Read Maasai Bible – Biblia Sinyati Olkerempe le Nkai 33 Bible Online

Olkerempe le Nkai 33 - Maasai Bible – Biblia Sinyati bible

Olkerempe le Nkai 33

¹Enting'idata tiatua Olaitoriani, intae lelo supati! Keishiaakino enkisisa lelo sidain iltauja.

²Esisa Olaitoriani to lwulul loo usin enterrep ninye to lkerempe te nkawuo oo sinkolioitin naata iusin tomon!

³Entaranyaki ninye osinkolio ng'ejuk, entoosh iusin e nkinanta te nkarriyiano, too mbuakunot kituaak.

⁴Amu keitoriori ororei lo laitoriani; ore isiaaitin enyena pooki naa keisiligayu.

⁵Kenyor ninye esupatisho o esipata; kebore enkop pooki enyorrata nauno o Laitoriani.

⁶Ore to rorei lo Laitoriani neitobiruaki apa keper, o lorora lenye pooki te nkiyang'et e nkutuk enye.

⁷Neiturrur ninye inkariak e naiposha anaa enkare natii atua oltulet; nepik ninye enguton atua ilaleta ooshumishoreki.

⁸Nchoo enkop pooki eureyu Olaitoriani, nchoo lelo pooki oomanya enkop meitasho te nkanyit te dukuya ninye!

⁹Amu eiroro apa ninye, netabayie ina natejo; neitanapishe ninye, netuune ina.

¹⁰Eitaa Olaitoriani nkiguanat oo loshon pesho; neitukurru ninye nkitobirat oo loreren.

¹¹Ore enkiguana o Laitoriani neitashe ntarasi, ore ndamunot o ltau lenye nebaiki iishoritin pooki.

¹²Kemayiana ilo osho laa Enkai Olaitoriani lenye, ilo orere otegelua ninye aitaa enjung'ore enye!

¹³Keing'or Olaitoriani kop etii keper, nedol ninye inkera e tung'ani.

¹⁴Ore etii ninye ine wueji e nkitoo neing'orisho, neing'or lelo pooki oomanya enkop,

¹⁵ninye ilo oitobirua iltauja lenye pooki, nejurru nkiaasin enye pooki.

¹⁶Meitajeuni olaiguanani te nkaraki enjore enye kitok; mejeu olmurrani te nkaraki engolon enye kitok.

¹⁷Pesho osiligi le mbarta o larrabal te nkisulata, ore te ngolon enye kitok nemeitajeusho.

¹⁸Ng'ura ajo etii enkong'u o Laitoriani shumata lelo ooure ninye, shumata lelo ooisilig enyorrata enye nauno,

¹⁹naa keidim ninye atokordu enkishui enye te keeya, nemeisho ninche eye te nkata o lameyu.

²⁰Olaitoriani eanyu enkishui ai; ninye eretoto o elong'o ang.

²¹Ee, keng'ida enkishui ang tiatua ninye, te nkaraki nikisiliga iyiook enkarna enye sinyati.

²²Nchoo ina nyorrata ino nauno, Olaitoriani, meeu shumata iyiook, anaa enikisilig iyiook iyie.