Read Maasai Bible – Biblia Sinyati Olkerempe le Nkai 30 Bible Online

Olkerempe le Nkai 30 - Maasai Bible – Biblia Sinyati bible

Olkerempe le Nkai 30

¹Osinkolio le Daudi. Osinkolio le nkitarasaroto e Nkaji e Nkai. Kaaisis nanu iyie, iyie Olaitoriani, amu kitudumua iyie nanu ailepunye, neitu incho ilmang'ati laainei aang'idakino.

²Iyie Olaitoriani Enkai ai, iyie nanu aishiraka pee kiretu, nikinchiunye iyie nanu.

³Olaitoriani, ilepunye iyie oltau lai aitupuku te nemeneng'a, nikirrinyoki nanu enkishui tiatua lelo ooshomo aadoiki Engumoto.

⁴Entaranyaki Olaitoriani enkisisa, intae isinyat lenyena, ninchosho enkisisa enkarna enye sinyati.

⁵Amu ore engoro enye naa enkata kiti, ore omom enye naa ene nkishui pooki. Eruko ilkiyio te nkewarie, kake ore tadekenya nelotu eng'ida.

⁶Ore nanu, atejo apa te nkitumurrunoto ai, “Maaiwuang'ieki aekata nanu.”

⁷Ore te nkaraki nanoto nanu omom te iyie, Olaitoriani, nikintagolo iyie nanu anaa oldoinyo; kisudorie iyie nanu enkomom ino, natum osina.

⁸Iyie nanu Olaitoriani aishiraka, naa Olaitoriani ayaka enkomono ai;

⁹“Kaa retoto eeta keeya ai, te nadoyio ajing Engumoto? Eikisis iyie enterit? Kelimu ninye esupatisho ino?

¹⁰Toning'oki, Olaitoriani, niking'urrie nanu! Olaitoriani, taa iyie Olaretoni lai!”

¹¹Imbelekenya iyie enkishirata ai aitaa osinkolio le ng'ida; italaayie iyie ilkuniyiani laainei nikinchopoki nanu eng'ida,

¹²pee kitum oltau lai aisisa iyie nemegira. Olaitoriani Enkai ai, kaaisho nanu iyie enashe ntarasi.