Read Maasai Bible – Biblia Sinyati Olkerempe le Nkai 104 Bible Online

Olkerempe le Nkai 104 - Maasai Bible – Biblia Sinyati bible

Olkerempe le Nkai 104

¹Isisa Olaitoriani lo tau lai! Olaitoriani Enkai ai, ira iyie kitok! Kinchopokoki iyie enkanyit o enkitoo,

²iyie oishopoki kewan ewang'an anaa olkila, iyie oisalaasha keper anaa olng'obor,

³iyie otipika ing'apeta e nkaji ino shumata nkariak, nintaa nkatampo engarri ino oo mbartan, niked inaipuko o siwuo,

⁴nintaa osiwuo ilkiliku linono, nintaa olang'at le nkima ilaisiaayiak linono.

⁵Iyie otipika enkop ilkitamanyunot lenyena, pee meigusugus ae kata.

⁶Nimulumul te nguton anaa olkila; neitashe nkariak too nchumat oo ldoinyo.

⁷Ore te mbuakunoto ino neilanyisho ninche, ore to ltoilo le ndarata ino neilanyisho ninche.

⁸Neilepu ildoinyo, nedoyio ierat aagutu nepuo iwuejitin nitegelaka ninche.

⁹Itipika iyie ilpolosien lemegiroo ninche, pee meigil ninche aaiput enkop.

¹⁰Nchoo iyie nkonyek oo nkariak meturukunye too erat; nenang'ari aaim irishat oo ldoinyo,

¹¹neitook pooki ng'ues e ong'ata; neishu iloitikoishi enkure.

¹²Embata enye etipika motonyi emanyisho enye; neranyisho ninche tiatua ilng'osil lenyena.

¹³Ore te wueji ino neika nintook ildoinyo enkare; netaraposhe enkop too lng'anayio le siaai ino.

¹⁴Iyie oitubulu nkujit te nkaraki nkishu, o nkaitubulu te nkaraki iltung'ana, pee etum ninye aitayu endaa te nkop,

¹⁵o enaisho oo sabibu pee eitiship oltau le tung'ani, o eilata pee eitawang enkomom enye, o endaa pee eitagol enkishui e tung'ani.

¹⁶Etipikaki ilkeek lo Laitoriani enkare aaitaraposh, lelo tarakua le Lebanon apa ootuuno ninye.

¹⁷Te ninche eshetu motonyi nkajijik; neeta ntilagosi nkajijik too lkeek sapuki oonyori.

¹⁸Netii nkineji oo soito ildoinyo adoru, netii nkijijuri ndapidapo.

¹⁹Intobira iyie olapa pee eutu irishat; eyiolo enkolong erishata enye nadoyiorie.

²⁰Intobir iyie enaimin neaku kewarie, ina kata eikurtutari ing'uesi entim aapuo.

²¹Neipur ilkuoo loo lng'atunyo erreshisho, eing'oru endaa enye naing'uaa enetii Enkai.

²²Ore ake pee eilepu enkolong nepuo ninche, neirrag ninche too rrumati lenye.

²³Nelo tung'ani esiaai enye neas esinkaisho enye o memuto.

²⁴Olaitoriani, kebaa enkumoi oo siaaitin inono! Te ng'eno iyie intobira pooki; ebore enkop seuseu oo ntokitin inono.

²⁵Idie etii enaiposha, naa kitok nelala, neuma ntokitin tiatua nemeikenayu ntokitin naaishu sapuki o nkutiti.

²⁶Nepuo imelin teine, o enkukuu naji Lefiatan nintobira iyie pee eiguran teine.

²⁷Iyie eing'or kuna pooki, pee incho ninche endaa enye too rishat enye.

²⁸Ore te nincho iyie ninche, neiturrur ninche, te nilak iyie enkaina ino neiput ninche ntokitin sidain.

²⁹Te nisudoo iyie enkomom ino, neidang ninche, ti niya enkiyang'et enye, neye ninche nerrinyokino enterit enye.

³⁰Ti nirriu iyie Enkiyang'et lino, neitobiri ninche; nintang'ejuk iyie oriong enkop.

³¹Metobikoi enkitoo o Laitoriani ntarasi, metishipayu Olaitoriani too siaaitin enyena,

³²ilo laa te neing'or enkop neikirikira, ilo laa te neiseyie ildoinyo neitupuru!

³³Karanyaki nanu Olaitoriani nkolong'i pooki naishu; arany nanu enkisisa e Nkai eton aata enkishui.

³⁴Inchoo mikintishipa inkibirribirrat aainei amu Olaitoriani nanu ang'idakino.

³⁵Nchoo ilaing'okok metumuti te nkop, naa inchoo ilarruok eishieki! Isisa Olaitoriani lo tau lai! Meisisi Olaitoriani!