Read Maasai Bible – Biblia Sinyati Olkerempe le Nkai 102 Bible Online

Olkerempe le Nkai 102 - Maasai Bible – Biblia Sinyati bible

Olkerempe le Nkai 102

¹Enkomono e ilo onyamal, etashala neishiraki Olaitoriani. Toning'o enkomono ai, Olaitoriani; nchoo enkishirata ai meeu enitii!

²Mikisudorie iyie nanu enkomom ino te nkolong o sina lai! Irrugokoki enkiok ino tawalikiaki nanu tasioki teina olong naipotisho!

³Amu kelusoo nkolong'i aainei anaa empuruo, neyupuyup iloik laainei anaa olkokuet.

⁴Etooshoki oltau lai aapurd anaa olkujita netoyu, naarikino enkinosata e ndaa ai.

⁵Ore te nkaraki embuakunoto e nkishirata ai, neibiitiari osesen lai.

⁶Atotiwuo nanu anaa olkurragos li ong'ata onyaisho, anaa emotonyi oo nkiyiaa oo wuejitin neeliyio,

⁷kairrag nanu nemaapuku njo, atiu nanu anaa emotonyi naliyio te nchumata e nkaji.

⁸Ore endama pooki naainyal nanu ilmang'ati laainei, ore lelo laasukeny nanu neitaa enkarna ai oldeket.

⁹Amu nkuruon nanu anya aitaa endaa, naitushulaki ilkiyio laainei ina naok.

¹⁰Ore te nkaraki empushuna ino o engoro ino; amu kitudumua nanu nikinang'aa.

¹¹Etotiwuo nkolong'i aainei anaa oloip le nteipa; atoyio nanu atiu anaa nkujit.

¹²Kake ore iyie Olaitoriani, itii olorika le nkitoo ntarasi; nebaiki enkarna ino iishoritin pooki.

¹³Idumunye iyie aing'urrie Sion; etabawua enkata pee incho ninye omom, etabawua enkata apa nategeluaki.

¹⁴Amu ile tipat isoito lenyena too sinkan linono, neing'urrie ninche enterit enye.

¹⁵Kepuo iloshon aaureyu enkarna o Laitoriani, neureyu ilaiguanak pooki enkitoo ino.

¹⁶Amu kelo Olaitoriani ashet Sion, neliooyu ninye te nkitoo enye;

¹⁷neshilaa ninye enkomono e ilo aisinani, nememenaa ninye enkomono enye.

¹⁸Nchoo meigeri kuna too ishoritin naapuonu, pee etum lelo tung'ana lemeino aaisisa Olaitoriani:

¹⁹nchere eing'ura ninye abori teine wueji e shumata nesinya, te keper eing'ura Olaitoriani enkop,

²⁰pee etum atoning'o olkiyioi loo looena, pee etum atalaai lelo ooigerokoki keeya;

²¹pee etum iltung'ana te Sion aaibalunyie enkarna o Laitoriani, neibalunyie enkisisa enye te Yerusalem,

²²te neiturrurro iloreren te nebo, o nkitoriat, pee eserem Olaitoriani.

²³Etigila ninye engolon ai te mpolos; eitodorropu ninye nkolong'i aainei.

²⁴“Na Ai ai,” atejo nanu, “Mikiya nanu tene, te mpolos oo nkolong'i aainei, iyie olobikoo ilarin lenyena tiatua iishoritin pooki!”

²⁵Apa moitie iyie itipika olkitamanyunoto le nkop, ore keper naa esiaai oo nkaik inono.

²⁶Neidaaya ninche, kake ibikoo iyie; keidaaya ninche pooki anaa ilkilani. Imbelekeny iyie ninche anaa nkilani neishari ninche.

²⁷Kake mimbelekenya iyie, nemeeta ilarin linono enkiting'oto.

²⁸Ketoni nkera oo sinkan linono te seriani, ore eishoi enye naa keitasheyieki te dukuya iyie.