Read Maasai Bible – Biblia Sinyati Yoab 12 Bible Online

Yoab 12 - Maasai Bible – Biblia Sinyati bible

Yoab 12

¹Neitoki Yob awal ajo,

²“Irara iltung'ana, naa keish eng'eno nagut te ntae teniyeye.

³Kake kaata ening'unoto anaa ntae; madou sii doi nanu te ntae. Aing'ae lemeyiolo intokitin naaijo kuna?

⁴Kara nanu entoki nakueniyieki too ilchoreta laainei, nanu, ilo oipoto Enkai naawaliki ninye nanu, oltung'ani supat lemeeta entioto, ataa entoki nakueniyieki.

⁵Ore tiatua ndamunot oo ltung'ana lemeeta enyamali naa olmena te lelo ootijing'a olbuket ore te ninye, oltung'ani oata olbuket ake obatata.

⁶Ore ilng'oborri loo laikonyak neeta eseriani, ore lelo ooitagor Enkai neserian, lelo oonap enkai enye aapik inkaik enye.

⁷“Kake inkilikuana ing'uesi, naa aikinteng'en ninche iyie, ore nena motonyi o loing'ang'e, naa aikiliki ninche iyie;

⁸aashu inkaitubulu e nkop, naa aikinteng'en iyie; ore lelo sinkir le naiposha naa aikimbalakinye iyie.

⁹Kaa te kuna pooki nemeyiolo ajo, enkaina Olaitoriani nataasa ena.

¹⁰Etii atua enkaina enye enkishui e pooki toki naishu, netii enkiyang'et e pooki tung'ani.

¹¹Aimetem enkiok irorei, anaa enaishamisham olng'ejep endaa?

¹²Ketii eng'eno nagut atua emoruao, ore ening'unoto netii atua enkadori oo nkolong'i.

¹³Atua Enkai etii eng'eno nagut o emagilanisho; keeta eutaroto o ening'unoto.

¹⁴Tenesulaki enkop, nemeetae oloidim atesheta; teneikenoo oltung'ani tiatua, meetae oloidim atabolo.

¹⁵Teneibooyo inkariak, netoyu pooki; teneirriwaa aipang'ie, nenum enkop.

¹⁶Atua ninye etii engolon o eng'eno nagut; ore ilo oleji o lolejisho naa ilenyena.

¹⁷Eiwuang'ie ilautarok meeta toki, neitaa ilarishak ilmoda.

¹⁸Eitadoyio ilaiguanak, neitaa ninche ilooena, neeniki impolosi enye inkeenta o mpolosi.

¹⁹Etorikoyie ilapolosak meeta toki nenang'aa lelo magil.

²⁰Emitiki enkiroroto lelo oisiligayu neya aoru emusunoto lelo tung'ana kituaak.

²¹Ebukoki enkurruna lelo kituaak, neitololong ina keene e mpolos e ilo ogol.

²²Eibalunye nena naagut e naimin, neyau enaimin nagut apik ewang'an.

²³Eitaa ninye iloreren kituaak, neitoki aidakie ninche, eitasapuk iloreren, nerikoo aiwuang'ie.

²⁴Keya aiwuang'ie ening'unoto too laiguanak le nkop, neisho ninche metilimanata to lpurkel lemetii enkoitoi.

²⁵Keirrapirrapisho ninche te naimin metii ewang'an neimerrimer anaa olamerani.”