Read Maasai Bible – Biblia Sinyati Yoab 10 Bible Online

Yoab 10 - Maasai Bible – Biblia Sinyati bible

Yoab 10

¹“Aibayie enkishui ai tukul. Kaing'unyung'uny oleng; ekairo tiatua emion o ltau lai.

²Ekajoki nanu Enkai, mikidung'oki nanu enkiguana; intayioloki nanu nchere kainyoo peyie kiarare nanu.

³Idol aa sidai te iyie tinikimbooki enkop, pee imenaa esiaai oo nkaik inono, nincho omom inkitobirat e lelo torrok?

⁴Iyata iyie inkonyek o sesen? Idol iyie anaa enadol tung'ani.

⁵Amaa inkolong'i inono ketiu anaa inkolong'i e tung'ani aashu ilarin linono ketiu anaa ilarin le tung'ani?

⁶Metaa ing'oru aturu ing'ok aainei, nijurru ninche.

⁷Ore hoo duoo nayiolo ajo iyiolo nchere maata entioto, nemeetae hoo obo laaidim aitajeu too nkaik inono?

⁸Enkaina ino naaitobirua nanu; nikinyaaka taata aibelekenyakino nanu aidaikie.

⁹Tadamu ajo kintobirua apa nanu anaa esarng'ab, naa aikintoki aigil arrinyoki nanu enterit?

¹⁰Keitu iyie kibuku nanu anaa kule nikimposhu nanu anaa eng'orno?

¹¹Kinchopo nanu to lchoni o too nkiri o sesen nikirip nanu aitutum iloik omorlooishi.

¹²Kinchoo nanu enkishui o enyorrata nauno; ore erripoto ino netorripo oltau lai.

¹³Naa ore nena tokitin nisudoyie tiatua oltau lino; kayiolo ajo ena apa eyieuna ino.

¹⁴Tenaas eng'oki, nikiut nanu, nimikipalaki nanu entorroni ai.

¹⁵Naa tenara oltorrono, oi kewan ai. Naa te nara osupat, nemashumu elukunya ai, amu aabore enkurruna, naing'or olosilisili lai.

¹⁶Naa te nadumu kewan ailepie, niking'oru nanu anaa olng'atuny ore ake sii nias ine nking'asia te nkaraki nanu;

¹⁷intang'ejuk shakenisho ino te nkaraki nanu, niponaa engoro ino aitubulu te nkaraki nanu, niyau ilororani ng'ejuko maatigilunore nanu.

¹⁸“Kainyoo peyie kiyawua nanu aitupuku te nguset? Enaikash apa tenatua eitu aadol toki,

¹⁹natiu anaa aimaatae apa aekata. Aatanapaki te nguset aaya enkurare.

²⁰Aimekuti inkolong'i enkishui ai? Tapalaki nanu, pee atum anoto enkiti kiyagata.

²¹Eton eitu alo ine nemashukunore ina kop engoro natii enaimin nagut,

²²enkop engoro o long'oling'oli naa ore ewang'an netiu anaa enaimin.”