Read Maasai Bible – Biblia Sinyati Olkerempe le Nkai 42 Bible Online

Olkerempe le Nkai 42 - Maasai Bible – Biblia Sinyati bible

Olkerempe le Nkai 42

¹Enetii olautaroni le ranyare: Osinkolio le nkiteng'ena loo Layiok le Kora. Ore anaa enayieu enkolii enkare naruko neijia etiu oltau lai, kiyieu iyie, Enkai.

²Keeta oltau lai enkure te nkaraki Enkai, Enkai naishu. Kanu kenya alotu aing'or enkomom e Nkai?

³Etaa ilkiyio laainei ninche endaa ai dama o kewarie, aajoki nanu iltung'ana anaake, “Koree Enkai ino?”

⁴Tenadamu nanu kuna baa nelepori oltau lai tiatua nanu, amu ashomo nanu arikoo olorora nikipuo e nkaji e Nkai, too mbuakunot e nchipai o sinkolioitin le nashe, neitobir ilo orora osirua.

⁵Kainyoo pee itapalari iyie, lo tau lai, naa kainyoo pee itanyamala iyie tiatua nanu? Isiliga Enkai; amu kaitoki ake aisis ninye, ninye eretoto ai naa Enkai ai.

⁶Etalepori oltau lai tiatua nanu, ore te nkaraki ina kaadamu nanu iyie, ebaiki enkop e Yordan o ene Harmon, ebaiki oldoinyo le Misar.

⁷Eishiraka enguton e nguton te mbuakunoto oo nkariak inono; ore ndoorot oo nkariak o lopir le nkare naaitemoitie nanu.

⁸Ore te ndama neitanap Olaitoriani enyorrata enye nauno, ore te nkewarie netii osinkolio lenye te nebo nanu, enkomono e Nkai e nkishui ai.

⁹Atiaaka nanu Enkai, endapidapoi ai, “Kainyoo pee mikidamu nanu? Kainyoo nanu pee alo aishirita, te nkaraki enkitorogonyata naaitorogony olmang'atinta?”

¹⁰Etotiutuo anaa ilbaa torrok to sesen lai, imorot oo lmang'ati laainei, aajoki ninche anaake, “Koree e Nkai ino?”

¹¹Kainyoo iyie pee itapalari, lo tau lai, naa kainyoo iyie pee itigire tiatua nanu? Isiliga Enkai, amu kaitoki ake aisis ninye, eretoto ai naa Enkai ai.