Read Maasai Bible – Biblia Sinyati Yoab 27 Bible Online

Yoab 27 - Maasai Bible – Biblia Sinyati bible

Yoab 27

¹Neitoki ake Yob airo nejo:

²“Ore anaa enaishu Enkai, ilo laaitung'uayie esipata ai, o ilo Magilani, ilo otipika oltau lai emion;

³ore ake ninye aishu, netii enkiyang'et e Nkai nkumeishin aainei,

⁴mairo te nkutuk ai mbaa e lejare, nemeibalie olng'ejep lai enemesipa.

⁵Metalakuana te nanu elimunoto nchere, itisipa intae, ore omatua, maiwuang'ie aekata enkitashoto ai e sipata.

⁶Ekaibung akurraki esinyatisho ai, nemaitiak, maaitukurru oltau lai too nkolong'i aainei pooki.

⁷“Metanyaanyukie olmang'atinta lai olarruoni, nincho ilo laadumakino aarare etiu anaa olemeeta esipata.

⁸Amaa kainyoo osiligi le ilo lemeure Enkai teneiwuang'ie Enkai ninye, teneiwuang'ie Enkai enkishui enye?

⁹Kening Enkai enkishirata enye, tenebaiki ninye enyamali?

¹⁰Keshipakino ninye ilo Magilani? Keipot ninye Enkai pooki kata?

¹¹Ekaaiteng'en nanu iyie enkipirta e nkaina e Nkai; ore pooki natii atua Olmagilani nemaisudoo.

¹²Ng'ura ajo, indipa pooki aatodol maate, kainyoo naa pee itaa pooki ilo oiro mbaa e pesho?

¹³“Ena erubata o ltung'ani torrono te Nkai, naa ina enjung'ore nang'amu ilo oitorogonyisho te ilo Magilani:

¹⁴Teneponari inkera enyena, naa kemut olalem, ore eishoi enye nemetum endaa naraposh.

¹⁵Ore lelo ootelekutua neye to lmeitai ore nkolia enye nemeidim aaishira.

¹⁶Ore hoo neiturrurr enkosholai anaa enterit, nerup inkilani anaa esarng'ab;

¹⁷keidim aiturrurro, kake lelo supati ooishop, ore lelo lemeeta entioto neor enkosholai.

¹⁸Ore enkaji nashet ninye netiu anaa enkaji o lkendi, anaa olng'obor oitobiru olarriponi.

¹⁹Kelo ninye endapash aa karsis, neyooki ainyototo eishunye karsisisho enye kebol inkonyek enyena, nenyorriki eshomo enkarsisisho enye.

²⁰Keipang'aki ninye oloputukunyi anaa oloirrag le nkare; ore kewarie nenap ninye osiwuo sapuk.

²¹Kedumu ninye olkutati lo loo saen neya; eoroo ninye aitung'uaa ewueji enye.

²²Kekut olkutati ninye meeta olng'ur ina kata etem ninye ailany engolon enye.

²³Keoshoki olkutati ninye nkaik, neiture ninye aitupuku te wueji enye.”