Read Maasai Bible – Biblia Sinyati Olkerempe le Nkai 19 Bible Online

Olkerempe le Nkai 19 - Maasai Bible – Biblia Sinyati bible

Olkerempe le Nkai 19

¹Enetii olautaroni le ranyare: Osinkolio le Daudi. Keitodolu keper enkitoo o Laitoriani; ore oloing'ang'e neitodolu esiaai oo nkaik enyena.

²Ore enkolong o enkolong neinosakino lomon, ore enkewarie o enkewarie neibalunye eng'eno.

³Meetae enkiroroto, nemeetae irorei; mening'o iltoiloishi lenye;

⁴ore ake eyia, nelo oltoilo lenye aim enkop pooki, ore irorei lenye nebaiki ineeiting'ie enkop. Etipikaka Enkai enkolong manyisho enye to loing'ang'e

⁵ina olong nailepu anaa oloyamisho eipang'u te nkaji enye, o anaa oltung'ani ogol okuet ailanyisho te ng'ida.

⁶Ore enkilepunoto enye naa ineeiting'ie keper eing'uaa, ore imanarot enyena nelo ineeiting'ie ninche, nemeetae entoki naisudoyioki te nkirowuaj enye.

⁷Ore enkitanapata o Laitoriani naa keikishiaan, neitopiu oltau; ore shakenisho o Laitoriani naa kedede, neiteng'en olmodai.

⁸Ore nkikoot o Laitoriani naa sidain, neiting'id oltau; ore nkitanapat o Laitoriani naa kesila, nepik inkonyek ewang'an.

⁹Ore euriata o Laitoriani nemeiduruk, nebikoo ntarasi, ore nkiguanat o Laitoriani nesipa naa supati pooki.

¹⁰Neng'uarrayu ninche oleng aalang saabu, aalang ninye saabu sidai, nemelok sii aalang enaisho oo lootorok nelang olkenkei ooisul.

¹¹Naa ninche eikokieki osinka lino; ore te nkibung'ata enye netii olerrinyore kitok.

¹²Kake kaing'ae omusu nkitarruorot enyena? Ntisinyaki iyie nanu too nkitarruorot naaisudoro.

¹³Imbooi iyie osinka lino too ng'ok o lwuasa, mincho ninche etum engolon tiatua nanu! Pee atum ataa maata entioto nasinyayu too nkitarruorot sapuki.

¹⁴Nchoo irorei le nkutuk ai o nkibirribirrat o ltau lai, eng'amaroyu too nkonyek inono, iyie Olaitoriani, endapidapoi ai, naa olakordunoni lai.