Read Maasai Bible – Biblia Sinyati Olkerempe le Nkai 25 Bible Online

Olkerempe le Nkai 25 - Maasai Bible – Biblia Sinyati bible

Olkerempe le Nkai 25

¹Osinkolio le Daudi. Iyie nanu Olaitoriani aserem.

²Na Ai ai, iyie nanu aisilig, mincho aaitukurruni nanu; mincho ilmang'ati laainei eng'ida te nkaraki nanu.

³Ee, mincho hoo obo likingarakino iyie meitukurruni; nchoo meitukurruni lelo aitang'orok le pesho.

⁴Ntayioloki nanu inkoitoi inono, Olaitoriani; nteng'enaki nanu inkoitoi inono.

⁵Torikoki nanu tiatua esipata ino, nikinteng'en nanu, amu ira iyie Enkai e njeunoto ai; amu iyie nanu aanyita endama pooki.

⁶Tadamuaki nanu to lng'ur lino, Olaitoriani, o te nyorrata ino nauno, amu eetae apa ninche ebaiki moitie.

⁷Midamu iyie ing'ok e kitisho ai, anaa nkitarruorot aainei; ore te risioroto e nyorrata nauno, tadamuaki nanu, te nkaraki esupatisho ino Olaitoriani!

⁸Aisupat naa asipani Olaitoriani; ore te nkaraki ina neiteng'en ninye ilaing'okok te nkoitoi.

⁹Nerikoo ninye lelo oobor te nkoitoi sidai, neiteng'en lelo oobor te nkoitoi enye.

¹⁰Ore nkoitoi pooki o Laitoriani naa enyorrata nauno o esupatisho, te lelo ooibung olning'o lenye lo sotua o shakenisho enye.

¹¹Ore te nkaraki enkarna ino, Olaitoriani, tapalakaki entorroni ai, amu aisapuk.

¹²Kalo tung'ani oure Olaitoriani? Ore ilo tung'ani keiteng'en Olaitoriani ninye te nkoitoi nagelu.

¹³Ore ninye makewan neton te nkiputakinoto, ore nkera enyena nejung enkop.

¹⁴Ore shoruetisho o Laitoriani naa ene lelo ooure ninye, neitayiolo ninye ninche olning'o lenye lo sotua.

¹⁵Etii inkonyek aainei dukuya Olaitoriani anaake, amu keitayu ninye inkejek aainei to rreshet.

¹⁶Torrinyokinoyioki Olaitoriani, niking'urrie nanu, amu kaliyio naata osina.

¹⁷Nchooki enkiyagata te nyamali o ltau lai, nikintupuku nanu tiatua isinaitin laainei.

¹⁸Ing'ura osina lai o enyamali ai, nikipalaki ing'ok aainei pooki.

¹⁹Ng'ura eneba ilmang'ati laainei, o eneba enkiba naaiba ninche nanu te ntoloi.

²⁰Torripo siaake enkishui ai, nikikordu nanu; mikincho nanu aaitukurruni, amu iyie nanu asaru.

²¹Nchoo aagolie nanu esupatisho o emborron, amu iyie nanu aanyu.

²²Talaku Israel, Iyie Enkai, tiatua inyamalaritin enyena pooki.