Read Maasai Bible – Biblia Sinyati Olkerempe le Nkai 40 Bible Online

Olkerempe le Nkai 40 - Maasai Bible – Biblia Sinyati bible

Olkerempe le Nkai 40

¹Enetii olautaroni le ranyare: Osinkolio le Daudi. Ataanyua nanu Olaitoriani te ng'iriata; naairrugokino ninye nening enkomono ai.

²Aaitayio ninye nanu tiatua engumoto e ntorroni, tiatua oloonyionyi le sarng'ab, neitasheyie inkejek aainei te nchumata e ndapidapoi, neitaserian inkejek aainei.

³Nepik osinkolio ng'ejuk enkutuk ai, osinkolio le nkisisa te Nkai ang. Kepuo ilkumok aadol neureishoyu, nepik osiligi lenye Olaitoriani.

⁴Emayiana oltung'ani oitaa Olaitoriani osiligi lenye, ilo tung'ani lemeibelekenyakino lelo oowuasa, alo enetii lelo oopong'ori esujaa inkaitin oo nkitanyaanyukot!

⁵Itoponayie iyie, Olaitoriani Enkai ai, nkiaasin inono e nking'asia o ndamunot inono tialo iyiook; meetae olikinyaanyukie iyie! Tenaa naaji kaibalunye alimu ninche, naa eikumok oleng meikenayu.

⁶Ming'uar iyie ilasarri o nkishoorot; kake kinchoo iyie enkiok naning'isho Ore ilasarri oopejori o lasar loo ng'ok eitu iyie ing'uar.

⁷Najo nanu, “Ng'ura aeuo; ore to lpiyayati le mbuku nesira inaaipirare nanu:

⁸Kang'ida nanu aas eyieunoto ino, Na Ai; etii enkitanapata ino atua oltau lai.”

⁹Atolikioyie nanu ilomon supati le nkordunoto tiatua eumata sapuk; eitu nanu agira, anaa eniyiolo iyie, Olaitoriani.

¹⁰Eitu nanu aisudoo ina retoto ino naitajeusho tiatua oltau lai, atolimuo nanu esupatisho ino o enjeunoto ino; eitu nanu anuk ina nyorrata ino nauno o esupatisho ino, aaibalakinyie nanu te umata sapuk.

¹¹Mimbooyo iyie Olaitoriani olng'ur lino tialo nanu, nchoo ina nyorrata ino nauno o esupatisho ino aagolie nanu anaake!

¹²Amu aatamuata nanu ntorrok nemeikenayu; aaidimutua nanu ntorrok aainei, o metaba anaa neaku meekure aidim atodolisho; eikumok intorrok aainei aalang ilpapit te ndukuya ai, netalepori oltau lai.

¹³Tonyorrai, Olaitoriani, tokorduaki nanu! Olaitoriani, taretuoki nanu tasioki!

¹⁴Nchoo lelo ooing'oru pee eiwuang'ie enkishui ai meitukurruni nemiloyu, nchoo ninche meibelekenyi neitadouni lelo ooing'oru pee aainyal!

¹⁵Nchoo meirriang'ieki ninche te nkaraki enkurruna enye, lelo laajoki nanu, “Aha-ha.”

¹⁶Kake ore lelo pooki liking'oru iyie nchoo eng'idayu neshipa tiatua iyie; nchoo lelo pooki oonyor enjeunoto ino emooki aajo, “Eikitok Olaitoriani!”

¹⁷Ore nanu, kara aisinani namena, kake Olaitoriani laagolie. Ira iyie eretoto ai olakordunoni lai; mimutie iyie, na Ai ai!