitasheikinok le siaai o lkituaak le siaai,

⁷“Mintokiki aekata aaisho iltung'ana olkujita oitayunye ilmatofali anaa oshi eninkoko; enchoo ninche epuo aasotu olkujita maate.

⁸Ore esiana oo lmatofali apa naitayu enchoo eaku lelo ake, emintong'oriki ninche, amu aiturua ninche; neaku keishir, ‘Nchoo iyiook maape aaitaiki Enkai ang olasar.’

⁹Nchoo esiaai nagol oleng eiteeki iltung'ana, pee etum aataasisho nemeitoki aainining lelo rorei le lejare.”

¹⁰Neaku eshomo lelo aitasheikinok o ilkituaak le siaai nejoki iltung'ana, “Etejo Farao nji, ‘Maisho nanu ntae olkujita.

¹¹Enchom maate, eyau olkujita linyi te wueji neba anaa enitumiemie; kake ore esiaai meitong'ori hoo ninye penyo.’ ”

¹²Neidapashakino iltung'ana enkop pooki e Misiri aasotu suut aaitaa olkujita.

¹³Netem apa lelo aitasheikinok aarrumoki ninche esiaai, nejoki, “Entabai esiaai inyi, e anaake, anaa apa eetae olkujita.”

¹⁴Ore ilkituaak loo ltung'ana loo Siraeli, laa ninche etipika ilaitasheikinok le Farao meitasheiki ninche, neari, neikilikuani aajoki, “Kainyoo pee eitu iasiasa esiaai inyi aaitobir ilmatofali taata anaa apa?”

¹⁵Nepuonu lelo kituaak loo ltung'ana loo Siraeli aaishiraki Farao, “Kainyoo pee intaas iyiook, isinkan linono, ena?

¹⁶Meetae olkujita ooishooki isinkan linono, ore ake eyia, nejoki ninche iyiook, ‘Entobira ilmatofali!’ Naa ng'ura earitae isinkan linono, kake ore enkitarruoroto netii atua iltung'ana linono ake.”

¹⁷Nejo ninye, “Irara turua, irara turua, neaku ijojo, ‘Nchoo iyiook maape aapolosaki Olaitoriani.’

¹⁸Enchom taata, naa entaasisho; amu meetae olkujita oishori intae, ore ake eyia, niyauu enoshi ake siana oo lmatofali.”

¹⁹Nedol ilkituaak loo ltung'ana loo Siraeli aajo etii ninche erishata torrono, ina kata pee ejo ninche, “Meitong'ori hoo ninye penyo esiana oo lmatofali linyi lintayuyu anaake.”

²⁰Netumore ninche Musa o Aron, eanyita apa ninche, epuku aaing'ua enetii Farao.

²¹Nejoki ninche, “Nchoo eing'or ntae Olaitoriani neiguanare, amu intaa ntae iyiook ilarruok te dukuya Farao o laisiaayiak lenyena, nitipika olalem enkaina enye pee ear iyiook matuata.”

²²Neitoki Musa aibelekenyakino Olaitoriani nejoki, “Olaitoriani, kainyoo pee kintasima airriu nanu?

²³Amu ore anaa nalotu enetii Farao airo te nkarna ino, neitaasa ninye ntorrok kulo tung'ana, neitu iyie intajeu iltung'ana linono tukul.”