Read Maasai Bible – Biblia Sinyati Enaidurra 8 Bible Online

Enaidurra 8 - Maasai Bible – Biblia Sinyati bible

Enaidurra 8

¹Neitoki Olaitoriani ajoki Musa, “Shomo tijing'aki Farao nijoki ninye, ‘Nji ejo Olaitoriani, Nchoo iltung'ana laainei epuo peyie aatum aaisiaayia.

²Kake ti niany iyie incho ninche epuo, naa kaar enkop ino pooki too ntuaan.

³Neiput olkeju le Nail nena tuaan naapuonu atua enkaji ino, o atua olgilata lino oirragi o enchumata endapash ino o atua inkajijik oo laisiaayiak linono o noo ltung'ana linono o ine wueji neyierishoreki o mbakulini inono naaipurjishoreki.

⁴Eikipuonu nena tuaan aaked iyie o ltung'ana linono o sinkan linono.’”

⁵Nejoki Olaitoriani Musa, “Tiaaki Aron, ‘Ntorioi enkaina ino o eng'udi ino te shumata oo lkejek o te shumata oo erat o te shumata oo lturot, nchoo ntuaan meetu enkop e Misiri!’ ”

⁶Neitorioo Aron enkaina enye tioriong nkariak e Misiri, neilepu ntuaan neiput enkop e Misiri.

⁷Neas ilasakutok anaa ina te sakutore enye, neyau ntuaan oriong enkop e Misiri.

⁸Neitoki Farao aipot Musa o Aron nejoki, “Entoomon Olaitoriani meiwuang'ie ntuaan maatung'uai nanu o ltung'ana laainei; naa kaisho nanu iltung'ana epuo aapolosaki Olaitoriani.”

⁹Nejoki Musa Farao, “Tiaakaki ake duoo iyie anaa eniyieu, kanu iyieu naaomonoki, o laisiaayiak linono o ltung'ana linono, peyie emuti ntuaan te iyie, o too nkajijik inono metaa olkeju le Nail ake etii.”

¹⁰Nejoki ninye, “Taisere.” Nejo Musa, “Metotiwuo anaa ina nitejo, peyie iyiolouu aajo metii likae onyaanyukie Olaitoriani Enkai ang.

¹¹Eikipuo ntuaan aaing'uaa iyie o nkajijik inono o laisiaayiak linono o ltung'ana linono; neaku to lkeju ake le Nail eing'uari.”

¹²Neipang Musa o Aron aapuo aaing'uaa Farao, neishiraki Musa Olaitoriani te nkaraki ntuaan, anaa enatoning'okinote o Farao.

¹³Neas Olaitoriani te risioroto ororei le Musa, neye ntuaan too nkajijik o too ndung'orot o too nkong'at.

¹⁴Neiturrur ninche too lchalai neing'usilu enkop.

¹⁵Kake ore ake peyie edol Farao ajo eikasha eng'uan te nkop, neitagol oltau lenye, nemening ninye; anaa enatejo Olaitoriani.

¹⁶Neitoki Olaitoriani ajoki Musa, “Tiaaki Aron, ‘Ntorioi eng'udi ino toosho enterit e nkop, peyie eaku enkojong'ani te nkop pooki e Misiri.’ ”

¹⁷Neiko ninche neijia; neitorioo Aron enkaina enye o eng'udi enye neosh enterit e nkop, nelotu enkojong'ani ajing'aki iltung'ana o ng'uesi; neaku enterit pooki e nkop enkojong'ani te nkop pooki e Misiri.

¹⁸Netem ilang'eni loo ltung'ana te ng'eno enye aayau enkojong'ani neitu eidim. Neaku keetae enkojong'ani te pooki tung'ani o te pooki ng'ues.

¹⁹Nejoki ilang'eni loo ltung'ana Farao, “Olkimojino le Nkai ele.” Kake eitagoloki oltau le Farao neaku mening ninche; anaa enatejo apa Olaitoriani.

²⁰Neitoki Olaitoriani ajoki Musa, “Tayooki inyo tadekenya taanyu Farao elotu enetii enkare, nijoki ninye, ‘Nji ejo Olaitoriani: Nchoo iltung'ana laainei epuo peyie aatum aaisiaayia nanu.

²¹Naa, ti nimincho iltung'ana laainei epuo, ng'ura naa kaaitame airriwaki iyie emus oo lojong'a o laisiaayiak linono o ltung'ana linono o atua nkajijik inono, neiput inkajijik oo Lmisiri emus oo lojong'a o ina kop naitasheyie ninche.

²²Kake ore teina olong naoru enkop e Goshen, naa ninye etonie iltung'ana laainei, metaa mejing emus oo lojong'a ine, peyie iyiolou nchere kara nanu Olaitoriani otii empolos e nkop.’ ”

²³Metaa kaoru nanu ltung'ana laainei o ltung'ana linono. Taisere eaku ele monekie.

²⁴Neiko neijia Olaitoriani; nelotu emus kitok oo lojong'a atua enkaji e Farao o atua nkajijik oo laisiaayiak lenyena; ore atua enkop pooki e Misiri nerruoyo enkop te nkaraki ilojong'a.

²⁵Neitoki Farao aipot Musa o Aron nejoki, “Enchom, entopolosaki Enkai inyi tiatua ena kop.”

²⁶Kake etiaaka Musa, “Meishiaakino ti nikiaas ina; amu eikipolosaki Olaitoriani Enkai ang ilasarri ooitagor Ilmisiri. Amaa ti nikipolos ilasarri ooitagor Ilmisiri te dukuya nkonyek enye, aimear iyiook too soito?

²⁷Eikipuo elototo oo nkolong'i uni ti ong'ata peyie kipolosaki Olaitoriani Enkai anaa enaitanap iyiook.”

²⁸Nejo Farao, “Ekaisho intae enchom peyie ipolosakiki Olaitoriani Enkai inyi ti ong'ata; kake mipuopuo aalamari oleng. Entoomonokoki.”

²⁹Neitoki Musa ajoki, “Ng'ura, kaaipang alo aing'uaa naa kaaomonoki to Laitoriani peyie elo emus oo lojong'a aing'uaa Farao, neing'uaa ilaisiaayiak lenyena, neing'uaa iltung'ana lenyena taaisere; enyor ake nemeitoki Farao alej iyiook, amitiki iltung'ana meshomo aapolosaki Olaitoriani.”

³⁰Nelo Musa aing'uaa Farao, neomon Olaitoriani.

³¹Neas Olaitoriani anaa enaikilikuanua Musa, neiwuang'ie ina mus oo lojong'a te Farao o too laisiaayiak lenyena o too ltung'ana lenyena; eitu eing'uari obo.

³²Kake eitagolo ake sii Farao oltau lenye tena kata, neitu eisho iltung'ana meshomo.