Read Maasai Bible – Biblia Sinyati Yoab 2 Bible Online

Yoab 2 - Maasai Bible – Biblia Sinyati bible

Yoab 2

¹Neitokini ake aata ae olong naetuo ilmalaika le Nkai aaitoduaaya ate te dukuya Olaitoriani, nelotu sii ninye Sheitani te nebo ninche aitoduaaya kewan te dukuya Olaitoriani.

²Nejoki Olaitoriani Sheitani, “Kaji doi iyie ing'uaa?” Newaliki Sheitani Olaitoriani ajoki, “Aing'uaa idie o idie te nkop, nalilita te shumata o tiabori.”

³Nejoki Olaitoriani Sheitani, “Itoduaa osinka lai Yob, olaa meetae olonyaanyukie ninye te nkop o lemeeta entioto naa oltung'ani oitashe too sipat, oltung'ani oure Enkai neibelekenye aing'uaa intorrok? Eton ake eibung'ita enkirukoto enye anaa apake, hoo nikiewuo arrumoki ninye mataarare, meeta ninye enataasa.”

⁴Ina pee ewaliki Sheitani Olaitoriani ajoki, “Olchoni to lchoni! Keitayu oltung'ani pooki toki naata te nkaraki enkishui enye.

⁵Kake intorioi sii iyie enkaina ino tenakata, iseyie sii iyie oloito lenye o sesen lenye, naa aikimor ninye aitoriokino enkomom ino.”

⁶Nejoki Olaitoriani Sheitani, “Ng'ura ajo, etii ninye nkaik inono enkishui enye ake miseyie.”

⁷Metaa eshomo Sheitani aing'uaa enetii Olaitoriani, nelo aisilisil Yob apik inkirondoni torrok naang'u eiteru too ndapi oo nkejek enyena o metabaiki elukunya enye.

⁸Neya Yob embelati e moti oo nkulupuok, nelo aton to lchala loo suut aoj kewan.

⁹Ina pee ejoki enkitok enye, “Keton ake imbung'ita akurraki enkirukoto? Kainyoo pee midek Enkai pee itum atua.”

¹⁰Kake etiaaka Yob ninye, “Iro iyie anaa nabo oo nkituaak naamoda. Aiking'amu esidai te nkaina Enkai, nimiking'amu intorrok?” Ore te kuna pooki eitu eas Yob eng'oki te nkutuk enye.

¹¹Ore ina kata pee ening ilchoreta le Yob okuni ina torroni natijing'aka Yob, nepuonu pooki eing'uaa wuejitin enye, Elifas le Teman o Bildad le Shua o Sofar le Naamat. Negelu pooki olkekun opuonu tenebo aaitobor neitagol sii.

¹²Ore ake pee edol ninche ninye eton elakuaniki, eitu ninche eyiolou ninye; neyietu aaishir nepolos ilkilani lenye neisuaaki enterit ilukuny eing'or keper.

¹³Netoni te nebo ninye te nkop inkolong'i ile o nkewarietin enye; nemeetae hoo obo otaboloko ninye enkutuk airorie, amu etoduaa ninche aajo ore osomit lenye naa aikitok oleng.