Read Maasai Bible – Biblia Sinyati Olkerempe le Nkai 139 Bible Online

Olkerempe le Nkai 139 - Maasai Bible – Biblia Sinyati bible

Olkerempe le Nkai 139

¹Enetii olautaroni lo sinkolio. Osinkolio le Daudi. Olaitoriani, kitujurro iyie nanu nikitayiolo nanu!

²Iyiolo iyie enkata naton o enkata nadumunye; imusu iyie ndamunot aainei ilakua.

³Ijurru iyie enkoitoi ai o enkirragata ai, niyiolo iyie oleng inkoitoi aainei pooki.

⁴Ore ninye eitu elotu ororei ajing olng'ejep lai, Olaitoriani, iyiolo iyie pooki.

⁵Kitamana iyie nanu te siadi o te dukuya, ninteleikia enkaina ino shumata nanu.

⁶Ore ena ng'eno naa eikitok oleng te nanu; etii shumata, maidim nanu aibung'a.

⁷Kaji nanu alo pee aailany Enkiyang'et ino? Anaa kaji nanu alo pee aailany iyie?

⁸Te nailep nanu alo shumata, itii iyie ine! Te naitobir nanu endapash ai te nemeneng'a itii iyie ine!

⁹Tenalo nanu too naipuko e nkakenya, nalo amany enaiposha

¹⁰ore sii teine naa enkaina ino naarikoo, naa enkaina ino e tatene naaibung nanu.

¹¹Te najo nanu, “Ncho maaitemoi nanu enaimin, ore ewang'an naamanita nanu neaku enkewarie,”

¹²ore ninye enaimin nememisimis te iyie, kewang enkewarie anaa endama; amu etiu enaimin anaa ewang'an te iyie.

¹³Iyie oitobira osesen lai liatua, iyie likiruburuba nanu tiatua enkoshoke e yieyio.

¹⁴Kaaisis nanu iyie amu iyie eurei naa iyie ole nking'asia. Ine nking'asia isiaaitin inono! Kiyiolo iyie nanu oleng;

¹⁵meisudoro irubat o sesen lai te iyie, ina kata pee aaitobiruni nanu te nkisudoroto, ina kata aaitubuluni nanu te nguton e nkop.

¹⁶Naaing'or nanu inkonyek inono eton eitu aaku toki; neigero te mbuku ino inkarn e pooki, nena olong'i pooki naategeluaki eton eitu ebau.

¹⁷Kebaa tipat oo ndamunot inono te nanu, iyie Enkai! Kebaa enkumoi enye!

¹⁸Te naiken nanu ninche, nelang osinyai. Te nainyototo nanu, natii ake te nebo iyie.

¹⁹Oi naaji tenaa isesekuan olarruoni, Iyie Enkai, pee aatum nanu iltung'ana lo sarge aatalam,

²⁰lelo tung'ana torrok likikeshare iyie, lelo ooilepie ate te ntorroni likigilunore te ntorroni!

²¹Aimaiba nanu lelo likimba iyie, Olaitoriani? Aimamen nanu lelo likigilunore iyie?

²²Kaiba nanu ninche oleng, aitaa nanu ninche ilmang'ati laainei.

²³Tujurroki nanu, iyie Enkai, niyiolou oltau lai! Ineneng'aki nanu niyiolou indamunot aainei!

²⁴Nidol tenaa ketii enkoitoi torrono atua nanu, nikirikoo nanu te nkoitoi intarasi!