Read Maasai Bible – Biblia Sinyati Olkerempe le Nkai 148 Bible Online

Olkerempe le Nkai 148 - Maasai Bible – Biblia Sinyati bible

Olkerempe le Nkai 148

¹Meisisi Olaitoriani! Meisisi Olaitoriani te keper, meisisi ninye te wueji e shumata!

²Esisa ninye ilmalaika lenyena pooki, esisa ninye ilororani lenyena pooki!

³Esisa ninye enkolong o lapa, esisa ninye intae ilakir pooki oowang!

⁴Isisa iyie keper nalakua, o intae inkariak naatii shumata keper!

⁵Nchoo ninche eisis enkarna o Laitoriani! Amu ninye apa oitanapishe, neitobir ninche.

⁶Naa ninye oitasheyie ninche ntarasi o ntarasi, naa ninye oitayio enkitanapata enye nemeibelekenya.

⁷Meisisi Olaitoriani te nkop, o iyie enaiposha o ntokitin pooki naatii atua,

⁸enkima o enchan oo soito o empaso, o lkutati lo siwuo oitabaya enkitanapata enye!

⁹Ildoinyo o ndoinyo pooki, ilkeek loo lng'anayio o ltarakua!

¹⁰Ing'uesi o nkishu pooki, ntokitin naaiserpepiari te nkop o motonyi naapuo tiaai!

¹¹Ilaiguanak le nkop o ltung'ana pooki, ilkituaak o laitoriak le nkop pooki!

¹²Ilbarnot o selenken te nebo, iltung'ana moruak o nkera te nebo!

¹³Nchoo ninche eisis enkarna o Laitoriani amu enkarna enye ake nara kitok; etii enkitoo enye shumata keper o enkop.

¹⁴Eishoo ninye meishuro emowuo oo ltung'ana lenyena, esisa te nkaraki isinyat lenyena pooki, te nkaraki iltung'ana loo Siraeli ootaaniki ninye. Meisisi Olaitoriani!