Read Maasai Bible – Biblia Sinyati Olkerempe le Nkai 44 Bible Online

Olkerempe le Nkai 44 - Maasai Bible – Biblia Sinyati bible

Olkerempe le Nkai 44

¹Enetii olautaroni le ranyare: Osinkolio le nkiteng'ena loo Layiok le Kora Kitoning'o iyiook too nkiyiaa ang, iyie Enkai, etolikitio iyiook iloo papa, nena kiaasin apa nitaasa iyie too nkolong'i enye, apa moitie:

²iyie makewan oturrumoyie iloshon te nkaina ino, kake intubula olorere lino; nipik iloreren osina, kake nchoo olorere lino etoni te seriani;

³amu mme to lalem lenye apa eisulie ninche ena kop, neme enkaina enye maate naishoo ninche metimirisho; kake enkaina ino e tatene, ee enkaina ino, o ewang'an e nkomom ino; amu itishipakine iyie ninche.

⁴Ira iyie Olaiguanani lai o Enkai ai, naa iyie oisho Yakobo metimirisho.

⁵Te iyie iyiook kisula too lmang'ati lang; te nkarna ino iyiook kintunyoo lelo oogilunore iyiook.

⁶Amu mme enkawuo ainanu aisilig, nemaaidim olalem lai aitajeu.

⁷Kake intajewuo iyie iyiook too lmang'ati lang, nitipika olmilo lelo ooiba iyiook.

⁸Enkai kiting'idare iyiook anaake, naa eikinchooyo enashe te nkaraki enkarna ino ntarasi.

⁹Ore ake eyia, inturrayie iyie iyiook nintadou iyiook, neitu iyie ilo airiamariyie njorin ang.

¹⁰Inchoo iyie iyiook maibelekenyata aailany ilmang'ati lang; ore lelo mang'ati lang neibung aaraya masaa ang.

¹¹Intotiuo iyie iyiook anaa ntare naayieng'i, nindapashaka iyiook iloreren.

¹²Itimira iltung'ana linono neitu inosie toki, eitu iyie ing'oru enkinyiang'a nagol te nkaraki ninche.

¹³Itipika iyie iyiook elap too lmang'ati lang, neikordod neyiet iyiook lelo oomanita iyiook.

¹⁴Ntaa iyie iyiook endung'et e rashe tiatua iloreren, entoki nakueniyieki tiatua iloshon.

¹⁵Ore endama pooki netii esulare ai dukuya nanu, neimulumula enkurruna enkomom ai,

¹⁶te nkaraki irorei le ilo oikordodisho nemorisho, te nkaraki ilo mang'atinta o ilo oitalaku elap.

¹⁷Eetuo kuna pooki shumata iyiook, hoo neitu kipal mikidamu iyie, neitu kipong'ori to lning'o lino.

¹⁸Eitu eibelekenya iltauja lang, neitu elam iroruat ang enkoitoi ino,

¹⁹nitigiligila iyiook tiatua ewueji oo mbariak, nimulumul iyiook te naimin namisimis.

²⁰Amaa naaji tenaa ketorikine iyiook enkarna e Nkai ang, anaa eikintoriokito inkaik ang enkai omoni,

²¹aimeirrash Enkai ena? Amu keyiolo ninye nkisudorot o ltau.

²²Ee, te nkaraki enkorrok ino pee eari iyiook endama pooki, neikoni iyiook anaa nkerra naayieng'i.

²³Tuputunye! Minturraa iyiook ntarasi Kainyoo pee irura, iyie Olaitoriani? Tudumunye, minturraa iyiook anang'aki enelakua.

²⁴Kainyoo iyie pee isudoo enkomom ino? Kainyoo iyie pee kitorikine osina lang o enkitorogonyata ang?

²⁵Eirrugote iltauja lang aabaiki enkop; eirragita iseseni lang te nkop.

²⁶Tudumunye, wou taretu iyiook! Tokordu iyiook te nkaraki ina nyorrata ino nauno!