Read Maasai Bible – Biblia Sinyati Olkerempe le Nkai 144 Bible Online

Olkerempe le Nkai 144 - Maasai Bible – Biblia Sinyati bible

Olkerempe le Nkai 144

¹Olkerempe le Daudi. Meisisi Olaitoriani, endapidapoi ai, laa ninye oitaarriyian inkaik aainei to larrabal, neitayiolo ilkimojik laainei olarrabal.

²Endapidapoi ai naa osempewuet lai, enkisudoroto ai naa olakordunoni lai, elong'o ai naa ninye ilo lasaru nanu, laa ninye opik iloreren abori nanu.

³Olaitoriani, kainyoo tung'ani lishilaa ninye, anaa enkerai e tung'ani eji nidamu ninye?

⁴Etiu oltung'ani anaa enkiyang'et, etiu inkolong'i enyena anaa oloip oloito.

⁵Irrugu keper ino, Olaitoriani, nilotu adou! Iseyie ildoinyo pee epuru!

⁶Imerlelie inkiwuang'at nindapashaa ninche, ning'oru mbaa inono aitanyamal ninche!

⁷Ntorioi enkaina ino te keper, tokorduaki nanu nikintayu nanu tiatua nkariak kumok, ntung'uayioki inkaik oo leeiking'a,

⁸lelo ooiro elejare too nkutukie enye, laa ore enkaina enye e tatene, naa enkaina e tatene e lejare.

⁹Naa kaaranyaki nanu iyie osinkolio ng'ejuk, Iyie Enkai; te nkawuo oo sinkolioitin naata iusin tomon nanu aaranyaki iyie,

¹⁰iyie oisho ilaiguanak meisula, iyie otokordua Daudi osinka lino.

¹¹Tokorduaki nanu te ilo alem torrono, nikikordu nanu aitung'uaa enkaina e lelo leeiking'a, lelo ooiro elejare too nkutukie enye, laa ore enkaina enye e tatene naa enkaina e tatene e lejare.

¹²Metotiwuo ilayiok lang te lelero enye anaa inkaitubulu naatubulutua aabaya. Metotiutu ntoyie ang anaa ing'apeta oo lmairrot, naatudung'uoki pee eshetieki enkaji e nkitoo o laiguanani.

¹³Metaboreita nkajijik ang naashumishoreki, meiputa mpukunot pooki oo ntokitin; metubula nkerrai ang, aaku nkalifuni o nkalifuni tomon too ndaat;

¹⁴metaraposhoto nkishu ang neisho, nemetum olkibiroto anaa ae torroni; metaa metumi olkiyioi lo sina too nkoitoi ang!

¹⁵Emayiana lelo tung'ana ootum ena mayianata! Emayiana iltung'ana laa Enkai ninye Olaitoriani lenye!