Read Maasai Bible – Biblia Sinyati Yoab 35 Bible Online

Yoab 35 - Maasai Bible – Biblia Sinyati bible

Yoab 35

¹Neitoki Elihu ajo,

²“Idamu iyie ena nijo kesipata? Ijo iyie, ‘Esipata ai ena te dukuya Enkai,’

³amu inkilikuanu ajo, ‘Kainyoo tipat naata nanu? Kaa sipata nanu aata alang tenataasa eng'oki?’

⁴Ekaawaliki nanu iyie tenebo ilchoreta linono likiboitare.

⁵Ing'ura keper pee idol, naa ng'ura nena atampo, naatii shumata oleng shumata iyie.

⁶Amaa tinitaasa eng'oki, kainyoo indim ataasa pee igilunore ninye? Naa amaa te netoponari intorrok inono, kaa iyie intaas ninye?

⁷Amaa tinira iyie asipani kainyoo inchoo ninye; aashu kainyoo doi eng'amu ninye te nkaina ino?

⁸Ore intorrok inono naa oltung'ani laaijo iyie eipirta ore esupatisho ino naa enkerai e tung'ani.

⁹“Ore te nkaraki nena kibookinot kumok e nkop e tung'ani neishir iltung'ana; keipotu ninche eretoto te nkaraki enkaina e ilo Magilani.

¹⁰Kake metii olojo, ‘Koree Enkai Olaitobirani lai, ilo oishoru isinkolioitin te nkewarie;

¹¹ilo oiteng'en iyiook alang nena ng'uesi enkop neiteng'en iyiook aitalang imotonyi o loing'ang'e?’

¹²Keishir ninche te idie, mewaliki ninye ninche, te nkaraki ilo wuasa loo ltung'ana torrok.

¹³Kesipa tukul mening Enkai enkishirata e pesho, nemeshilaa ilo Magilani ninye.

¹⁴Kebaa naa elus tenijo midolita ninye, inchere etii enkiguana dukuya ninye, naa ninye iyie iyanyu!

¹⁵Neaku ore naa taata amu meitameisho engoro enye, nemeinining'u ninye oleng intorrok.

¹⁶Kebol Yob enkutuk enye te nkiroroto e pesho, neponaa irorei lemeeta eng'eno.”