Read Maasai Bible – Biblia Sinyati Yoab 37 Bible Online

Yoab 37 - Maasai Bible – Biblia Sinyati bible

Yoab 37

¹“Ore ake sii tena neikirikira oltau lai, nepuku aing'uaa ewueji enye.

²Toning'o endarata o ltoilo lenye o endarata napuku te nkutuk enye.

³Abori keper pooki eimie ninye ina darata, ore enkiwuang'ata enye, neisho meshomo ilpijat pooki le nkop.

⁴Ore pee elusoo neikurrukurr oltoilo lenye; nedaru ninye to ltoilo lenye le nkitoo nemeibooyo ninye inkiwuang'at tenening'i oltoilo lenye.

⁵Kedaru Enkai te nking'asia to ltoilo lenye; keas ninye imbaa sapuki nimikindim aatoning'u.

⁶Amu kejoki ninye enkare nataa osoit te nkirobi, ‘Tadoiki enkop;’ nejoki enkirujuruj tenebo enchan, ‘Entagol.’

⁷Enuk ninye inkaik e pooki tung'ani pee etum iltung'ana pooki aatayiolo esiaai enye.

⁸Ina pee epuo ing'uesi entim irrumati lenye, neitirring'a too lkutot lenye.

⁹Nepuku olkutati te wueji enye, o enkijape to lkutati le nkidapash.

¹⁰Te nkiyang'et Enkai eishoruni isoito le nchan, ore nkariak naalala neitaa enkare osoit.

¹¹Eirotoki ninye enkatampoi nairrusha enkare; ore nkatampo neidapash enkiwuang'ata enye.

¹²Eipila ninche aamanaa te utaroto enye, pee etum aaitabai nena pooki naaitanapa ninche, tioriong eina kop namanyayu.

¹³Enkai nairriu enchan metashaiki enkop, keidim airriu meitamio iltung'ana, anaa eitodol ninche enyorrata enye.

¹⁴“Toning'o ena iyie Yob; intasho ineneng'a nena siaaitin e nking'asia e Nkai.

¹⁵Iyiolo iyie eneikunaki Enkai enkitanapata enye ntokitin, neisho ina kiwuang'ata enkatampoi enye metawang'a?

¹⁶Iyiolo iyie enkiroishi oo nkatampo, nena baa e nking'asia e ilo oata eng'eno nalulung'a.

¹⁷Iyie laa ore nkilani enyena keirowua ina kata eitirring'e enkop, te nkaraki olkutati le kopikop?

¹⁸Indim iyie anaa ninye aisalaasha keper, aitagolo anaa enking'uret nasholuno?

¹⁹Inteng'ena iyiook enikipuo aajoki ninye, mikindim iyiook aayau ororei lang te nkaraki enaimin.

²⁰Kejokini ninye nchere ekairo nanu? Ketang'uarra aekata oltung'ani ajo keishiaakino neijori ninye?

²¹“Ore taata meidim iltung'ana aaing'ura ewang'an, ina kata aa sapuk ewang'an te keper ina kata eidipa olkutati aimai neor.

²²Kelotu te moikuape esikar e saabu; eishopokino Enkai enkitoo enking'asia.

²³Ore ilo Magilani, mikiindim aanoto ninye, kitok ninye te ngolon o too sipat ore esupatisho natimitunye mepal ninye.

²⁴Ore te nkaraki ina keure iltung'ana ninye; meshilaa hoo lelo oojo aing'eni te lejare enye maate.”