Read Maasai Bible – Biblia Sinyati Olkerempe le Nkai 18 Bible Online

Olkerempe le Nkai 18 - Maasai Bible – Biblia Sinyati bible

Olkerempe le Nkai 18

¹Enetii olautaroni le ranyare: Osinkolio le Daudi osinka lo Laitoriani, pee eimaki Olaitoriani to rorei lele sinkolio lenye ina olong apa natimirishore Olaitoriani tialo inkaik oo lmang'ati lenyena o too nkaik e Saulo. Nejo: Kaanyor nanu iyie, iyie Olaitoriani, iyie engolon ai.

²Olaitoriani ninye endapidapoi ai, osempewuet lai, naa olakordunoni, Enkai ai, endapidapoi ai naa ninye asaru, elong'o ai, naa emowuo e njeunoto ai, naa ninye osempewuet lai.

³Aipoto nanu Olaitoriani, laa ninye eishiaakino neisisi, naaitajeuo nanu too lmang'ati laainei.

⁴Aatamana nanu inkeenta e keeya, naaiputukunyie nanu oloirrag le nkare le ntorroni.

⁵Aatamana nanu inkeenta e nemeneng'a, naaipirakinore nanu irresheta le keeya.

⁶Ore tiatua osina lai naipoto Olaitoriani; Enkai ainanu aishiraka maataretu. Ore etii enkaji enye sinyati nening oltoilo lai, ore ina kishirata naishiraka ninye nelo abaiki inkiyiaa enyena.

⁷Neikirikira taa enkop neigirigiro; ore sii ilkitamanyunot loo ldoinyo neikirikira, nejing enkop olokirikiri te nkaraki natagore ninye.

⁸Nepuku empuruo too nkumeishin enyena, nepuku enkima nanyaisho te nkutuk enye, o nkuk naaishu naapuku te ninye.

⁹Neirrugu ninye shumata, nedou alotu enkop; netii emisimisi kitok abori inkejek enye.

¹⁰Neked ninye enchumata olkerubi, nelo tiaai, nelo too naipuko o siwuo.

¹¹Neitaa ninye enaimin enkimulumulet, ore enkitushuret enye naa nkatampo naairrusha naabore enkare.

¹²Ore teina wang'an e nkiwuang'ata natii dukuya ninye, nepuku isoito sapuki le nchan o nkuk e nkima.

¹³Etadara sii Olaitoriani to loing'ang'e, ore Ilo otii Shumata Aisul neitayu oltoilo lenye, neitayu enchan oo soito o nkuk naaishu.

¹⁴Neirriwaa ninye mbaa enyena, neidapash ninche; neyau nkiwuang'at o enkimerlel, neidapash ninche.

¹⁵Neliooyu inkoitoi e nkare tiatua enaiposha, ore ilkitamanyunot le nkop neibalayu aalioyu, te mbuakunoto ino, Olaitoriani, te nkutata e nkiyang'et oo nkumeishin inono.

¹⁶Naabaiki ninye atii enkop, naaya nanu, naaitayu ninye nanu tiatua nkariak kumok.

¹⁷Naakordu ninye nanu te ilo mang'atinta lai ogol, o te lelo laaiba nanu; amu kegol ninche oleng te nanu.

¹⁸Eetuo ninche shumata nanu teina olong o sina lai, kake Olaitoriani ninye entonata ai.

¹⁹Aayaua ninye ewueji nelala; aatokordua ninye nanu amu aatishipakine nanu.

²⁰Aatalaaka nanu Olaitoriani te risioroto oo sipat aainei; te risioroto e sinyatisho oo nkaik aainei aatalaaka ninye nanu.

²¹Amu aibung'a nanu inkoitoi o Laitoriani, neitu nanu alo aing'uaa Olaitoriani Enkai ai te ntorroni.

²²Amu ore nkiguanat enyena pooki netii dukuya nanu, ore nkikoot enyena neitu nanu aiwuang'ie aitalam kewan.

²³Maata apa nanu eleyiata te dukuya ninye, naitalam nanu kewan inkitadiat.

