Read Maasai Bible – Biblia Sinyati Yoab 5 Bible Online

Yoab 5 - Maasai Bible – Biblia Sinyati bible

Yoab 5

¹“Impotisho taata, ketii hoo obo liking'amaa iyie? Kalo obo loo lmalaika imbelekenyakino iyie?

²Kesipa ore enkuretisho nalus naa kear olmodai ore olom near ilo lemeeta eng'eno.

³Atoduaa ilo modai enoto ntona, kake atasioko nanu adek emanyisho enye.

⁴Ore ilayiok lenyena nelakuaniki eseriani, etumutaki ninche aaidaikie te kishomi, nemetii hoo obo oitajeu ninche.

⁵Ore enkikesare enye nenya lelo ooata esumash, naa keya doi ninye aitayu tiatua ilkiku; ore ilooata enkure neipang'ipang eing'oru enkarsisisho enye.

⁶Amu ore olosilisili neme enterit epukunye, ore enyamali neme te nkop ebulu.

⁷Kake etoikioki oltung'ani enyamali anaa enailep iltiil le nkima shumata.

⁸“Ore nanu, naa kaing'oru Enkai, naa Enkai apik nanu enkoitoi ai.

⁹Ilo oas isiaaitin sapuki enking'asia nemejurrunoyu te nguton, intokitin kumok enking'asia nemeikenayu;

¹⁰eisho ninye enchan metashaiki oriong enkop, neirriwaa inkariak metijing'a nkurman.

¹¹Nedumu ailepie lelo oobor ore lelo ooishir nedumuni aailepakinye eneserian.

¹²Neitaa pesho nkitobirat e lelo loo losekin, metaa metum inkaik enye hoo dupoto.

¹³Eya ninye lelo ng'eni to losek lenye maate, ore inkitobirat e lelo lo losek neiting'ie asioki.

¹⁴Ketum ninche enaimin te ndama, neirrapirrapisho enaipirie enkolong, anaa lootii atua enkewarie.

¹⁵Kake keitajeu lelo okishin too nkutukie enye; ore iloomena neitajeu te nkaina eilo magilani.

¹⁶Metaa keeta ilo aisinani osiligi, ore imbaa nemetii isipat nenuk enkutuk enye.

¹⁷“Ing'ura ajo, keshipa ilo tung'ani oisikong Enkai; metaa mimenaa ina kisikong'ata eilo magilani.

¹⁸Amu kepik ninye olbae, neitoki aen, neoshisho ninye kake aikinchiunye enkaina enye.

¹⁹Aikintajeu ninye iyie too nyamalaritin ile, ore tenaapishana nemeeta entorroni nikintoki aiseyie.

²⁰Ore to lameyu naa aikilaku iyie te keeya, ore to larrabal sapuk nikilaku aitung'uaa engolon eilo alem.

²¹Aikisudori iyie teina kirowuaj e ilo ng'ejep, nimiureyu enkidaaroto tenebau.

²²Ore te mutata o to lameyu nikueni iyie, nimiureyu nena ng'uesi e nkop.

²³Amu mikintanyamal isoito te wueji nitur, nimikintanyamal ing'uesi entim.

²⁴Iyiolou iyie ina kata ajo keserian olng'obor lino, naa inken intare inono nitum pooki elulung'a.

²⁵Iyiolou sii ajo ore iishoritin inono naa keaku kumok, naa neijia etiu inkera eishoi ino, kebayu anaa inkujit enkop.

²⁶Ilo kenya enkurare ino itaa olpayian kitok, anaa enkano naku nabaiki ewueji neidong'ieki te nkata enye.

²⁷Ng'ura ajo, king'orutua kuna aajurru, naa kesipa. Toning'o, naa tayiolo ninye te nkaraki esidano nikiyaki.”