Read Maasai Bible – Biblia Sinyati Olkerempe le Nkai 27 Bible Online

Olkerempe le Nkai 27 - Maasai Bible – Biblia Sinyati bible

Olkerempe le Nkai 27

¹Osinkolio le Daudi. Olaitoriani ewang'an ai naa enjeunoto ai; kaing'ae nanu aure? Olaitoriani osempewuet le nkishui ai; kaing'ae naa aure?

²Te nepuonu ilarruok shumata nanu, aanya nkiri o sesen lai, lelo mang'ati laainei o larak, nerrorro ninche nebatata.

³Ore ninye te naamuat olorora aaman nemeureishoyu oltau lai; te naadumakino ninye nanu enjore, ore ake etiu neijia naisiliga nanu Olaitoriani.

⁴Entoki nabo nanu atoomono Olaitoriani naa ninye nanu aing'oru; nchere pee abik nanu tiatua enkaji o Laitoriani, nkolong'i pooki e nkishui ai, pee aaing'or enkishiaa o Laitoriani, naikilikuanisho tiatua enkaji enye sinyati.

⁵Amu kaaitushur ninye nanu tiatua olng'obor lenye, te nkolong e nyamali; naaikenoo ninye nanu tiabori o lng'obor lenye, naailepie ninye nanu apik shumata endapidapoi.

⁶Naa keshumuni endukuya ai aailepie neitulusori te lelo mang'ati laainei laamanita, naa kalo nanu aishooyo tiatua olng'obor lenye, ilasarri te mbuakunoto o te ng'ida; naa karanyisho nanu narrep Olaitoriani.

⁷Toning'oki iyie Olaitoriani, te nabuaku nanu aishir, ing'urrieki nanu nikiwaliki nanu!

⁸Itejo iyie, “Ing'oru iyie enkomom ai.” Nikijoki oltau lai iyie, “Enkomom ino, Olaitoriani, ninye nanu aing'oru.”

⁹Mikisudorie nanu enkomom ino. Mirriny iyie osinka lino te ngoro, iyie apa otaa eretoto ai. Mikinturraa nanu, miking'uaa nanu, Na Ai e njeunoto ai!

¹⁰Amu aatung'uaitie nanu papa o yieyio, kake kaadumu nanu Olaitoriani.

¹¹Nteng'enaki nanu enkoitoi ino, iyie Olaitoriani; nikirikoo nanu te neserian, te nkaraki ilmang'ati laainei.

¹²Mikinchooyo nanu too lmang'ati laainei, amu aatudumakinote nanu ilchakenini le lejare, neipang'ipang ninche te ntorroni.

¹³Kairuk nanu ajo kadol esupatisho o Laitoriani, teina kop oo looishu!

¹⁴Taanyu Olaitoriani; ntagoluoyu, nintagol oltau lino, ee, taanyu Olaitoriani!