Read Maasai Bible – Biblia Sinyati Olkerempe le Nkai 135 Bible Online

Olkerempe le Nkai 135 - Maasai Bible – Biblia Sinyati bible

Olkerempe le Nkai 135

¹Meisisi Olaitoriani! Meisisi enkarna o Laitoriani, enchoru enkisisa intae isinkan lo Laitoriani,

²intae lelo ooitashe tiatua enkaji o Laitoriani, too lgorieti le nkaji e Nkai ang!

³Esisa Olaitoriani, amu aisupat Olaitoriani; enterrep enkarna enye, amu kaaipirisioni ninye!

⁴Amu etegelaka Olaitoriani kewan Yakobo, etegelua Israel aitaa olenye.

⁵Amu ayiolo nanu ajo aikitok Olaitoriani, nayiolo nchere etii Olaitoriani lang te shumata nkaitin pooki.

⁶Ore enaba anaa enayieu Olaitoriani neas ninye te keper o te nkop, tiatua inaaiposha o too neegut pooki.

⁷Ninye oishoo nkatampo meilepa too neeiting'ie enkop, ninye oitobira nkiwuang'at te nkata e nchan neyau olkutati aitung'uaa nkajijik enyena naashumishoreki.

⁸Ninye apa otara ilkikaunot le Misiri metuata, iloo ltung'ana o loo ng'uesi,

⁹ilo laa ore tiatua empolos ino, iyie Misiri, neirriu nkitoduaat e nking'asia, agilunore Farao o sinkan lenyena pooki.

¹⁰Ninye apa ilo otoosho nkuapi kumok nesesekuan ilaiguanak magil:

¹¹Sihon, olaiguanani le Amori o Oog, olaiguanani le Bashan, o nkitoriat pooki e Kanaan.

¹²Neishooyo enkop enye aitaa enjung'ore, enjung'ore too ltung'ana lenye loo Siraeli.

¹³Kebikoo enkarna ino, Olaitoriani, ntarasi o ntarasi, ira iyie ning'oti tiatua iishoritin pooki.

¹⁴Amu keitasheyie Olaitoriani iltung'ana lenyena too sipat, neing'urrie isinkan lenyena.

¹⁵Ore nena kitanyaanyukot oo nkaitin oo nkuapi naa enkosholai o saabu eitobirunyeki, isiaaitin oo nkaik e tung'ani.

¹⁶Keeta ninche nkutukie, kake meiro, keeta nkonyek kake medolisho.

¹⁷Keeta nkiyiaa kake mening'isho, nemeeta enkiyang'et too nkutukie enye.

¹⁸Metotiwuo anaa ninche lelo ooitobiru ninche! Ee metotiwuo neijia pooki ng'ae oisilig ninche!

¹⁹Na aji e Israel, esisa Olaitoriani! Na aji e Aron, esisa Olaitoriani!

²⁰Na aji e Lawi, esisa Olaitoriani! Intae kulo ooure Olaitoriani, esisa Olaitoriani!

²¹Esisa Olaitoriani te Sion, ilo obikito le Yerusalem! Meisisi Olaitoriani!