Read Maasai Bible – Biblia Sinyati Yoab 38 Bible Online

Yoab 38 - Maasai Bible – Biblia Sinyati bible

Yoab 38

¹Neitoki Olaitoriani awaliki Yob to lkutati:

²“Aing'ae ele oitomisimis enkikoo too rorei lemetii eng'eno?

³Intasho anaa olee, kaaikilikuanishore nanu iyie, naa aikimbalakinye iyie nanu.

⁴“Kaji apa itii iyie ina kata napik olkitamanyunoto le nkop? Tolikioki, tena iata eyiolounoto.

⁵Aing'ae oibalie ntemat o lkitamanyunoto le nkop Kesipa iyiolo iyie! Aashu aing'ae oyietaa ilo gosoi aitaman olkitamanyunoto le nkop?

⁶Kainyoo naitasheyie ng'apeta enyena, aashu aing'ae oitasheyie osoit lenye lo lmairroto,

⁷ina kata eranyisho ilakir le ntadekenya tenebo, nebuaku ilmalaika pooki le Nkai te nchipai?

⁸“Aashu aing'ae oiken ina aiposha too nkikeneta, ina kata nadanya aing'uaa enguset;

⁹tenaitaa nanu nkatampo olkila lenye, naitaa enaimin enkimulumulet enye,

¹⁰nautaki ninye ilpolosien, napik iloom ooikenieki nchomito,

¹¹najo, ‘Ene taa ilotu abaiki, nimigiroo, naa ene ebaiki olwuasa loo lopir linono’?

¹²“Intanapa ae olong entadekenya anaa ninteru nkolong'i inono, nincho entadekenya metayiolo ewueji enye.

¹³Peyie etum aibung'a ineeiting'ie enkop, neipiripirori iltorrok aaitung'uaa ninye?

¹⁴Keibelekenyi ninye anaa enterit natii abori olmishire, neibelekenye emua enye anaa enkila.

¹⁵Ore too ltorrok neibooki ewang'an enye, ore enkaina enye natudumuaki aailepie negili.

¹⁶“Itijing'a oshi aikata atua nkonyek e naiposha aashu ilo tiatua enegut enaiposha too nkejek?

¹⁷Aikintoduaaki iyie inchomito e keeya, anaa itodua iyie inchomito e naimin nagut?

¹⁸Itoning'uo iyie asipu endapasho enkop? Imbalunye tiniyiolo kuna pooki.

¹⁹“Koree doi ina oitoi nalo emanyisho e wang'an, naa koree emanyisho e naimin

²⁰peyie itum aitabaiki ninye olpolosie lenye, peyie itum atumusu atayiolo nena oitoi naapuo enkang enye?

²¹Iyiolo iyie amu kitoiwuoki apa ina kata, ore esiana oo nkolong'i inono naa kumok!

²²“Itijing'a iyie ilkompen ooshumieki enkare nataa osoit le nkirobi, anaa itodua iyie nena ajijik naashumishoreki oo soito le nchan,

²³lelo apa laiteng'ela nanu te nkaraki enkata enyamali, te nkolong o larrabal o enjore?

²⁴Koree enkoitoi nalo ine wueji neidapashieki ewang'an aashu ewueji neidapashieki olkutati lo loo saen tioriong enkop?

²⁵“Aing'ae otuturo olbaata oim enkare enchan, neitobir enkoitoi te nkaraki endarata.

²⁶Pee eyau enchan enkop ine nemetii oltung'ani, ilo purkel lememanya oltung'ani.

²⁷Pee eitaraposh ina kop mijooni nememanya, neisho enkop metubulaki nkujit?

²⁸“Keeta enchan papaai lenye, naa aing'ae ilo oitobirua ilkitong'at le nkoileelio?

²⁹Ke nguset e ng'ae etupukunye isoito le nchan, naa aing'ae otoiwuo isoito le nchan le shumata?

³⁰Etoyu nkariak negolu anaa soito, ore oriong eng'uton netoyu agolu te nkirobi.

³¹“Indim iyie ateena ilpisia loo lakir, anaa intololong ieneta e orion[5]?

³²Indim iyie atuutai ilakir too nkatitin enye, aashu indim iyie atorikoi olng'arurumi tenebo ilkuoo lenyena?

³³Iyiolo iyie nkiguanat e keper? Indim iyie aitasheyie enkitoria enye te nkop?

³⁴“Indim iyie atudumu oltoilo lino aitabaiki nkatampo, pee kitum oloirrag loo nkariak aaitoipoi iyie?

³⁵Indim iyie airriwai inkiwuang'at pee etum aashom, nikijoki ninche iyie, ‘Noona iyiook?’

³⁶Aing'ae otipika eng'eno nagut atua oltau lo ltung'ani, aashu aing'ae naishoo elukunya o ltung'ani ening'unoto?

³⁷Aing'ae oidim aikena nkatampo te ng'eno nagut? Anaa aing'ae oidim atipika ilbenia le nkare.

³⁸Ina kata eibung'a enterit aaku esarng'ab, neibung'a pooki aaku nabo?

³⁹“Indim iyie atarreshoki olng'atuny entoki nanya, aashu intaraposho enkoshoke oo nkiyioitin o lng'atuny,

⁴⁰ina kata eisudori too nkapuniaa enye, aashu eirrag aanyisho too rrumati lenye?

⁴¹Aing'ae oitoti ilkurruki, ina kata eishiraki inkiyioitin enye Enkai, nemanimanaa eitu etum endaa?