²⁴Ore te nkaraki ina, aatalaaka nanu Olaitoriani te risioroto e supatisho ai, te risioroto e sinyatisho oo nkaik aainei, te dukuya ninye.

²⁵Ore te lelo supati nintodolu esupatisho ino, ore to ltung'ani lemeeta entioto nintodol esinyatisho ino.

²⁶Ore te ilo lemeiduruk nintodol ajo minduruk iyie; ore te ilo otolo nintodol entoloi ino.

²⁷Amu ikordu iyie lelo oobor; kake ore lelo oowuasa nerup ate nintadou.

²⁸Ee, inok iyie oltaa lai; Olaitoriani Enkai ai oitawang enaimin ai.

²⁹Ee, ore te nkaraki iyie namir oltim loo lmang'ati; ore te nkaraki Enkai ai naidim aida esuntai.

³⁰Ore ena Ai, nesipa enkoitoi enye; ore enkisiligata o Laitoriani neuno asipayu; elong'o ninye te lelo pooki oosaru ninye.

³¹Amu kaing'ae Enkai neme Olaitoriani? Naa, kaing'ae endapidapoi neme Enkai ang?

³²Ina Ai naaterretena nanu te ngolon, neitaserian enkoitoi ai.

³³Neiteneneng inkejek aainei anaa entarakuet, naaitaserian ninye nanu too neeika.

³⁴Neitaarriyian ninye inkaik aainei to larrabal, neaku keidim inkaik aatokoriny enkawuo o suyai.

³⁵Kinchoo iyie nanu elong'o e njeunoto ino, ore enkaina ino e tatene naaitagol nanu, ore eretoto ino naaitaa nanu kitok.

³⁶Kinchoo iyie nanu ewueji nelala te nkaraki inkejek aainei, neitu eideketari inkejek aainei.

³⁷Atimira nanu ilmang'ati laainei nainepu ninche; neitu nanu arrinyo o metaba anaa neidaaya ninche.

³⁸Atoosho ninche anang'ie enkop nemeigil ninche aadumunye nebatata ti abori inkejek aainei.

³⁹Amu kiterretena iyie nanu te ngolon, te nkaraki olarrabal; ninchoo ilmang'ati laainei meimiso tiabori nanu.

⁴⁰Iyie oishoo ilmang'ati laainei meibelekenyata aailanyisho, ore lelo apa laaiba naidaikie nanu ninche.

⁴¹Eishira ninche eing'oru eretoto, kake meetae oloitajeu ninche, eishirakita ninche Olaitoriani kake eitu ninye ewaliki ninche.

⁴²Aidong'o nanu ninche metotiwuo anaa enterit te dukuya; atanang'ayie nanu ninche anaa esarng'ab oo nkoitoi naalala e nkanasa.

⁴³Kitokordua iyie nanu aitung'uaa enkesha oo ltung'ana, kintaa iyie nanu endukuya oo loshon; ore iloreren apa lemayiolo naaisiaai nanu.

⁴⁴Ore ake pee aaning ninche nanu naairuk ninche; ore iltung'ana omon naayanyitu nanu.

⁴⁵Etalepori iltung'ana omon, nepuonu ninche eikirikira eing'uaa isempewueti lenye.

⁴⁶Keishu Olaitoriani; meisisi ina dapidapoi ai, meitaae kitok Enkai e njeunoto ai,

⁴⁷ina Ai naitalaku elap nepik iloreren abori nanu;

⁴⁸ilo laakordu nanu too lmang'ati laainei; ee, eikilepunye iyie aitulusoo too lmang'ati laainei; kitokordua iyie nanu too ltung'ana lo larrabal.

⁴⁹Ore te nkaraki ena kaarrep nanu iyie, Olaitoriani tiatua iloreren, narany arrep enkarna ino.

⁵⁰Eishoo ninye enkisulata kitok ilo aiguanani lenye, neitodolu enyorrata nauno te ilo lenye otubukokoki eilata aaput, Daudi o eishoi enye ntarasi.