Read Maasai Bible – Biblia Sinyati Yoab 34 Bible Online

Yoab 34 - Maasai Bible – Biblia Sinyati bible

Yoab 34

¹Neitoki Elihu ajo:

²“Entoning irorei laainei, intae iltung'ana ng'eni, nikirrugokiki enkiok, intae ooyiolo;

³amu etem enkiok irorei, anaa enaishamisham olng'ejep endaa.

⁴Emategelu iyiook ina nasipa; ematujurru tiatua ate ina sidai.

⁵Amu etejo Yob, ‘Maata nanu entioto, kake Enkai naawa esipata ai;

⁶Ore hoo naata esipata aaikenayioki aajo olaimonkoni; meishiunoyu olbae lai, hoo nemaata entorroni.’

⁷Kalo tung'ani onyaanyukie Yob ook esurdaanyata anaa enkare,

⁸ilo olo te ncholiek oo laasak loo ntorrok, neiriamariyie iltung'ana arruok?

⁹Amu etejo ninye, ‘Meeta toki natum oltung'ani teneshipakino Enkai.’

¹⁰“Metaa, entoning'oki, intae iltung'ana ooata ening'unoto, metalamari ina te Nkai, tenaa keas ninye enkarruoisho, metalamari to Lmagilani tenaa keas ninye entorroni.

¹¹Amu ore te risioroto e siaai e tung'ani keitalakuni te ninye, naa ore te risioroto oo nkoitoi enyena nelaaki ninye.

¹²Ore te sipata meas Enkai entorroni, nemeboin Olmagilani esipata.

¹³Kaing'ae oishoo ninye metaa olaitasheikinoni le nkop? Naa kaing'ae otipika ninye meitasheiki enkop pooki?

¹⁴Tenerriny ninye enkiyang'et enye makewan, neiturrurroki kewan enkiyang'et enye,

¹⁵neidaaya iseseni pooki tenebo nerrinyokino oltung'ani atua enterit.

¹⁶“Tiniata eyiolounoto, toning'u ena; toning'o ina najo nanu.

¹⁷Amaa ilo lemenyor esipata, keitoreisho? Idung'oki iyie enkiguana ilo asipani naa magilani

¹⁸aing'ae ojoki olaiguanani, ‘Miata tipat’ nejoki ilkituaak, ‘Irara arruok;’

¹⁹ilo lemeitodolu olkep too lkituaak, nemeshilaa ilo karsis aitalang ilo aisinani, amu ore ninche pooki naa esiaai oo nkaik enyena?

²⁰Ore te nkiti kata neye ninche; ore te mpolos e nkewarie neari metuata ore lelo magil neyae ninche nemme too nkaik e tung'ani.

²¹“Amu etii nkonyek enyena shumata nkoitoi e tung'ani, nedol ninye iroruat enyena pooki.

²²Metii osina aashu enaimin nagut, ine neisudoriyie ilaasak loo ntorrok ate.

²³Amu eitu eutu enkata te pooki tung'ani pee elo dukuya Enkai te nkiguana.

²⁴Eiwuang'ie ninye lelo magil eitu eng'as ajurru, nepik kulikae iwuejitin enye.

²⁵Ore amu keyiolo ninye isinaitin lenye, keibeleleng'oo ninche te nkewarie, nepurdi ninche.

²⁶Keosh ninye ninche te nkaraki enkarruoisho enye edolita pooki tung'ani.

²⁷Amu eibelekenyate ninche aany esuj ninye nemeikenaa hoo enkoitoi enye nabo,

²⁸pee etum aaishoo olkiyioi le ilo aisinani elotu enetii, netoning'o ninye enkishirata e ilo oata enyamali.

²⁹Amaa tenegira, kaing'ae oidim aiguanare? Amaa teneisudoo enkomom enye, kaing'ae oidim atoduaa ninye, aa olo losho ora anaa oltung'ani?

³⁰Meitoreisho iltung'ana lemeure Enkai, pee mepik iltung'ana orreshet.

³¹“Ketii obo otiaaka Enkai, ‘Anoto enkitamioto oleng,’ maitoki aekata aitadiak.

³²Inteng'enaki nanu ina nemadolita; tenataasa nanu entorroni, nemaitoki aekata aigil aas?

³³Keitobir ninye ina ninyorraa iyie, amu itanya iyie ninye? Amu meeta nchere pee meyie ogelu; neme nanu ogelu metaa imbalie ina niyiolo.

³⁴Ekaajoki nanu iltung'ana le ning'unoto, ore lelo tung'ana ng'eni laainining'ito nanu nejo,

³⁵‘Ekeiro Yob meeta eng'eno, ore irorei lenyena nemetii eng'eno nagut.’

³⁶Enaikash tenetemi Yob o meiting'o, amu kewal ninye anaa iltung'ana torrok.

³⁷Amu keponiki ninye engolong'u ing'ok enyena, keosh inkaik enyena tiatua iyiook, neponaa irorei lenyena akeshare Enkai.”